May marig-on nga basihan an mga eskolar nga tumoo nga hi Jesus nabuhi dinhi ha tuna. May kalabotan ha pag-unabi kan Jesus ngan ha siyahan nga mga Kristiano han mga historyador ha siyahan ngan ikaduha nga siglo, an Encyclopædia Britannica, 2002 nga Edisyon, nasiring: “Inin iba-iba nga mga asoy nagpapamatuod nga ha kadaan nga panahon bisan an mga nakontra ha Kristianidad waray gud magruhaduha nga tinuod hi Jesus, nga ginkwestyon ha siyahan nga higayon nga waray igo nga basihan ha kataposan han ika-18, durante han ika-19, ngan ha tinikangan han ika-20 ka siglo.”

 Han 2006, an libro nga Jesus and Archaeology nagsiring: “Waray respetado nga eskolar yana an nagkukwestyon nga nabuhi an usa nga Judio nga gintatawag nga Jesus nga anak ni Jose; an kadam-an naabuyon nga damu na an aton hinbabaroan yana mahitungod han iya mga ginbuhat ngan han iya nangunguna nga mga katutdoan.”

 Iginhuhulagway han Biblia nga hi Jesus tinuod nga persona. Iginsusumat hito an mga ngaran han iya mga kaapoy-apoyan ngan mga kapamilya. (Mateo 1:1; 13:55) Iginsusumat liwat hito an mga ngaran han kilala nga mga magmarando ha panahon ni Jesus. (Lucas 3:1, 2) Ito nga mga detalye nakakabulig ha mga parasaliksik nga makompirma nga tinuod an mga asoy han Biblia.