Hin-o hi Miguel nga Arkanghel?

An baton han Biblia

An Miguel, nga gintatawag han pipira nga relihiyon sugad nga “San Miguel,” matin-aw nga usa nga ngaran nga iginhatag kan Jesus antes ngan katapos han iya kinabuhi ha tuna. a Hi Miguel nakigdiskusyon kan Satanas katapos mamatay hi Moises, ngan ginbuligan niya an usa nga anghel basi maisumat kan propeta Daniel an mensahe han Dios. (Daniel 10:13, 21; Judas 9) Gintutuman ni Miguel an kahulogan han iya ngaran—“Hin-o an Pariho han Dios?”—pinaagi ha pagdepensa ha pagmando han Dios ngan pakig-away ha mga kaaway han Dios.—Daniel 12:1; Pahayag 12:7.

Tagda kon kay ano nga angayan gud an pagsiring nga hi Jesus an arkanghel nga hi Miguel.

● Hi Miguel an “arkanghel.” (Judas 9) An titulo nga “arkanghel,” nga nangangahulogan “lider han mga anghel,” mababasa ha duha la nga bersikulo ha Biblia. Hito nga duha nga bersikulo, ito nga pulong pariho singular, nga nagpapakita nga usa la nga anghel an may-ada hito nga titulo. An usa hito nga mga bersikulo nasiring nga an ginbanhaw nga Ginoo nga hi Jesus “malusad tikang ha langit ngan mababatian an iya pagsugo, nga an tingog kanan arkanghel.” (1 Tesalonica 4:16) An kan Jesus “tingog kanan arkanghel” kay hiya an arkanghel nga hi Miguel.

● Hi Miguel nangunguna ha kasundalohan nga mga anghel. “Hi Miguel ngan an iya mga anghel nakig-away ha dragon,” hi Satanas. (Pahayag 12:7) Hi Miguel may daku nga awtoridad ha lugar han mga espiritu kay gintatawag hiya nga “usa han nangunguna nga mga prinsipe” ngan “harangdon nga prinsipe.” (Daniel 10:13, 21; 12:1) Ini nga mga titulo nagpapakilala kan Miguel sugad nga “an punoan nga kumander han kasundalohan nga mga anghel,” sugad han ginsiring han eskolar han Bag-o nga Tugon nga hi David E. Aune.

An Biblia nag-uunabi hin usa pa nga ngaran han persona nga may awtoridad ha kasundalohan nga mga anghel. Iginhuhulagway hito an panahon nga “an Ginoo nga hi Jesus igpahayag na tikang ha langit upod an iya gamhanan nga mga anghel ha naglalaga nga kalayo, samtang nabulos hiya.” (2 Tesalonica 1:7, 8; Mateo 16:27) Hi Jesus “kinadto . . . ha langit, ngan an mga anghel ngan mga awtoridad ngan mga gahum iginpasakop ha iya.” (1 Pedro 3:21, 22) Diri magigin makatadunganon kon pipilion han Dios hi Jesus ngan hi Miguel sugad nga magkaribal nga mga kumander han baraan nga mga anghel. Lugod, mas makatadunganon nga hunahunaon nga ito nga duha nga ngaran, nga Jesus ngan Miguel, nagtutudlok ha usa la nga persona.

● Hi Miguel “matindog” ha “panahon han kasakitan” nga waray kapariho ha kasaysayan. (Daniel 12:1) Ha libro han Daniel, an pulong nga “matindog” kaurogan na nga ginagamit may kalabotan ha usa nga hadi nga nabuhat basi himoon an usa nga importante nga buruhaton. (Daniel 11:2-4, 21) Hi Jesu-Kristo nga iginpapakilala nga “An Pulong han Dios,” magios sugad nga “Hadi han mga hadi” basi bungkagon an ngatanan nga kaaway han Dios ngan proteksyonan an katawohan han Dios. (Pahayag 19:11-16) Bubuhaton niya ito ha panahon han “daku nga kasakitan nga waray pa mahitabo tikang ha tinikangan han kalibotan.”—Mateo 24:21, 42.