Gin-gamit ba han Dios an Ebolusyon ha Paglarang han Iba-iba nga Klase hin Kinabuhi?
An baton han Biblia
Waray. An Biblia matin-aw nga nasiring nga ginlarang han Dios an mga tawo pati an iba-iba nga “klase” han hayop ngan tanom. a (Genesis 1:12, 21, 25, 27; Pahayag 4:11) Nasiring ito nga an ngatanan nga tawo nagtikang kanda Adan nga Eva, an aton siyahan nga mga kag-anak. (Genesis 3:20; 4:1) An asoy ha Biblia diri nasuporta ha teoriya nga gin-gamit han Dios an ebolusyon ha paglarang han iba-iba nga klase han kinabuhi, ini nga teoriya danay gintatawag nga theistic evolution. Kondi an tinuod, waray asoy ha Biblia nga nakontra ha ginsisiring han syensya nga ha usa nga klase hin kinabuhi may damu ka lain. b
Gin-gamit ba han Dios an ebolusyon?
An termino nga “theistic evolution” nagtutudlok ha damu ka lain nga ideya. An Encyclopædia Britannica nasiring nga ini nga termino nasuporta ha ideya nga “usa han mga proseso nga gin-gamit han Dios ha paghimo han mga butang amo an natural selection.”
An theistic evolution nag-uupod liwat hini nga mga ideya:
An ngatanan nga buhi nga organismo nagtikang ha usa nga organismo nga naporma ha maiha na nga panahon.
An usa nga klase hin kinabuhi hinay-hinay nga napuporma ngadto ha iba nga klase hin kinabuhi, ini nga ideya danay gintatawag nga macroevolution.
An Dios amo an nagpapahinabo hini nga mga proseso.
Uyon ba ha Biblia an ebolusyon?
Sugad hin nasiring an theistic evolution nga an asoy han Biblia ha Genesis mahitungod ha paglarang diri ngatanan husto. Kondi, ginkikilala ni Jesus an asoy ha Genesis sugad nga tinuod nga mga panhitabo. (Genesis 1:26, 27; 2:18-24; Mateo 19:4-6) An Biblia nasiring nga antes hi Jesus kumanhi ha tuna, nag-ukoy hiya ha langit kaupod an Dios ngan kabulig han Dios ha paghimo han “ngatanan nga butang.” (Juan 1:3) Salit, an ideya nga gin-gamit han Dios an ebolusyon ha paghimo han iba-iba nga klase hin kinabuhi diri uyon ha igintututdo han Biblia.
Ebolusyon ba an abilidad han mga tanom ngan hayop ha pagpahiuyon?
Waray isaysay ha Biblia kon magkakaada pira ka lain an usa nga klase hin kinabuhi. Diri liwat ito nakontra ha kamatuoran nga an iba-iba nga klase hin hayop ngan tanom nga ginlarang han Dios magkakadurodilain samtang nagdadamu hira o napahiuyon ha bag-o nga mga palibot. Bisan kon ginhuhunahuna ini han pipira sugad nga usa nga klase hin ebolusyon, an tinuod waray bag-o nga klase hin kinabuhi nga nahihimo.
a Ginagamit han Biblia an pulong nga “klase,” nga mas haluag an kahulogan kay han pulong nga “species” nga ginagamit han mga syentista. Kasagaran, an gintatawag han mga syentista nga ebolusyon han bag-o nga species diri ebolusyon kondi usa la ka lain ha sulod han usa nga klase han kinabuhi, sugad han pagkagamit hito nga pulong ha asoy han Genesis.
b Ini nga ideya danay gintatawag nga microevolution.
Bangin Maruyagan Mo Liwat
IMPORTANTE NGA MGA KATUTDOAN
Ginlarang ba an Uniberso?
Damu an may sayop nga pagsabot ha asoy han Biblia mahitungod ha paglarang, para ha iba susmatanon la ito. Katoohan gud ba an ginsisiring han Biblia?
LIBRO NGAN BROSYUR
Ginlarang ba an Kinabuhi?
MAHITUNGOD HA AMON
Paghangyo nga May Bumisita ha Imo
Hisgotan an usa nga pakiana ha Biblia, o mahibaro hin dugang mahitungod ha mga Saksi ni Jehova.