“Sarig kan Jehova ha imo bug-os nga kasingkasing, ngan ayaw pagtapod ha imo kalugaringon nga pagsabot. Ha ngatanan mo nga dalan tagda hiya, ngan iya tatadungon an imo mga aragian.”—Proberbios 3:5, 6, Bag-o nga Kalibotan nga Hubad.

 “Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabut: ha ngatanan mo nga dalan kilalaha hiya, ngan hiya magtututdo han imo mga agianan.”—Proberbios 3:5, 6, An Baraan nga Kasuratan.

 Dapat kita mangaro hin giya tikang kan Jehova a nga Dios imbes nga maglugaring paghimo hin importante nga mga desisyon.

 “Sarig kan Jehova ha imo bug-os nga kasingkasing.” Iginpapakita naton nga nasarig kita ha Dios kon ginbubuhat naton an mga butang uyon ha iya paagi. Kinahanglan bug-os nga sumarig kita ha Dios ha aton bug-os nga kasingkasing. Ha Biblia, an kasingkasing agsob nga nagtutudlok ha sulod nga pagkatawo han usa nga nag-uupod han iya emosyon, motibo, panhunahuna, ngan disposisyon. Salit diri la an aton mga inaabat an nahiuupod ha aton pagsarig ha Dios ha aton bug-os nga kasingkasing. Desisyon ito nga aton ginhihimo kay kombinsido gud kita nga an aton Maglalarang maaram han pinakamaopay para ha aton.—Roma 12:1.

 “Ayaw pagtapod ha imo kalugaringon nga pagsabot.” Kinahanglan kita sumarig ha Dios kay diri kita makakasarig ha aton diri perpekto nga panhunahuna. Kon sumarig la kita ha aton kalugaringon o ha aton mga inaabat, bangin makahimo kita hin mga desisyon nga ha siyahan baga hin maopay pero ha urhi, magriresulta ngay-an hin maraot. (Proberbios 14:12; Jeremias 17:9) Mas labaw gud an kinaadman han Dios kay ha aton. (Isaias 55:8, 9) Kon magpapagiya kita ha iya, magigin malampuson kita.—Salmo 1:1-3; Proberbios 2:6-9; 16:20.

 “Ha ngatanan mo nga dalan tagda hiya.” Dapat naton hibaroan an panhunahuna han Dios ha tagsa nga bahin han aton kinabuhi ngan ha kada importante nga desisyon nga aton hihimoon. Mahihimo naton ito kon mag-aampo kita ha iya para hin giya ngan kon susundon naton an ginsisiring han iya Pulong, an Biblia.—Salmo 25:4; 2 Timoteo 3:16, 17.

 “Iya tatadungon an imo mga aragian.” Gintatadong han Dios an aton aragian pinaagi ha pagbulig ha aton nga magkinabuhi uyon ha iya matadong nga mga suruklan. (Proberbios 11:5) Salit nalilikyan naton an mga problema ngan nagigin mas malipayon kita.—Salmo 19:7, 8; Isaias 48:17, 18.

 An libro ha Biblia nga Proberbios nagsusulod han nangunguna nga mga prinsipyo basi magin malipayon an aton kinabuhi ngan mapalipay naton an Dios. An siyahan nga siyam nga kapitulo ginsurat sugad nga sagdon han usa nga amay ha iya hinigugma nga anak. Ginpapabug-atan han kapitulo 3 an kapulsanan ha aton han pag-apresyar ngan pagpagiya ha kinaadman han aton Maglalarang.—Proberbios 3:13-26.