An Biblia waray mag-unabi hin Halloween, usa nga okasyon nga ginsiselebrar han damu ha Oktubre 31 kada tuig. Kondi, an mga gintikangan ngan tradisyon han Halloween nakontra ha mga katutdoan han Biblia.

Hini nga artikulo

•  Kasaysayan ngan mga tradisyon han Halloween

•  Importante ba an pagano nga gintikangan han Halloween?

•  Kay ano nga gintawag ito nga Halloween?

•   Samhain: An gintikangan han Halloween makikita ha “kadaan nga pagano nga piyesta nga ginsiselebrar han mga Celt sobra 2,000 ka tuig na an naglabay,” siring han The World Book Encyclopedia. “An mga Celt natoo nga hini nga panahon an mga patay natampo ha mga buhi. Kon Samhain, an mga buhi mahimo makig-upod ha mga patay.”—Kitaa an “ Kay Ano nga Gintawag Ito nga Halloween?”

•   Mga costume ha Halloween, dulse, ngan trick or treat: Sumala ha usa nga reperensya, an pipira han mga Celt nagsusul-ot hin makaharadlok nga costume basi an naglalakatlakat nga mga espiritu “maghuhunahuna nga papriho la hira” ngan diri hira dauton. An iba naghahalad hin magtam-is nga mga pagkaon ha mga espiritu basi diri hira mag-isog ngan mandaot ha mga tawo. a

   Ha Europe, han mga 500 C.E. tubtob 1500 C.E., ginsubad han mga klero han Katoliko an pagano nga mga kustomre ha ira lugar ngan ginsugo an ira mga membro nga magbalay-balay nga naka-costume ngan mangaro hin gudti nga regalo.

•   Mga multo, bampira, aswang, barangan, ngan zombie: Maiha na ini nga konektado ha magraot nga espiritu. Gintawag hira nga “gamhanan nga mga halimaw,” han libro nga Halloween Trivia ngan nagsiring ito nga ini hira “konektado gud ha kamatayon, ha mga patay o ha kahadlok nga mamatay.”

•   Mga karubasa ha Halloween, o mga jack-o’-lantern: Ha Britain, han mga 500 C.E. tubtob 1500 C.E., an mga tawo “nagbabalay-balay basi mangaro hin pagkaon ngan sugad nga kabalyo ig-aampo nira an mga patay.” Nagdadara hira hin “singkamas nga may kandila ha sulod, ngan an kandila nagrirepresentar hin espiritu nga diri nakakagawas ha purgatoryo.” (Halloween—From Pagan Ritual to Party Night) An pipira nga mga reperensya nasiring nga ini nga mga lampara gin-gagamit basi diri makadaop an magraot nga espiritu. Ha ika-18 ka siglo, ha North America, an mga singkamas ginbalyoan hin mga karubasa kay damu ito ngan madali tanggalon an sulod ngan ukitan.

 Oo. Bisan kon para ha pipira an Halloween diri nakakadaot nga selebrasyon, an ginbubuhat han mga tawo ha pagselebrar han Halloween diri uyon ha ginsisiring han Biblia. An Halloween iginbasar ha sayop nga gintotoohan parte ha patay ngan diri nakikita nga mga espiritu, o mga demonyo.

 Pansina an masunod nga mga teksto nga nagpapakita kon ano an panhunahuna han Dios ha mga gintotoohan nga konektado ha Halloween:

•   “Diri gud dapat magkaada bisan hin-o dida ha iyo nga . . . nakonsulta ha mga multo o mga espiritu, o nasangpit han mga minatay.”—Deuteronomio 18:10-12, The Jerusalem Bible.

   Karuyag sidngon: Diri gin-uuyonan han Dios an pakig-istorya ha patay o bisan an pagpakunokuno nga nakaistorya mo an mga patay.

•   “An mga patay diri maaram han bisan ano.”—Eclesiastes 9:5.

   Karuyag sidngon: Tungod kay an mga patay diri maaram han bisan ano, diri nira makakaistorya an mga buhi.

•   “[Diri kamo makipag-arangbit] ha mga yawa. Diri kamo sadang makainom ha tagayan han Dios, ngan ha tagayan han mga yawa.”—1 Corinto 10:20, 21, An Baraan nga Kasuratan.

   Karuyag sidngon: An mga naruruyag uyonan han Dios kinahanglan maglikay ha bisan ano nga may kalabotan ha mga demonyo.

•   “[Tindog] hin marig-on kontra ha tuso nga mga buhat han Yawa; kay may pakig-away kita . . . kontra ha pwersa han magraot nga mga espiritu.”—Efeso 6:11, 12.

   Karuyag sidngon: Dapat kontrahon han mga Kristiano an mga pwersa han maraot nga espiritu, ngan diri gumios nga sugad hin nagkakalipay kaupod nira.