Mateo 18:1-35
18 Hito nga oras an mga disipulo dinaop kan Jesus ngan nagsiring: “Hin-o gud an may gidadakui nga awtoridad ha Ginhadian han langit?”
2 Gintawag niya an usa nga bata ngan ginpatindog ha butnga nira
3 ngan nagsiring: “Ha pagkamatuod, susumatan ko kamo nga diri kamo makakasulod ha Ginhadian han langit kon diri kamo magbag-o ngan magin pariho han kabataan.
4 Salit an bisan hin-o nga magpaubos pariho hini nga bata amo an may gidadakui nga awtoridad ha Ginhadian han langit.
5 Ngan an bisan hin-o nga nakarawat ha usa nga bata nga pariho hini tungod ha akon ngaran, nakarawat liwat ha akon.
6 Pero an bisan hin-o nga nakakapakdol ha usa hini nga mga ubos nga natoo ha akon, mas maopay pa nga bitayan an iya liog hin daku nga gilingan nga bato pariho ha ginbibirik han asno, ngan lunuron hiya ha lawod.
7 “Kairo han kalibotan tungod han mga hiparakdolan!* Oo, maabot gud an mga hiparakdolan, kondi kairo han tawo nga pinaagi ha iya naabot an mga hiparakdolan!
8 Salit kon an imo kamot o tiil nakakapakdol ha imo, utda ito ngan ilabog. Mas maopay pa nga pungkol ka o baldado nga makarawat han kinabuhi kay ha duha an imo kamot o tiil pero ilalabog ka ha kalayo nga waray kataposan.*
9 Sugad man, kon an imo mata nakakapakdol ha imo, lukata ito ngan ilabog. Mas maopay pa nga usa la an imo mata nga makarawat han kinabuhi kay ha duha an imo mata pero ilalabog ka ha naglalaga nga Gehenna.*
10 Ayaw gud niyo pagtamaya an usa hini nga mga ubos, kay susumatan ko kamo nga an ira mga anghel ha langit pirme aadto ha atubangan han akon Amay ha langit.
11 * ——
12 “Kon an usa nga tawo may 100 nga karnero ngan nawara an usa, ha iyo paghunahuna, diri ba niya babayaan an 99 ha kabukiran basi bilngon an usa nga nawawara?
13 Ngan kon hiagian niya ito, sigurado nga mas malilipay hiya hito kay ha 99 nga waray mawara.
14 Sugad man, diri karuyag han akon Amay ha langit nga mawara an bisan usa la hini nga mga ubos.
15 “Ngan kon an imo bugto nakasala, kadtoa hiya ngan isaysay an iya sayop* nga kamo la nga duha. Kon mamati hiya ha imo, nabuligan mo hiya nga buhaton an husto.
16 Pero kon diri hiya mamati, pag-upod hin usa o duha pa, basi an ngatanan nga ginsiring mapamatud-an han duha o tulo nga testigo.
17 Kon diri hiya mamati ha ira, isumat ha kongregasyon. Kon diri hiya mamati bisan ha kongregasyon, tagda hiya sugad nga tawo han mga nasud ngan sugad nga parasukot hin buhis.
18 “Ha pagkamatuod, susumatan ko kamo: Bisan ano nga iyo gapuson ha tuna, gin-gapos na ha langit, ngan bisan ano nga iyo badbaran ha tuna, ginbadbaran na ha langit.
19 Susumatan ko liwat kamo: Kon may duha ha iyo dinhi ha tuna nga magkauyon ha paghangyo hin bisan ano nga importante, ihahatag ito han akon Amay ha langit.
20 Tungod kay kon may duha o tulo nga nagkakatirok ha akon ngaran, aada ako ha butnga nira.”
21 Katapos, dinaop ha iya hi Pedro ngan nagsiring: “Ginoo, makapira ko papasayloon an akon bugto nga nakasala ha akon? Tubtob ha pito ka beses?”
22 Binaton hi Jesus: “Susumatan ko ikaw, diri la tubtob ha pito ka beses, kondi tubtob ha 77 ka beses.
23 “Kay an Ginhadian han langit pariho hin hadi nga karuyag makigtuhay ha iya mga uripon nga may utang ha iya.
24 Han nakikigtuhay na hiya ha ira, gindara ha iya an usa nga uripon nga nakautang hin 10,000 ka talanton.*
25 Pero tungod kay waray ibarayad ito nga uripon, nagsugo an hadi nga ibaligya hiya, an iya asawa, mga anak, ngan an ngatanan nga iya gintatag-iya basi makabayad.
26 Salit an uripon linuhod ngan yinukbo ha iya, ngan nagsiring, ‘Angan-angana ako, Agaron ko, babayaran ko ikaw han ngatanan ko nga utang.’
27 Tungod ha kalooy, ginsidngan han hadi ito nga uripon nga diri na kinahanglan bayaran an iya utang.
28 Kondi paggawas hito nga uripon, nakita niya an iya igkasi-uripon nga nakautang ha iya hin 100 ka denaryo. Iya dayon ginrabot hiya ngan gintiklo, nga nasiring, ‘Bayari ako han imo utang.’
29 Salit an iya igkasi-uripon linuhod ngan nakimalooy nga nasiring, ‘Angan-angana ako, bugto ko, babayaran ko gad ikaw.’
30 Pero waray hiya sumugot. Lugod, linakat hiya ngan iginpapriso an iya igkasi-uripon tubtob nga makabayad han utang.
31 Han nakita ito han iya mga igkasi-uripon, nasubo gud hira. Kinadto hira ha hadi ngan iginsumat an ngatanan nga nahitabo.
32 Katapos, iginpatawag hiya han hadi ngan ginsidngan: ‘Maraot nga uripon, waray ko ikaw pabayara han imo utang han nakimalooy ka ha akon.
33 Diri ba sadang ka liwat malooy ha imo igkasi-uripon, sugad la nga ginkaloy-an ko ikaw?’
34 Tungod hito, iginpapriso hiya han nangangalas nga hadi, tubtob nga mabayaran niya an ngatanan nga iya utang.
35 Sugad liwat hito an bubuhaton ha iyo han akon Amay ha langit kon diri niyo kinasingkasing nga pasayloon an iyo bugto.”
Mga footnote
^ O “hinungdan ha pagluya han pagtoo.” Kitaa an “Kahipakdol” ha Glossary.
^ Nangangahulogan ini hin dayon nga kabungkagan. Kitaa an “Gehenna” ha Apendise 9.
^ Kitaa an Apendise 9.
^ Kitaa an footnote ha Mat 17:21.
^ Ha literal, “ngan sawaya hiya.”
^ An 10,000 ka talanton han silber katugbang han 60,000,000 ka denaryo. Kitaa an Apendise 11.
