An iyo paggamit han teknolohiya mahimo magparig-on o magpaluya han iyo pag-asawa. Paonan-o ito nakakaapekto ha iyo pag-asawa?

•  An kinahanglan mo hibaroan

•  An imo puydi himoon

•  An ginsisiring han mga mag-asawa

•  An mahimo pag-istoryahan

•   An timbang nga paggamit han teknolohiya mahimo magparig-on han relasyon han mag-asawa. Pananglitan, ginagamit ito han pipira nga mag-asawa basi magkaada hira komunikasyon ha usa kag usa kon diri hira magkaupod.

   “Daku gud an nahihimo bisan an simple la nga teks nga ‘I love you’ o ‘I miss you.’”—Jonathan.

•   An diri timbang nga paggamit han teknolohiya mahimo magpaluya ha relasyon han mag-asawa. Pananglitan, may pipira nga pirme na la naggiginamit han ira gadyet, salit diri na nira naihahatag an panahon ngan atensyon nga para unta ha ira asawa.

   “Sigurado ako nga may mga panahon nga karuyag unta makiistorya ha akon an akon asawa, pero busy man ako ha akon celfon.”—Julissa.

•   May mga nasiring nga mahimo la gihapon magin maopay an ira pakiistorya ha ira asawa bisan kon busy hira ha ira gadyet. An sociologist nga hi Sherry Turkle nagsiring nga imposible ito. Bisan kon may mga tawo nga naghuhunahuna nga kaya nira pagdurunganon an trabaho, pero diri ito maopay nga batasan. Hiya nagsiring nga ha pagkamatuod, “diri nagigin de-kalidad an aton trabaho kon durungan naton ito nga ginbubuhat.” a

   “Nalilipay ako pakiistorya ha akon asawa, pero kon may iba hiya nga ginbubuhat, diri ako nag-i-enjoy. Kon nagamit hiya hin gadyet samtang kaistorya ako, inaabat ko nga baga hin okey la hiya bisan waray ako.”—Sarah.

 Hinumdumi: An paagi han imo paggamit han teknolohiya mahimo makabulig o makadaot han iyo pag-asawa.

 Magkaada mga prayoridad. An Biblia nasiring: ‘Siguroha niyo an mas importante nga mga butang.’ (Filipos 1:10) Pakianhi an imo kalugaringon, ‘Nauubos ba an amon panahon ngan atensyon nga para unta ha amon nga mag-asawa tungod ha amon pagginamit hin gadyet?’

 “Makasurubo makita an mag-asawa nga magkaupod nga nangangaon ha restawran pero busy ha ira mga celfon. Diri namon karuyag magin uripon ha amon gadyet ngan mahingalimtan an pinakaimportante—an amon relasyon ha usa kag usa.”—Matthew.

 Magkaada mga limitasyon. An Biblia nasiring: “Padayon nga magbantay hin maopay nga an iyo paglakat diri magin pariho han diri maaramon kondi pariho han maaramon nga mga tawo, nga ginagamit ha pinakamaopay nga paagi an iyo panahon.” (Efeso 5:15, 16) Pakianhi an imo kalugaringon, ‘Puydi ba ako mag-eskedyol kon san-o ko la babasahon ngan rireplayan an mga mensahe nga diri man emergency, imbes nga kitaon dayon an ngatanan nga mensahe nga naabot?’

 “Daku nga bulig ha akon kon ginsi-set ko an akon celfon ha silent mode ngan nagri-reply ako ha mga mensahe ha akon mas kombinyente nga panahon. Talagsa la an tawag, teks, o e-mail nga emergency gud ngan kinahanglan batunon dayon.”—Jonathan.

 Kon posible, ayaw pagdad-a an trabaho ha balay. An Biblia nasiring: “May itinanda nga panahon para ha tagsa nga butang.” (Eclesiastes 3:1) Pakianhi an imo kalugaringon: ‘Gintutugotan ko ba nga madisturbo an akon pamilya tungod ha akon pagginamit han akon gadyet kay nagtitrinabaho la gihapon ako ha balay? Kon oo, paonan-o hini naaapektohan an amon pag-asawa? Ano daw la an masisiring hini han akon asawa?’

 “Tungod han teknolohiya, puydi na naton mahimo an aton trabaho ha bisan ano nga oras. Ginlilikyan ko gud nga pirme kitaon an akon celfon ngan asikasuhon an bisan ano nga may kalabotan ha akon trabaho kon upod ko an akon asawa.”—Matthew.

 Pag-istoryahi niyo nga mag-asawa an iyo paggamit hin gadyet. An Biblia nasiring: “An kada tagsa padayon nga mangalimbasog diri para ha iya kalugaringon nga kaopayan, kondi para ha kaopayan han iba nga tawo.” (1 Corinto 10:24) Pag-istoryahi niyo kon paonan-o an kada tagsa ha iyo nagamit hin gadyet, ngan kon ano an angay niyo himoon nga mga pagbag-o, kon may-ada man. Puydi niyo gamiton an kahon nga an mahimo pag-istoryahan hini nga artikulo.

 “Kami nga mag-asawa tangkod gud ha usa kag usa, ngan diri kami nag-aalang pagyakan kon napapansin namon nga an usa ha amon nasusobrahan na an pagginamit hin celfon o tablet. Maaram kami nga puydi ini magin hinungdan hin problema, salit ginpapamatian namon an opinyon han kada tagsa.”—Danielle.

 Hinumdumi: Siguroha nga ikaw an may kontrol ha imo gadyet, imbes nga ikaw an ginkukontrol hito.