GINSAYSAY AN MGA BERSIKULO HAN BIBLIA
Roma 10:13—“Magtawag ha Ngaran han Ginoo”
“An bisan hin-o nga natawag ha ngaran ni Jehova matatalwas.”—Roma 10:13, Bag-o nga Kalibotan nga Hubad.
“Bisan hin-o nga magtawag ha ngaran han Ginoo maluluwas hiya.”—Roma 10:13, An Baraan nga Kasuratan.
Kahulogan han Roma 10:13
Waray ginpapaurog an Dios ngan iya gintatagan an ngatanan hin oportunidad nga matalwas ngan magkaada kinabuhi nga waray kataposan, anoman an ira nasyonalidad, lahi, o kahimtang ha sosiedad. Pero basi makarawat ito, kinahanglan tumawag kita ha ngaran ni Jehova, nga amo an personal nga ngaran han Makagarahum-ha-Ngatanan nga Dios. a—Salmo 83:18.
Ha Biblia, an ekspresyon nga “natawag ha ngaran ni Jehova” nagpapasabot hin labaw pa kay ha paghibaro la han ngaran han Dios ngan paggamit hito ha pagsingba. (Salmo 116:12-14) Nag-uupod ito ha pagtapod ha Dios ngan pagsarig ha iya para hin bulig.—Salmo 20:7; 99:6.
Importante kan Jesus an ngaran han Dios. Ha iya modelo nga pag-ampo, ini an siyahan nga iya ginsiring: “Amay namon ha langit, baraanon unta an imo ngaran.” (Mateo 6:9) Nagsiring liwat hi Jesus nga basi naton makarawat an kinabuhi nga waray kataposan kinahanglan kilalahon, sugton, ngan higugmaon naton an Persona nga nagtatag-iya hito nga ngaran.—Juan 17:3, 6, 26.
Kay ano nga makakasiring kita nga hi Jehova amo an “Ginoo” nga gin-unabi ha Roma 10:13 ha An Baraan nga Kasuratan? Tungod kay ini nga bersikulo nagkotar ha Joel 2:32, diin ngaran han Dios, diri an titulo nga “Ginoo,” an nakasurat ha orihinal nga Hebreo. b
Konteksto han Roma 10:13
Ha Roma kapitulo 10, iginpapakita han Biblia nga basi kita magkaada maopay nga relasyon ha Dios, kinahanglan magpakita kita hin pagtoo kan Jesu-Kristo. (Roma 10:9) Ini nga pangatadongan ginsuportaran han pipira nga kotasyon tikang ha Daan nga Tugon. Maipapakita han usa nga tawo an iya pagtoo pinaagi ha ‘pagpasamwak ha publiko,’ nga nag-uupod han pagpasamwak han maopay nga sumat mahitungod han katalwasan ha mga diri tumuroo. Pinaagi hini, natatagan hin oportunidad an iba nga magkaada pagtoo nga nagriresulta hin kinabuhi.—Roma 10:10, 14, 15, 17.
Basaha an Roma kapitulo 10 pati an mga footnote ngan mga cross-reference.
a An ngaran han Dios makikita hin mga 7,000 ka beses ha kadaan nga mga manuskrito han Biblia, o mga sinurat nga kopya han Kasuratan. Ha Hebreo, an baraan nga ngaran nakasurat ha upat nga letra, nga gintatawag nga Tetragrammaton. Ha Waray-Waray, ito nga ngaran komon nga ginhuhubad nga “Jehova”; pero para ha pipira nga eskolar, mas karuyag nira an hubad nga “Yahweh.”
b Posible gud nga an mga Kristiano nga parasurat han Biblia naggamit han ngaran han Dios kon nagkukotar hira han mga teksto ha “Daan nga Tugon” nga nagsusulod han ngaran han Dios. An The Anchor Bible Dictionary nagsiring: “May mga ebidensya nga an Tetragrammaton, an Baraan nga Ngaran nga Yahweh, makikita ha pipira o ha ngatanan nga teksto ha B[ag-o] nga T[ugon] nga ginkotar ha D[aan] nga T[ugon] han siyahan ito nga ginsurat.” (Volume 6, pahina 392) Para ha dugang nga impormasyon, kitaa an “An Ngaran han Dios ha Kristiano Griego nga Kasuratan” ha Apendise A5 han Bag-o nga Kalibotan nga Hubad han Baraan nga Kasuratan. An Appendix C2 han study edition han New World Translation of the Holy Scriptures may lista han mga hubad han Biblia nga naggamit han baraan nga ngaran ha Roma 10:13.
Bangin Maruyagan Mo Liwat
BATON HA MGA PAKIANA MAHITUNGOD HA BIBLIA
May Ngaran ba an Dios?
Mababasa ha damu nga hubad han Biblia an ngaran han Dios. Kinahanglan mo ba ito gamiton?
KATUTDOAN HAN BIBLIA
Mga Garamiton ha Pag-aram ha Biblia
Pagpili hin reperensya ha pag-aram ha Biblia nga mabulig nga magin makapatagbaw ngan makalilipay an imo pag-aram.
KATUTDOAN HAN BIBLIA
Testingi an Pag-aram ha Biblia
Magkaada libre nga interactive nga pag-aram ha Biblia nga may kaupod nga magturutdo.
