An adulto nga mga anak may importante nga responsabilidad nga siguruhon nga naaataman an ira lagas na nga mga kag-anak. An Biblia nasiring nga an adulto nga mga anak kinahanglan “gumawi uyon ha ira relihiyon pinaagi ha pag-ataman han ira kalugaringon nga pamilya ngan pagbalos han ira mga kag-anak . . . , kay nakakapalipay ini ha Dios.” (1 Timoteo 5:4, New International Version) Kon ginsisiguro han adulto nga mga anak nga naaataman an ira lagas na nga mga kag-anak, ginsusunod liwat nira an sugo han Biblia nga pasidunggan an ira mga kag-anak.​—Efeso 6:2, 3.

 Waray espisipiko nga mga instruksyon ha Biblia kon paonan-o aatamanon an lagas na nga mga kag-anak. Pero may-ada ito mga ehemplo han may pagtoo nga kalalakin-an ngan kababayin-an hadto nga nagbuhat hito. Naghahatag liwat ito hin praktikal nga sagdon nga makakabulig ha mga nag-aataman han ira mga kag-anak.

•  Paonan-o gin-ataman han pipira nga membro han pamilya an ira lagas na nga mga kag-anak ha panahon han Biblia?

•  Ano nga praktikal nga sagdon tikang ha Biblia an makakabulig ha mga nag-aataman?

•  Nasiring ba an Biblia nga kinahanglan atamanon ha balay an lagas na nga mga kag-anak?

 Ginbuhat nira ito ha iba-iba nga paagi, depende ha kahimtang.

•   Hi Jose naukoy hirayo ha iya lagas na nga tatay nga hi Jacob. Han nagkahigayon hi Jose, gin-areglar niya nga pabalhinon hi Jacob hirani ha iya. Katapos, gintaganahan niya an iya tatay hin balay, pagkaon, ngan ginproteksyonan hiya.​—Genesis 45:9-11; 47:11, 12.

•   Hi Ruth binalhin ngadto ha nasud han iya ugangan nga babaye ngan maduruto nga nagtrabaho basi maataman an iya ugangan.​—Ruth 1:16; 2:2, 17, 18, 23.

•   Han tikamatay na hi Jesus, nagpili hiya hin mag-aataman ha iya nanay nga hi Maria, nga hito nga panahon posible gud nga balo na.​—Juan 19:26, 27. a

 May mga prinsipyo ha Biblia nga makakabulig ha mga nag-aataman nga makaya an kakapoy ha pisikal ngan ha emosyonal, nga usahay inaabat nira samtang gin-aataman nira an ira lagas na nga mga kag-anak.

•   Pasidunggi an imo mga kag-anak.

   An ginsisiring han Biblia: “Pasidunggi an imo tatay ngan an imo nanay.”​—Exodo 20:12.

   Paonan-o maiaaplikar ini nga prinsipyo? Mapapasidunggan mo an imo mga kag-anak pinaagi ha pagtugot ha ira nga buhaton an mga butang nga kaya pa nira himoon. Tubtob nga posible, hira an padesisyona may kalabotan ha paagi han pag-ataman ha ira. Mapapasidunggan mo liwat hira pinaagi ha pagbuhat han imo makakaya basi buligan hira.

•   Magin masinabuton ngan mapinasayloon.

   An ginsisiring han Biblia: “An hilarom nga pagsabot han usa nga tawo nabulig ha iya nga diri masina dayon, ngan nakakapatahom ha iya an pagpalabay hin sayop.”​—Proberbios 19:11.

   Paonan-o maiaaplikar ini nga prinsipyo? Kon an usa nga lagas na nga kag-anak may nayayakan nga diri maopay o baga hin diri niya gin-aapresyar an imo pag-ataman ha iya, pakianhi an imo kalugaringon, ‘Ano an akon aabaton kon pariho ako ha iya nga may mga limitasyon na ngan diri na nahihimo an mga karuyag buhaton?’ Kon magigin masinabuton ngan mapinasayloon ka, malilikyan mo nga magin mas maraot pa an usa nga sitwasyon.

•   Konsultaha an iba.

   An ginsisiring han Biblia: “An mga plano napapakyas kon waray pagkonsultahay, pero may kalamposan ha damu nga magsaragdon.”​—Proberbios 15:22.

   Paonan-o maiaaplikar ini nga prinsipyo? Pagsaliksik may kalabotan ha mga problema ha kahimsog han imo mga kag-anak. Hibaroi kon ano nga mga bulig an iginhahatag han gobyerno ha iyo lugar. Pakiistorya ha iba nga may eksperyensya ha pag-ataman ha ira lagas na nga mga kag-anak. Kon may kabugtoan ka, mahimo kamo magkaada miting basi pag-istoryahan an mga panginahanglan han iyo mga kag-anak, kon paonan-o hira aatamanon, ngan kon paonan-o kamo magbabarabhin han mga buruhaton.

•   Magin mapainubsanon.

   An ginsisiring han Biblia: “An kinaadman aada ha mga mapainubsanon.”​—Proberbios 11:2.

   Paonan-o maiaaplikar ini nga prinsipyo? Akseptara an imo mga limitasyon. Pananglitan, limitado an panahon ngan kusog han kada tagsa. Nakadepende hini nga mga limitasyon an imo mahihimo para ha imo mga kag-anak. Kon nabubug-atan ka na ha mga buruhaton ha pag-ataman ha imo lagas na nga mga kag-anak, pangaro hin bulig ha imo mga kapamilya o ha mga nars o caregiver.

•   Atamana an imo kalugaringon.

   An ginsisiring han Biblia: “Waray pa tawo nga nangalas ha iya kalugaringon nga lawas, lugod iya ginpapakaon ngan ginmamayuyo ito.”​—Efeso 5:29.

   Paonan-o maiaaplikar ini nga prinsipyo? Bisan kon may responsabilidad ka nga atamanon an imo mga kag-anak, kinahanglan atamanon mo liwat an imo kalugaringon ngan an imo pamilya kon inasaw-an ka. Kinahanglan kumaon ka hin maopay. Kinahanglan magkaada ka eksakto nga pahuway ngan katurog. (Eclesiastes 4:6) Ngan kinahanglan mo magrelaks kon posible. Kon bubuhaton mo ito, magigin mas maopay an imo emosyonal, mental, ngan pisikal nga kahimsog, salit maaataman mo hin mas maopay an imo mga kag-anak.

 Waray espisipiko nga ginsisiring an Biblia kon kinahanglan ba nga ha balay la atamanon han adulto nga mga anak an ira mga kag-anak. Nagdesisyon an iba nga pamilya nga atamanon an ira lagas na nga mga kag-anak ha ira la balay tubtob nga posible. Pero may mga higayon nga bangin abaton nira nga mas makakaopay kon dadad-on hira ha nursing home. Mahimo mag-iristorya an pamilya basi magdesisyon kon ano gud an makakaopay ha ngatanan.​—Galacia 6:4, 5.