An mag-asawa diri magigin malipayon kon hira nga duha nagsususpetsa ngan waray pagsarig ha usa kag usa. Salit paonan-o mo malilikyan an diri angayan nga pagselos?

Hini nga artikulo

•  Ano an selos?

•  Ano an mga hinungdan han diri angayan nga pagselos?

•  Paonan-o mo makukontrol an imo pagselos?

•  Kon nagsiselos an imo padis

•  An puydi niyo pag-istoryahan

 Ano an selos?

 An pulong nga “selos” may iba-iba nga kahulogan. Hini nga artikulo, nagtutudlok ito ha aton inaabat, kon ha aton paghunahuna, may usa nga nagpapakita hin romantiko nga interes ha aton padis o an aton padis an nagpapakita hin romantiko nga interes ha iba. Bangin abaton naton nga namimilegro an aton pag-asawa. Kon ito gud an sitwasyon, normal la ngan angayan an pagselos. Kay kon huhunahunaon, an pag-asawa an pinakaduok nga relasyon han duha nga tawo, ngan dapat la nga buhaton nira an ngatanan nira nga mahihimo basi maprotektaran ito.

 Prinsipyo ha Biblia: “Diri na hira duha, kondi usa nga unod. . . . An gintampo han Dios diri pagbulagon han bisan hin-o nga tawo.”—Mateo 19:6.

 “Kon namimilegro an iyo pag-asawa, an pagselos mahimo ipariho ha usa nga smoke detector nga nag-aalerto ha imo ha peligro ngan nag-aaghat ha imo nga gumios.”—Benjamin.

 Pero, an diri angayan nga pagselos resulta han waray basihan nga pagsuspetsa ngan kahadlok. Kon hinigugma gud naton an aton padis, lilikyan naton an sugad nga nakakadaot nga pagselos. (1 Corinto 13:4, 7) Hi Dr. Robert L. Leahy nagsurat: “An mga buhat nga resulta [han waray basihan nga pagselos] mahimo makadaot han relasyon mismo nga karuyag mo protektahan.” a

 Ano an mga hinungdan han diri angayan nga pagselos?

 Bangin naabat ka hin diri angayan nga pagselos tungod kay an imo asawa hadto waray magin maunungon ha imo. O bangin nagbulag an imo mga kag-anak tungod han diri pagin maunungon ngan nababaraka ka nga ito liwat an mahitabo ha iyo.

 “Han bata pa ako, hi Papa waray magin maunungon kan Mama, salit makuri gud ha akon an pagtapod ha iba. Waray ko gud ito hingalimti, salit usahay nakukurian ako pagtapod ha akon bana.”—Melissa.

 Usa pa nga hinungdan: Kon insecure ka, bangin nagsususpetsa ka dayon nga gindadaot han iba an iyo pag-asawa. Bangin ngani hunahunaon mo nga kon may higayon, babayaan ka han imo padis ngan maupod ha iba.

 “Ginhangyo an akon bana nga magin abay ha kasal han iya sangkay, ngan syempre, ipapadis hiya hin abay nga babaye. Waray gud ako umayon hito. Ginpirit ko hiya nga dumiri.”—Naomi.

 Iba-iba an kustomre han kasal, ngan an mga Kristiano kinahanglan magpagiya han mga prinsipyo ha Biblia. Husto ba an ginbuhat ni Naomi hito nga okasyon? Kon ginhihinumdom niya ito yana, inaabat niya nga waray hiya rason para magselos. Hiya nagsiring: “Na-insecure gud ako hito nga panahon. Kahuna ko, ginkukompara ako han akon bana ha iba nga babaye, pero imahinasyon ko la ngay-an adto.”

 Anoman an hinungdan, tungod han diri angayan nga pagselos, bangin pagsuspetsahan ngan sayop nga akusaran mo pa ngani an imo padis nga diri hiya matinumanon. Ito nga mga pag-abat magriresulta hin mga problema nga makakadaot ha iyo pag-asawa ngan posible pa ngani ha imo kahimsog.

 Prinsipyo ha Biblia: “An pangabugho sugad hin kanser.”—Darahonon [Proberbios] 14:30, Maupay nga sumat.

 Paonan-o mo makukontrol an imo pagselos?

 Parig-ona an imo pagtapod. Imbes mamiling hin sinyales nga diri nagigin maunungon an imo padis, hunahunaa an iya mga ginbuhat nga tungod hito natapod ka ha iya.

 “Ginhuhunahuna ko an mag-opay nga kalidad han akon bana. Kon naghahatag hiya hin atensyon ha iba, tungod ito kay interesado hiya ha ira kaopayan ngan diri ha sayop nga motibo. Kinahanglan pahinumdoman ko an akon kalugaringon nga an diri malampuson nga pag-asawa han akon mga kag-anak, diri nangangahulogan nga ito liwat an mahitatabo ha akon pag-asawa.”—Melissa.

 Ayaw hunahunaa nga tama an imo suspetsa. Hi Dr. Leahy nga gin-unabi kanina nagsurat: “Kasagaran nga ginhuhunahuna naton nga tama an aton mga suspetsa. Ngan tungod kay kombinsido kita hito, ginhihimo naton ito nga ebidensya. Pero bisan kon kombinsido kita ha usa nga butang, diri ito nagpapasabot nga tinuod ito, ngan diri ito puydi himoon nga ebidensya.” b

 “Kon gintatagan naton hin kahulogan an tagsa nga sitwasyon ngan nagsususpetsa dayon, naghihimo la kita hin problema ha aton pag-asawa.”—Nadine.

 Ipakiistorya an imo mga kabaraka. Anoman an hinungdan han imo pagselos, ig-istorya ha imo padis an imo mga ginkakabarak-an basi magsabot kamo han puydi ngan diri puydi niyo buhaton basi malikyan an pagselos.

 “Ha iyo pag-istorya, hunahunaa nga diri karuyag han imo padis nga masakitan ka ngan karuyag liwat niya makahimo hin mag-opay nga desisyon. Hunahunaa nga maopay an intensyon han imo padis. Bangin duro ka la kasensitibo ngan naglalaom hin sobra. O bangin diri maaram an imo padis nga diri niya naihahatag an atensyon nga imo ginkikinahanglan.”—Ciara.

 Prinsipyo ha Biblia: “An kada tagsa padayon nga mangalimbasog diri para ha iya kalugaringon nga kaopayan, kondi para ha kaopayan han iba nga tawo.”—1 Corinto 10:24.