•   Karuyag mo aksyon dayon; an imo padis karuyag nga planado an ngatanan.

•   Hilumon ka ngan diri makitawo; an imo padis maistoryahon ngan makisangkayon.

 An imo ba padis may batasan nga nakakaaringit ha imo? An pagpokus hito makakadaot ha iyo pag-asawa. Ngani, an Biblia nasiring nga “an tawo nga pauroutro nga nag-iinistorya mahitungod han usa nga butang nagbubulag han duok nga magsarangkay.”—Proberbios 17:9.

 Imbes nga tugotan nga magin problema niyo nga mag-asawa an usa nga nakakaaringit nga batasan, bangin puydi mo ito kitaon ha positibo nga paagi.

Hini nga artikulo

•  Positibo nga paagi han pagkita ha nakakaaringit nga batasan

•  An ginsisiring han iba nga mag-asawa

•  Giya ha iyo pag-istorya

 An batasan han imo padis nga nakakaaringit ha imo bangin konektado ha kalidad nga imo naruruyagan. Pansina an tulo nga ehemplo:

 “Kasagaran it akon bana mahinay mag-asikaso ha mga butang o kon may lakat kami maiha mangandam. Pero tungod hito pasensyoso hiya—bisan ha akon. Danay an iya pagin mahinay nakakaaringit, pero usa liwat ito nga rason nga naruyagan ko hiya.”—Chelsea.

 “It akon asawa detalyado gud kon magplano; karuyag niya nga nakaplano gud an ngatanan nga butang ngan nakakaaringit ito. Pero tungod han iya pagin metikuloso, waray gud kami nababayaan.”—Christopher.

 “An akon bana baga hin waray la labot ha mga butang ngan nakakaaringit ito. Pero an iya pagin diri madali mataranta, usa han mga kalidad nga naruyagan ko ha iya. Nalilipay gud ako nga nagpapabilin hiya nga kalmado bisan ha nakakaistres nga sitwasyon.”—Danielle.

 Sugad han nahibaroan nira Chelsea, Christopher, ngan Danielle, an usa nga batasan nga nakakapaaringit ngan naruruyagan mo ha imo padis, kasagaran nga iba-iba la nga bahin han usa nga kalidad. Salit kon tatanggalon mo ito nga kaluyahan, mawawara liwat an maopay nga kalidad, sugad la nga diri mo mailalabog an usa la nga bahin han sinselyo.

 Syempre, may pipira nga batasan nga waray positibo nga bahin. Pananglitan, an Biblia nasiring nga may mga “tawo nga masisinahon.” (Proberbios 29:22) Salit kinahanglan pangalimbasogan han usa nga bayaan “an ngatanan nga klase hin pagdumot, kasina, kapungot, pagsinggit, ngan nakakadaot nga panyakan.” a—Efeso 4:31.

 Pero kon an batasan nakakaaringit la, sunda an sagdon han Biblia: “Padayon nga magpailob ha usa kag usa . . . bisan kon may hinungdan an bisan hin-o nga magreklamo.”—Colosas 3:13.

 Dugang pa, pangalimbasugi nga makita an positibo nga bahin han batasan—an bahin han batasan nga bangin amo ngani an rason nga naruyag ka ha imo padis. Hi Joseph nga usa nga bana nagsiring, “An pagpokus ha nakakaaringit nga batasan puropariho hin pagkita la ha matais nga bahin han diamante nga diri gin-aapresyar an kahusay hito.”

 Siyahan, puydi anay hunahunaon han kada tagsa ha iyo an masunod nga mga pakiana. Katapos, pag-istoryahi niyo an iyo mga baton.

•   An imo ba padis may-ada batasan nga ha imo pagkita may maraot nga epekto ha iyo pag-asawa? Kon may-ada, ano ito?

•   Ito ba nga batasan diri gud maopay, o nakakaaringit la?

•   May-ada ba positibo nga bahin hito nga batasan? Kon oo, ano ito, ngan kay ano nga gin-aapresyar mo ito nga bahin han personalidad han imo padis?