Kaburut-on han Dios nga makilala mo hiya sugad nga Persona, magin duok ha iya, ngan higugmaon ngan singbahon hiya ha imo bug-os nga kasingkasing. (Mateo 22:37, 38; Santiago 4:8) Mahibabaro ka kon paonan-o bubuhaton an kaburut-on han Dios pinaagi ha pag-aram han kinabuhi ngan katutdoan ni Jesus. (Juan 7:16, 17) Hi Jesus waray la basta magyakan kon ano an kaburut-on han Dios, ginbuhat niya ito. Ngani, nagsiring hiya nga an iya katuyoan ha kinabuhi amo an pagbuhat ‘diri han akon kalugaringon nga kaburut-on, kondi han kaburut-on niya nga nagsugo ha akon.’​—Juan 6:38.

Kinahanglan ko ba hin espesyal nga tigaman o bisyon basi mahibaroan an kaburut-on han Dios para ha akon?

 Diri, kay aada na ha Biblia an mensahe han Dios para ha mga tawo. Mababasa dida hito an imo kinahanglan basi “magin andam gud ha tagsa nga maopay nga buhat.” (2 Timoteo 3:16, 17) Karuyag han Dios nga gamiton mo an Biblia pati an imo “abilidad ha pangatadongan” basi hibaroan an iya kaburut-on para ha imo.​—Roma 12:1, 2; Efeso 5:17.

Kaya ko gud ba buhaton an kaburut-on han Dios?

 Oo, kaya mo, kay an Biblia nasiring: “Diri gud makuri para ha aton an pagtuman han iya mga sugo.” (1 Juan 5:3, Maupay nga Sumat) Diri ito nagpapasabot nga pirme masayon an pagsunod han mga sugo han Dios. Pero kon bubuhaton mo ito, bawi an imo mga sakripisyo. Hi Jesus mismo nagsiring: “Malipayon an mga namamati ha pulong han Dios ngan nagtutuman hito!”​—Lucas 11:28.