2 Tesalonica 3:1-18
3 Ha kataposan mga kabugtoan, ig-ampo kami pirme, basi an pulong ni Jehova padayon nga maipasamwak hin madagmit ngan mapasidunggan, sugad la han iyo ginhihimo,
2 ngan basi makatalwas kami ha magraot gud nga mga tawo, kay diri ngatanan nga tawo may pagtoo.
3 Pero an Ginoo matinumanon, salit paririg-unon ngan papanalipdan kamo niya tikang ha usa nga maraot.
4 Dugang pa, sugad nga mga sumurunod han Ginoo, nasarig kami nga ginsusunod niyo ngan padayon nga tutumanon an amon mga instruksyon.
5 Hinaot padayon nga giyahan han Ginoo an iyo mga kasingkasing ha husto nga direksyon nga higugmaon an Dios ngan magpailob para ha Kristo.
6 Yana mga kabugtoan, ha ngaran han Ginoo nga hi Jesu-Kristo, gintatagan namon kamo hin mga instruksyon nga maglikay kamo ha tagsa nga bugto nga nagpipinasaway ngan diri nasunod ha tradisyon nga iyo nakarawat tikang ha amon.
7 Kamo mismo maaram kon paonan-o kamo magsusubad ha amon, kay waray kami magpinasaway ha iyo,
8 waray liwat kami kumaon hin pagkaon han bisan hin-o nga waray namon bayari. Lugod, pinaagi han maduruto nga pagtrabaho ngan pagbudlay nagtrabaho kami ha adlaw ngan gab-i basi diri makapabug-at ha pinansyal ha bisan hin-o ha iyo.
9 Diri nga waray kami awtoridad, kondi basi magin ehemplo kami nga angay niyo subaron.
10 Ha pagkamatuod, han kaupod pa kami niyo, ini an amon iginsugo ha iyo: “Kon may nadiri pagtrabaho, ayaw liwat hiya pakaona.”
11 Hinbatian namon nga may mga nagpipinasaway dida ha iyo nga diri gud nagtatrabaho, lugod nagpipinanlabot han mga butang nga waray hira labot.
12 Ha ngaran han Ginoo nga hi Jesu-Kristo, ginsusugo ngan ginsasagdonan namon an sugad nga mga tawo nga sadang hira magtrabaho nga diri nakakadisturbo ngan kumaon han pagkaon nga ira natigayon.
13 Mga kabugtoan, ayaw kamo pag-undang ha pagbuhat han maopay.
14 Kon may diri mamati han amon ginsisiring dinhi hini nga surat, tigamni niyo hiya, ngan ayaw na pakig-upod ha iya basi maawod hiya.
15 Pero ayaw hiya tagda nga kaaway, lugod padayon nga sagdoni hiya sugad nga bugto.
16 Hinaot an Ginoo han kamurayawan maghatag pirme ha iyo hin kamurayawan ha ngatanan nga iyo ginbubuhat. An Ginoo umupod unta ha iyo ngatanan.
17 Ako, hi Pablo, ako mismo an nagsusurat hini nga pangumusta. Ini nga agi an pangirilal-an han ngatanan ko nga surat. Sugad hini ako magsurat.
18 Makarawat unta niyo ngatanan an diri-matupngan nga pagkabuotan han aton Ginoo nga hi Jesu-Kristo.
