Kay Ano nga hi Jesus Gintatawag nga Anak han Dios?

An Baton han Biblia

Ha Biblia, hi Jesus agsob tawagon nga “an Anak han Dios.” (Juan 1:49) An mga pulong nga “Anak han Dios” nagpapakita nga an Dios amo an Maglalarang, o gintitikangan, han ngatanan nga kinabuhi, upod na an kinabuhi ni Jesus. (Salmo 36:9; Pahayag 4:11) Diri igintututdo han Biblia nga literal nga nagkaanak an Dios pariho ha mga tawo.

Gintatawag gihap han Biblia an mga anghel nga “mga anak han tinuod nga Dios.” (Job 1:6) Ngan an Biblia nasiring nga an siyahan nga tawo nga hi Adan, “anak han Dios.” (Lucas 3:38) Pero tungod kay hi Jesus an siyahan nga ginlarang han Dios ngan hiya la an direkta niya nga ginlarang, an Biblia nasiring nga hi Jesus an suhag nga Anak han Dios.

Nabuhi ba hi Jesus ha langit antes hiya matawo dinhi ha tuna?

Ano an ginbubuhat ni Jesus antes hiya kumanhi ha tuna?

Nabuhi ba hi Jesus ha langit antes hiya matawo dinhi ha tuna?

Oo. Hi Jesus usa nga espiritu nga linarang ha langit antes hiya matawo dinhi ha tuna. Hi Jesus mismo nagsiring: “Linusad ako tikang ha langit.”—Juan 6:38; 8:23.

Ginlarang han Dios hi Jesus antes niya larangon an iba nga butang. Mahitungod kan Jesus, an Biblia nasiring:

● “Hiya . . . an suhag han ngatanan nga linarang.”—Colosas 1:15.

● Hiya “an tinikangan han paglarang han Dios.”—Pahayag 3:14.

Gintuman ni Jesus an tagna mahitungod ha usa “nga an gintikangan ha kadaan pa nga mga panahon, tikang ha mga adlaw ha nag-agi nga mga panahon.”—Micas 5:2; Mateo 2:4-6.

Ano an ginbubuhat ni Jesus antes hiya kumanhi ha tuna?

May-ada hiya hitaas nga posisyon ha langit. Ini nga posisyon an gintutudlok ni Jesus han nag-ampo hiya: “Amay, himayaa ako . . . sugad han akon himaya hadto han kaupod mo ako antes pa umeksister an kalibotan.”—Juan 17:5.

Ginbuligan niya an iya Amay ha paglarang han ngatanan nga iba pa nga butang. Hi Jesus nagbuhat kaupod han Dios “sugad nga eksperto nga magburuhat.” (Proberbios 8:30) Mahitungod kan Jesus, an Biblia nasiring: “Pinaagi ha iya ginlarang an ngatanan nga iba pa nga butang ha langit ngan ha tuna.”—Colosas 1:16.

Gin-gamit han Dios hi Jesus basi larangon an ngatanan nga iba pa nga linarang. Kaupod hini an mga anghel, sugad man an pisikal nga uniberso. (Pahayag 5:11) Maipapariho naton ini nga pagbinuligay han Dios ngan ni Jesus ha usa nga arkitekto nga nagtatrabaho kaupod han usa nga endyinir. An arkitekto an naghihimo han disenyo ngan an endyinir naman an nagtutukod hito.

Nag-alagad hiya sugad nga an Pulong. Kon naghihisgot an Biblia han kinabuhi ni Jesus antes hiya magin tawo, gintatawag hiya hito sugad nga “an Pulong.” (Juan 1:1) Klaro nga nagpapasabot ini nga gin-gamit han Dios an iya Anak basi magpaabot hin mga impormasyon ngan instruksyon ha iba pa nga mga anghel.

Posible nga hi Jesus liwat an nagin Tagapagyakan han Dios ha mga tawo dinhi ha tuna. Posible nga hi Jesus, sugad nga an Pulong, an gin-gamit han Dios han naghatag hiya hin mga instruksyon kanda Adan ngan Eva ha garden han Eden. (Genesis 2:16, 17) Posible liwat nga hi Jesus an anghel nga naggiya ha mga Israelita hadto ha kamingawan ngan an iya tingog an kinahanglan nira sundon.—Exodo 23:20-23. a