Oo. An Dios may pagpaid ha iya mga surugoon nga may sakit. May kalabotan ha usa nga matinumanon nga surugoon, an Biblia nasiring: “Bubuligan hiya ni Jehova dida ha iya higdaan samtang may sakit hiya.” (Salmo 41:3) Kon may-ada ka grabe nga sakit, ini nga tulo nga pamaagi makakabulig ha imo nga makaya ito:

1.   Pag-ampo para hin kusog nga makailob. Makakarawat mo “an kamurayawan han Dios nga labaw ha ngatanan nga pagsabot,” nga mabulig nga maibanan an imo kabaraka ngan makapadayon ka bisan makuri an imo kahimtang.​—Filipos 4:6, 7.

2.   Magin positibo. An Biblia nasiring: “Nakakapaupay han imo panlawas an pagkamalipayon. Mahinay nga kamatayon an dayuday nga pagkamasamdong.” (Darahonon [Proberbios] 17:22, Maupay nga Sumat) Ayaw pagin sobra kaseryoso, kay makakabulig ito nga maibanan an imo kasubo ngan makakaopay liwat ito ha imo kahimsog.

3.   Parig-ona an imo paglaom ha tiarabot. An marig-on nga paglaom makakabulig ha imo nga magin malipayon bisan may grabe ka nga sakit. (Roma 12:12) An Biblia nagtatagna nga maabot an panahon nga “waray residente nga masiring: ‘May sakit ako.’” (Isaias 33:24) Hito nga panahon, tatambalon han Dios an grabe nga mga sakit nga diri natatambal han syensya. Pananglitan, ini an siring han Biblia kon paonan-o an mga lagas magigin batan-on utro ngan mahimsog: “An iya unod magigin mas maopay kay ha kanan bata; mabalik hiya ha mga adlaw han iya kusog sugad nga batan-on.”​—Job 33:25.

 Tigamni: Bisan kon ginkikilala han mga Saksi ni Jehova an bulig nga igintatagana han Dios, nagpapadoktor liwat kami kon may grabe nga sakit. (Marcos 2:17) Pero diri kami nag-iendorso hin bisan ano nga pagtambal. Para ha amon, an kada tagsa an magdidesisyon para ha iya kahimsog.