Mateo 15:1-39
15 May mga Pariseo ngan mga eskriba tikang ha Jerusalem nga kinadto kan Jesus ngan nagsiring:
2 “Kay ano nga diri ginsusunod han imo mga disipulo an tradisyon han mga tawo ha kadaan nga panahon? Pananglitan, diri hira nanhuhunaw antes kumaon.”
3 Binaton hiya: “Kay ano nga diri liwat niyo ginsusunod an sugo han Dios tungod han iyo tradisyon?
4 Pananglitan, an Dios nagsiring, ‘Pasidunggi an imo tatay ngan an imo nanay,’ ngan ‘An nagyayakan hin maraot ha iya tatay o nanay, papatayon.’
5 Pero nasiring kamo, ‘An bisan hin-o nga nasiring ha iya tatay o nanay: “Bisan ano nga gintatag-iya ko nga posible mapahimulsan mo iginhalad ko na ha Dios sugad nga regalo,”
6 diri na niya kinahanglan pasidunggan an iya tatay.’ Salit ginbalewaray niyo an pulong han Dios tungod han iyo tradisyon.
7 Mga hipokrito, husto gud an igintagna ni Isaias mahitungod ha iyo han hiya nagsiring:
8 ‘Ini nga mga tawo nagpapasidungog ha akon pinaagi han ira mga im-im, pero an ira kasingkasing hirayo gud ha akon.
9 Waray pulos an ira padayon nga pagsingba ha akon, kay ira igintututdo an mga sugo han mga tawo sugad nga mga doktrina.’ ”
10 Salit iya ginpadaop an mga tawo ngan ginsidngan hira: “Pamati ngan sabota niyo an kahulogan hini:
11 An nakakahugaw han tawo diri an nasulod ha iya baba, kondi an nagawas tikang hito.”
12 Katapos, dinaop ha iya an mga disipulo ngan nagsiring: “Maaram ka ba nga nasina* an mga Pariseo ha imo ginsiring?”
13 Binaton hiya: “An tagsa nga tanom nga waray igtanom han akon langitnon nga Amay, gagabuton.
14 Pabay-i hira. Mga buta hira nga paratugway. Kon buta an nagtutugway ha igkasi-buta, hira nga duha mahuhulog ha buho.”
15 Hi Pedro siniring ha iya: “Ipatin-aw ha amon ito nga ilustrasyon.”
16 Salit hi Jesus nagsiring: “Waray ba liwat kamo makasabot?
17 Diri ba kamo maaram nga an ngatanan nga nasulod ha baba naagi ha tiyan ngan nagawas ha lawas?
18 Pero an nagawas ha baba nagtitikang ha kasingkasing, ngan ito an nakakahugaw ha tawo.
19 Pananglitan, nagtitikang ha kasingkasing an maraot nga pangatadongan, pagpatay, pag-adulteryo, imoralidad, pangawat, pagtestigo hin buwa, ngan pagpasipara.
20 Ini nga mga buhat an nakakahugaw ha tawo, pero an diri paghunaw antes kumaon diri nakakahugaw ha iya.”
21 Pagbaya ni Jesus didto, kinadto hiya ha lugar han Tiro ngan Sidon.
22 Ngan tikang hito nga mga lugar may babaye nga taga-Fenicia nga ginawas ngan nagsinggit: “Kalooyi ako, Ginoo nga Anak ni David. An akon anak nga babaye ginsaniban hin demonyo ngan ginpapakurian hiya.”
23 Pero waray bumaton hi Jesus ha iya. Salit an mga disipulo dinaop ha iya ngan naghangyo: “Paiwasa hiya, kay nagsisinunod hiya ha aton nga nagsisininggit.”
24 Hi Jesus nagsiring: “Ginpakanhi ako diri para ha bisan hin-o kondi para ha nagkawawara nga mga karnero ha panimalay han Israel.”
25 Pagdaop han babaye kan Jesus, yinukbo hiya ngan nagsiring: “Ginoo, buligi ako!”
26 Hi Jesus siniring: “Diri angay kuhaon an tinapay han kabataan ngan ig-itsa ito ha gudtiay nga kaayaman.”
27 Nagsiring an babaye: “Oo, Ginoo. Pero an gudtiay nga kaayaman nakaon han nahuhulog nga mga pagkaon tikang ha lamesa han ira mga agaron.”
28 Ngan hi Jesus nagsiring ha iya: “O Babaye, daku gud an imo pagtoo; matuman unta an imo karuyag.” Tikang hito nga oras, nag-opay an iya anak.
29 Pagbaya ni Jesus didto, kinadto hiya hirani ha Dagat han Galilea, katapos sinagka hiya ha bukid ngan nagliningkod didto.
30 Ngan kinadto ha iya an damu nga tawo, upod an mga piay, baldado, buta, ngula, ngan damu nga iba pa nga may sakit, ngan gindara dayon hira hirani ha iya tiilan, ngan gintambal hira.
31 Salit nahipausa an mga tawo han nakita nira nga an ngula nakakayakan na, an piay nakakalakat na, an buta nakakakita na, ngan gindayaw nira an Dios han Israel.
32 Katapos, gintawag ni Jesus an mga disipulo ngan siniring: “Nalolooy ako ha mga tawo, kay tulo ka adlaw na nga nag-iinupod hira ha akon ngan waray hira pagkaon. Diri ko karuyag nga palakton hira nga gutom kay bangin hira madismayo ha dalan.”
33 Pero an mga disipulo nagsiring ha iya: “Diin kita makakapalit hin supisyente nga tinapay dinhi hinin hirayo nga lugar basi makakaon an sugad hini kadamu nga tawo?”
34 Hi Jesus siniring: “Pira nga tinapay an aada ha iyo?” Binaton hira: “Pito, ngan may pipira nga gudtiay nga isda.”
35 Katapos palingkuron ha tuna an mga tawo,
36 ginkuha niya an pito nga tinapay ngan an mga isda. Nag-ampo hiya ngan gintipik-tipik ito, ngan iginhatag ha mga disipulo, ngan ira ito ginpanhatag ha mga tawo.
37 Hira ngatanan nangaon ngan nabusog, ngan gintirok nira an nahisalin nga mga tipik nga nakapuno hin pito nga dagku nga basket.
38 An nangaon 4,000 nga kalalakin-an, labot han kababayin-an ngan kabataan.
39 Katapos niya palakton an mga tawo, sinakay hiya ha baluto ngan kinadto ha lugar han Magadan.
Mga footnote
^ Ha literal, “nahipakdol.”
