Nahangad ha langit hi Maria Magdalena samtang gintatrapo an luha ha iya mga mata. An iya hinigugma nga Ginoo nakaraysang ha usa nga kahoy. Panahon adto han katsaringsing ngan tikaudto pa la, ‘pero nalukop hin kasisidman an tuna’! (Lucas 23:44, 45) Nagkurigmos hiya ngan kinadto ha mga babaye nga nakada ha iya hirani. Diri ito usa nga solar eclipse, nga naabot la hin pipira ka minuto, kay an pagsirom inabot hin tulo ka oras. Posible nga hi Maria ngan an iba pa nga natindog hirani kan Jesus nakabati hin huni han mga hayop nga kaurogan na nga nababatian la kon gab-i. An pipira nga mga nakadto “nahadlok gud . . . ngan nagsiring: ‘Sigurado gud nga ini an Anak han Dios.’” (Mateo 27:54) Bangin naghunahuna an mga sumurunod ni Jesus ngan an iba pa nga paagi ito ni Jehova ha pagpakita nga nasusubo gud hiya ngan nasisina ha brutal nga pagpatay ha iya Anak.

 Diri kaya pagkinitaon ni Maria Magdalena an kahimtang ni Jesus, pero diri liwat niya kaya bumaya. (Juan 19:25, 26) Duro gud an kasakit ni Jesus. Ngan an nanay ni Jesus nagkikinahanglan liwat hin pagliaw ngan suporta.

 Tungod han damu nga ginbuhat ni Jesus para kan Maria, andam hi Maria nga buhaton an ngatanan para kan Jesus. Hadto, miserable an iya kinabuhi ngan ginmiminos hiya, pero ginbag-o ito ngatanan ni Jesus. Tungod han bulig ni Jesus, nagkaada dignidad ngan katuyoan an iya kinabuhi. Nagin usa hiya nga babaye nga may daku nga pagtoo. Paonan-o? Ngan ano an aton mahibabaroan tikang ha iya pagtoo?

 Ha Biblia, nagtikang an istorya mahitungod kan Maria Magdalena pinaagi hin usa nga milagro. Gintagan hiya ni Jesus hin kagawasan tikang ha maraot gud nga sitwasyon. Hito nga panahon, komon gud an impluwensya han mga demonyo, ngan gin-aatake hiton magraot nga espiritu an damu nga tawo. Nasanib pa ngani hira ha pipira ngan ira ginkukontrol ito nga mga tawo. Diri kita maaram han epekto han mga demonyo ha makalolooy nga hi Maria Magdalena; maaram la kita nga ginsaniban hiya han pito hiton madarahog ngan waray kalooy nga mga demonyo. Maopay na la kay ginpaiwas hira ngatanan ni Jesu-Kristo!—Lucas 8:2.

 Yana nga may kagawasan na hi Maria, nabag-o na an iya kinabuhi. Paonan-o niya ipapakita an iya pagpasalamat? Nagin maunungon hiya nga sumurunod ni Jesus. Binulig liwat hiya ha pagtagana han mga panginahanglan ni Jesus ngan han iya mga apostol, sugad han pagkaon, bado, ngan makakaturogan. Ito nga kalalakin-an diri mga riko, ngan hito nga panahon, waray hira sekular nga trabaho. Basi makapokus ha pagsangyaw ngan pagtutdo, kinahanglan nira an materyal nga bulig.

 Hi Maria ngan an pipira nga kababayin-an binulig ha pagtagana hito nga mga panginahanglan. Ini nga kababayin-an ‘nag-asikaso ha ira nga ginagamit an ira mga panag-iya.’ (Lucas 8:1, 3) An pipira hini nga kababayin-an posible nga may kaya ha materyal. Waray ginsisiring an Biblia kon nag-andam ba hira hin pagkaon, naglaba, o nag-asikaso nga may makaturogan hira Jesus ha mga baryo nga ira ginkakadtoan. Pero anoman an ira ginhimo, kinaburut-on nga ginbuhat nira ini basi suportaran ito nga grupo, nga posible mga 20 an kadamu. An mga sakripisyo hini nga kababayin-an sigurado nga nakabulig kan Jesus ngan ha iya mga apostol nga makapokus ha pagsangyaw. Syempre, maaram hi Maria nga diri niya kaya balosan an mga ginbuhat ha iya ni Jesus—pero nalipay hiya ha paghatag han iya bug-os nga mahihimo para kan Jesus!

 Yana, damu an nagmiminos ha mga tawo nga nagsiserbi ha iba. Pero diri sugad hito an Dios. Hunahunaa an iya daku nga kalipay samtang nakikita niya hi Maria nga nagbubuhat han iya bug-os nga mahihimo basi suportaran hi Jesus ngan an iya mga apostol! Yana, damu liwat an matinumanon nga Kristiano nga nalilipay pagserbi ha iba. Usahay, daku gud an nahihimo han praktikal nga bulig o bisan han mga pulong nga nagpapakita hin pagkabuotan. Gin-aapresyar gud ito ni Jehova.—Proberbios 19:17; Hebreo 13:16.

 Usa hi Maria Magdalena ha damu nga kababayin-an nga inupod kan Jesus ngadto ha Jerusalem para ha Paskua han 33 C.E. (Mateo 27:55, 56) Han nahibaroan niya nga gin-aresto hi Jesus ngan ginbista hito nga gab-i, sigurado nga nahadlok hiya. Ngan may mas maraot pa nga balita. Ginsentensyahan ni Gobernador Ponsio Pilato hi Jesus hin brutal nga kamatayon ha kahoy tungod han pagpresyur ha iya han Judio nga mga lider han relihiyon ngan han mga tawo nga ira nasulsolan. Posible gud nga nakita ni Maria an iya Agaron nga dugoon ngan kapoy na gud samtang nakukurian pagpas-an han kahoy nga raraysangan ha iya.—Juan 19:6, 12, 15-17.

 Ha lugar nga ginraysangan kan Jesus, han nagsirom na durante han udto, hi Maria Magdalena ngan an iba pa nga kababayin-an nagtitinindog “hirani ha pasakitan nga kahoy ni Jesus.” (Juan 19:25) Hi Maria waray bumaya didto. Nakita ngan nabatian niya samtang gintutugon ni Jesus an iya hinigugma nga apostol nga hi Juan nga atamanon an iya nanay. Nabatian niya an pangaraba ni Jesus ha iya Amay. Ngan nabatian liwat niya an ultimo nga ginsiring ni Jesus antes hiya mamatay, “Natuman na!” Nasakit gud hi Maria. Bisan han patay na hi Jesus, waray hiya bumaya didto. Katapos, nagpabilin hiya ha bag-o nga lubnganan, diin didto iginbutang han riko nga lalaki nga hi Jose nga taga-Arimatea an lawas ni Jesus.—Juan 19:30; Mateo 27:45, 46, 57-61.

 May mahibabaroan kita ha ehemplo ni Maria kon ano an puydi naton himoon kon may-ada kita mga igkasi-tumuroo nga naatubang hin makuri nga mga problema. Diri naton mapupugngan an mga trahedya o mawawara an kasakit nga ira inaabat. Pero mahimo kita magpakita ha ira hin pagpaid ngan kaisog. Ha panahon han kakurian, daku an naibubulig han suporta han usa nga sangkay. Kon gin-uunongan naton an aton sangkay nga may problema, iginpapakita naton nga may-ada kita daku nga pagtoo ngan makakaliaw gud ito ha iya.—Proberbios 17:17.

 Han iginbutang na an lawas ni Jesus ha lubnganan, usa hi Maria ha kababayin-an nga nag-andam hin dugang nga mahamot nga mga herba basi ibutang ha lawas ni Jesus. (Marcos 16:1, 2; Lucas 23:54-56) Katapos han Sabbath, nagmata hiya hin aga-aga pa. Imadyina nga naglalakat hiya ha masirom nga kalsada samtang tipakadto ha lubnganan ni Jesus kaupod an iba pa nga kababayin-an. Ha dalan, naghunahuna hira kon paonan-o nira matatanggal an mabug-at nga bato nga aada ha entrada han lubnganan. (Mateo 28:1; Marcos 16:1-3) Bisan pa hito, nagpadayon hira pagkadto. Tungod han ira pagtoo, napagios hira nga buhaton an ira bug-os nga mahihimo ngan itapod kan Jehova an diri nira kaya himoon.

 Posible nga nahiuna hi Maria pag-abot ha lubnganan. Waray hiya makatoo han iya nakita. Waray na an bato ha entrada—ngan waray na sulod an lubnganan! Nagdalagan dayon hiya basi isumat kanda Pedro ngan Juan an iya nakita. Imadyina nga naghahangos hiya nga nagsiring: “Ginkuha nira an Ginoo tikang ha lubnganan, ngan diri kami maaram kon diin nira hiya iginbutang”! Hira Pedro ngan Juan nag-apura pagkadto ha lubnganan. Nakita nira nga waray na gud man ito sulod, ngan katapos, inuli hira ha ira mga balay. a—Juan 20:1-10.

 Pagbalik ni Maria ha lubnganan, nagpabilin hiya nga nag-uusahan. Hiton temprano pa han aga, mamingaw gud an palibot ngan nakikita niya nga waray na sulod an lubnganan. Salit waray niya mapugngi an iya kalugaringon nga magtinangis. Tungod kay diri la gihap hiya makatoo nga waray na an Ginoo, ginkita niya an sulod han lubnganan, ngan nakalasan hiya han iya nakita. May duha nga anghel nga nakabusag nga nalingkod didto! “Kay ano nga nagtitinangis ka?” nagpakiana hira. Nagugupong nga gin-utro niya an iya ginsiring ha mga apostol: “Ginkuha nira an akon Ginoo, ngan diri ako maaram kon diin nira hiya iginbutang.”—Juan 20:11-13.

 Pagtalikod niya, may nakita hiya nga lalaki nga natindog. Waray niya hiya makilal-i, salit kahuna niya nga hiya an hardinero nga nanginginano hito nga lugar. Ito nga lalaki may pagkabuotan nga nagpakiana ha iya: “Babaye, kay ano nga nagtitinangis ka? Hin-o an imo ginbibiling?” Hi Maria binaton, “Mano, kon ikaw an nagkuha ha iya, sumati ako kon diin mo hiya iginbutang, ngan kukuhaon ko hiya.” (Juan 20:14, 15) Hunahunaa an iya ginsiring. Kaya ba kuhaon ngan dad-on hiton nag-uusahan la nga babaye an lawas ni Jesu-Kristo, nga usa nga makusog hadto nga tawo? Waray na ito hunahunaa ni Maria. An iya la nahibabaroan nga kinahanglan niya buhaton an bug-os niya nga makakaya.

 Kon naatubang kita hin mga problema nga baga hin diri naton kaya, mahimo ba naton subaron hi Maria Magdalena? Kon magpupokus la kita ha aton mga kaluyahan ngan mga limitasyon, bangin waray na lugod kita mabuhat nga bisan ano tungod ha pagkinabaraka ngan panluya. Pero kon bubuhaton naton an bug-os naton nga mahihimo ngan isasarig ha Dios an mga butang nga diri naton kaya, bangin an aton mabuhat labaw pa kay han aton nahuhunahuna. (2 Corinto 12:10; Filipos 4:13) Labaw ha ngatanan, mapapalipay naton hi Jehova. Sigurado nga ito an ginbuhat ni Maria, salit ginbalosan hiya ha paagi nga waray gud niya laumi.

 An lalaki nga natindog ha atubangan ni Maria diri usa nga hardinero. Usa hiya hadto nga panday, katapos, nagin magturutdo, ngan yana hiya an hinigugma nga Ginoo ni Maria. Pero waray makilala ni Maria ito nga lalaki, salit nagtikang hiya magpahirayo ha iya. Waray gud mahunahuna ni Maria ini nga kamatuoran: Ginbanhaw hi Jesus sugad nga gamhanan nga espiritu. Nagpakita ha iya hi Jesus sugad nga tawo, pero an iya lawas iba na kay ha iya iginhalad. Hiton makalilipay nga mga adlaw katapos han iya pagkabanhaw, kaurogan na nga diri hiya nakikilala bisan han mga tawo nga nakilala gud ha iya.—Lucas 24:13-16; Juan 21:4.

 Paonan-o nakilala ni Maria hi Jesus? Pinaagi ha pagtawaga ha iya ni Jesus: “Maria!” Liningi dayon hiya ngan nagsinggit, ginyakan an pamilyar nga Hebreo nga pulong nga sigurado nga pauroutro nga igintawag niya kan Jesus—“Rabboni!” Ito nga lalaki amo an iya hinigugma nga Magturutdo! Nalipay gud hi Maria. Ginkaptan niya hi Jesus ngan diri niya karuyag buhian.—Juan 20:16.

 Maaram hi Jesus han ginhuhunahuna ni Maria. “Ayaw na pagkinapyot ha akon,” nagsiring hiya. Maiimadyin naton nga ginsiring ini ni Jesus ha buotan nga paagi, bangin nahiyom pa ngani samtang hinay-hinay nga gintatanggal niya an mga kamot ni Maria, ngan nagsiring hiya ha iya: “Waray pa ako sumaka ngadto ha Amay.” Diri pa hiya masaka ngadto ha langit. May-ada pa hiya buruhaton dinhi ha tuna, ngan karuyag niya nga bumulig hi Maria. Syempre, hi Maria namati hin maopay kan Jesus. Ginsidngan niya hi Maria: “Kadto . . . ha akon kabugtoan ngan sidnga hira, ‘Masaka ako ngadto ha akon Amay ngan iyo Amay ngan ha akon Dios ngan iyo Dios.’”—Juan 20:17.

 Usa gud ito nga maopay nga toka tikang ha iya Agaron! Hi Maria usa han siyahan nga mga disipulo nga nakapribilehiyo nga makita an ginbanhaw nga hi Jesus, ngan yana gintagan hiya han pribilehiyo nga isumat ha iba ito nga maopay nga sumat. Hunahunaa an daku nga kalipay ngan kaeksayted ni Maria samtang ginbibiling niya an mga disipulo. Imadyina nga naghahangos hiya samtang ginyayakan niya an mga pulong nga nagpabilin ha iya hunahuna ngan ha urhi nagpabilin liwat ha hunahuna han iba pa nga mga disipulo: “Nakita ko an Ginoo!” Iginsumat niya ha ira an ngatanan nga ginsiring ha iya ni Jesus. Eksayted gud hiya salit madagmit an iya pagyakan. (Juan 20:18) An iya ginsiring kapariho han nabatian han mga disipulo tikang ha iba pa nga kababayin-an nga kinadto ha lubnganan ni Jesus.—Lucas 24:1-3, 10.

 Ano an reaksyon han kalalakin-an? Ha siyahan, waray hira tumuod. Mababasa naton: “Naghunahuna hira nga imahinasyon la ini nga iginsumat ha ira, ngan waray hira tumuod ha mga babaye.” (Lucas 24:11) Inin buotan nga kalalakin-an nagdaku ha usa nga komunidad diin diri gintataporan an mga babaye. Sumala ha rabiniko nga tradisyon, an usa nga babaye diri puydi maghatag hin testimonya ha korte. Bangin diri napapansin han mga apostol nga naiimpluwensyahan na ngay-an hira han ira kultura. Pero waray gud ginpapaurog hi Jesus ngan an iya Amay. Daku gud nga pribilehiyo an ira iginhatag ha matinumanon nga babaye nga hi Maria!

 Waray magpaapekto hi Maria ha reaksyon han kalalakin-an. Maaram hiya nga natapod ha iya an iya Agaron, ngan ito an importante ha iya. An ngatanan nga sumurunod ni Jesus gintaporan liwat hin pribilehiyo nga magsumat hin mensahe. Gintatawag han Biblia ito nga mensahe nga “maopay nga sumat han Ginhadian han Dios.” (Lucas 8:1) Waray magsaad hi Jesus ha iya mga sumurunod nga an ngatanan matuod ha ira o mag-aapresyar han ira ginbubuhat. Kabaliktaran pa ngani an mahitatabo. (Juan 15:20, 21) Salit maopay nga hinumdoman han mga Kristiano hi Maria Magdalena. Bisan kon waray dayon tumuod ha iya an iba nga mga disipulo, waray maibani an iya kalipay ha pagsumat han maopay nga sumat mahitungod han ginbanhaw nga hi Jesus!

 Waray pag-iha, nagpakita hi Jesus ha iya mga apostol ngan katapos ha iba pa nga iya mga sumurunod. Makausa, nagpakita hiya ha sobra 500 nga disipulo! (1 Corinto 15:3-8) Sigurado nga nagtitikarig-on an pagtoo ni Maria ha kada panahon nga nagpapakita hi Jesus, presente man hiya hito nga mga higayon o nabatian la niya ito. Posible nga hi Maria Magdalena usa han kababayin-an nga gin-unabi nga nakadto ha katirok ha Jerusalem han Pentekostes han iginbubo an baraan nga espiritu ha mga sumurunod ni Jesus nga nagkakatirok.—Buhat 1:14, 15; 2:1-4.

 Damu an aton rason nga tumoo nga hi Maria Magdalena nagpabilin nga matinumanon tubtob ha kamatayon. Hinaot an tagsa ha aton magin determinado nga subaron hiya! Masusubad naton an pagtoo ni Maria Magdalena kon magigin mapasalamaton kita ha ngatanan nga ginbuhat ni Jesus para ha aton ngan mapainubsanon nga magsiserbi kita ha iba samtang nasarig han bulig han Dios.