Hi Jesus diri la basta maopay nga tawo. An tinuod, hiya an pinakamaimpluwensya nga tawo ha bug-os nga kasaysayan. Tagda an ginsiring mahitungod ha iya hinin kilala nga mga historyador ngan mga parasurat:

 “Hi Jesus nga taga-Nazaret . . . waray ruhaduha nga amo an pinakaprominente nga indibiduwal ha kasaysayan.”​—H. G. Wells, Ingles nga historyador.

 “An kinabuhi [ni Jesus] amo an may pinakadaku nga impluwensya hini nga planeta ngan nagtitikadaku pa an epekto hito.”​—Kenneth Scott Latourette, Amerikano nga historyador ngan awtor.

 Iginsasaysay han Biblia kon kay ano nga mas daku an impluwensya ni Jesus kay han bisan hin-o nga maopay nga tawo nga nabuhi. Han ginpakianhan ni Jesus an iya pinakaduok nga mga sumurunod kon hin-o hiya para ha ira, usa ha ira an naghatag han tama nga baton: “Ikaw an Kristo, an Anak han buhi nga Dios.”​—Mateo 16:16.