An makaharadlok nga mga balita pirme makikita ha TV, celfon, tablet, ngan kompyuter. Ngan kasagaran, may upod ito nga detalyado nga mga video.

 Ngan nakikita ito han mga bata.

 Paonan-o mo mabubuligan an imo mga anak nga diri duro nga maapektohan han makaharadlok nga mga balita?

•  Ano an epekto han mga balita ha mga bata?

•  Paonan-o mo mabubuligan an imo mga anak nga diri sobra nga mabaraka ha mga balita nga iya nakikita?

•  Ano man kon an imo anak aktuwal nga nakakita hin trahedya?

•   Damu nga kabataan an nasusubo ha mga trahedya nga ira nakikita ha mga balita. May mga kabataan nga bangin diri nagsusumat han ira inaabat, pero bangin duro na ngay-an hira nga naaapektohan han makaharadlok nga mga balita. a Bangin mas mabaraka pa hira kon makita nira nga nababaraka liwat an ira kag-anak.

•   Mahimo magin sayop an pagkaintindi han mga bata han ira nakikita ha balita. Pananglitan, an iba naghuhunahuna nga an ira nakikita mahitatabo liwat ha ira pamilya. Ngan an mga bata nga pauroutro nga nakakakita hin video han makaharadlok nga panhitabo posible maghunahuna nga pauroutro ito nga nahitatabo.

•   Bangin diri masabtan han mga bata nga danay pinasobrahan la an balita. Bangin diri nira masabtan nga an mga news agency mga negosyo nga nakakaganansya kon damu an nagkikita o namamati. Salit, an usa nga balita mahimo pasobrahan basi maengganyo an mga tawo nga padayon nga magkita o mamati.

•   Limitahi an ira pagkita ha makaharadlok nga mga balita. Diri ini nagpapasabot nga diri na nira kinahanglan mahibaro ha kon ano an nahitatabo ha kalibotan. Pero diri makakaopay ha ira kon pirme hira magkikinita o magpipinamati hin makaharadlok nga mga balita.

   “Danay detalyado nga gin-iiristoryahan namon an usa nga balita, ngan diri namon napapansin nga duro na ngay-an nga nababaraka an amon mga anak ha ira nababatian ha amon.”—Maria.

   Prinsipyo ha Biblia: “An pagkabaraka nakakabug-at han kasingkasing han tawo.”—Darahunon [Proberbios] 12:25, An Baraan nga Biblia.

•   Pamati hin mapailubon, ngan pagpakita hin empatiya. Kon nakukurian an imo anak ha pag-istorya parte han nahitabo, puydi mo ito ipadrowing ha iya. Hisguti an mga nababarak-an han imo anak gamit an mga pulong nga maiintindihan niya, pero likyi nga ig-istorya an mga detalye nga diri na kinahanglan.

   “Baga hin nag-oopay an pag-abat han amon anak katapos namon pamatian an iya mga ginkakabarak-an. Pero diri nakakabulig ha iya kon sisidngan la namon hiya, ‘Normal la ito yana, dapat mahiara na kita hito.’”—Sarahi.

   Prinsipyo ha Biblia: “Magin alisto ha pagpamati, mahinay ha pagyakan.”—Santiago 1:19.

•   Buligi an imo anak nga magkaada husto nga panhunahuna ha mga balita. Pananglitan, an usa nga balita parte ha pagkidnap bangin hunahunaon han imo anak nga pirme ito nahitatabo bisan kon ha pagkatinuod diri man. Isaysay ha imo mga anak an imo mga ginbubuhat basi masiguro nga talwas hira. Hinumdumi liwat nga an usa nga trahedya kaurogan na nga iginbabalita tungod kay talagsa la ito mahitabo.

   “Buligi an imo mga anak nga diri sobra nga magkinabaraka. Kasagaran na nga nagkikinabaraka an usa kon naghihinunahuna hiya hin negatibo. Salit kon bubuligan naton an aton mga anak nga magpokus ha positibo nga mga butang, mabulig ito ha ira nga diri na magkinabaraka.”—Lourdes.

   Prinsipyo ha Biblia: “An kasingkasing han matadong nga tawo naghahatag ha iya baba hin hilarom nga pagsabot ngan nagdudugang han pagin makakombinse han iya panyakan.”—Proberbios 16:23.