Diri. Iginpapakita han Biblia nga ha Dios la dapat kita mag-ampo, ha ngaran ni Jesus. Hi Jesus nagsiring ha iya mga disipulo: “Sugara hini an iyo pag-ampo: ‘Amay namon ha langit: Pagdayawon an imo baraan nga ngaran.’” (Mateo 6:9, Maupay nga Sumat) Waray gud hiya magsugo ha iya mga disipulo nga mag-ampo ha mga santos, mga anghel, o ha bisan hin-o labot han Dios.

 Hi Jesus nagsiring liwat ha iya mga sumurunod: “Amo ako an dalan, an kamatuoran, ngan an kinabuhi; waray makakadto han Amay kon diri pinaagi ha akon.” (Juan 14:6, Maupay nga Sumat) Hi Jesus la an gintagan hin awtoridad han Dios nga dumaop ha iya para ha aton.—Hebreo 7:25.

Puydi ba ako mag-ampo ha Dios ngan mag-ampo liwat ha mga santos?

 Sugad nga bahin han Napulo nga Sugo, an Dios nagsiring: “Ako amo an GINOO nga iyo Dyos ngan maabugho ako nga Dyos.” (Exodo 20:5, Maupay nga Sumat) Ha Bag-o nga Kalibotan nga Hubad ini nga bersikulo iginhubad nga “usa nga Dios nga nagsusugo nga ihatag ha [iya] an eksklusibo nga debosyon.” An Dios nagsusugo nga an debosyon o pagsingba—upod na an pag-ampo—eksklusibo nga ihatag ha iya.—Isaias 48:11.

 Napapasubo naton an Dios kon nag-aampo kita ha iba, bisan ha mga santos o ha baraan nga mga anghel. Han hi apostol Juan nagsari nga singbahon an usa nga anghel, ginpugngan hiya han anghel pinaagi ha pagsiring: “Ayaw pagbuhata ito! Usa la ako nga imo igkasi surugoon ngan han imo kabugtoan, adton natoo han kamatuoran nga iginpadayag ni Jesus. Pagsingba kamo han Dyos!”—Ginpadayag [Pahayag] 19:10, Maupay nga Sumat.