Mateo 7:1-29
7 “Ayaw na kamo paghukom basi diri kamo paghukman,
2 kay huhukman kamo sumala han iyo paghukom ha iba, ngan an suruklan nga iyo ginagamit ha iba, ito an gagamiton ha iyo.
3 Kay ano nga ginkikita mo an dagami ha mata han imo bugto pero diri mo ginpapanginano an daku nga kahoy* ha imo mata?
4 O paonan-o mo masisiring ha imo bugto, ‘Kukuhaon ko an dagami ha imo mata,’ nga ikaw mismo may daku nga kahoy ha imo mata?
5 Hipokrito! Kuhaa anay an daku nga kahoy ha imo mata, basi makakita ka hin maopay ha pagkuha han dagami ha mata han imo bugto.
6 “Ayaw ihatag an baraan nga butang ha mga ayam, o ayaw ilabog an iyo mga perlas ha mga baboy kay tatamaktamakan la ito, ngan aatakehon kamo nira.
7 “Padayon nga mangaro kay ihahatag ito ha iyo, padayon nga mamiling kay hiaagian ito niyo, padayon nga magtuktok kay aabrihan kamo.
8 Kay an bisan hin-o nga nangangaro may nakakarawat, an bisan hin-o nga namimiling nakakaagi, ngan an bisan hin-o nga nagtutuktok gin-aabrihan.
9 Ha pagkamatuod, hin-o ha iyo an mahatag hin bato ha iya anak kon mangaro hin tinapay?
10 O mahatag hin halas kon mangaro hin isda?
11 Salit kon kamo nga magraot maaram humatag ha iyo mga anak hin mag-opay nga regalo, labi na gud nga mahatag an iyo Amay ha langit hin mag-opay nga butang ha mga nangangaro ha iya!
12 “Salit, an ngatanan nga karuyag niyo buhaton ha iyo han mga tawo, buhata liwat niyo ha ira. Ha pagkamatuod, ini an iginpapasabot han Balaud ngan han sinurat han mga Propeta.
13 “Sulod ha haligot nga ganghaan, kay halapad ngan haluag an dalan tipakadto ha kabungkagan, ngan damu an naagi hito.
14 Kondi haligot an ganghaan ngan makuri an dalan tipakadto ha kinabuhi, ngan gutiay la an nakakatultol hito.
15 “Pagbantay ha buwa nga mga propeta nga nadaop ha iyo nga nagpapakurokarnero, pero ha pagkamatuod mapintas nga mga lobo.
16 Ha ira mga bunga makikilala niyo hira. Waray gud makukuha nga ubas tikang ha katunokan, o igos tikang ha kabanwaan, diri ba?
17 Sugad man, an maopay nga kahoy nagbubunga hin maopay, kondi an maraot nga kahoy nagbubunga hin waray pulos.
18 An maopay nga kahoy diri magbubunga hin waray pulos, ngan an maraot nga kahoy diri magbubunga hin maopay.
19 An kahoy nga diri nagbubunga hin maopay gin-uutod ngan iginlalabog ha kalayo.
20 Salit, makikilala gud niyo an sugad nga mga tawo pinaagi han ira mga bunga.
21 “Diri ngatanan nga nasiring ha akon, ‘Ginoo, Ginoo,’ makakasulod ha Ginhadian han langit, kondi an nagbubuhat la han kaburut-on han akon Amay ha langit.
22 Hito nga adlaw, damu an masiring ha akon: ‘Ginoo, Ginoo, diri ba nanagna kami ha imo ngaran, ngan nagpagawas hin mga demonyo ha imo ngaran, ngan nagbuhat hin damu nga gamhanan nga buhat ha imo ngaran?’
23 Pero masiring ako ha ira: Diri ako nakilala ha iyo! Iwas kamo, kamo nga matinalapason!
24 “Salit, an tagsa nga namamati han akon ginsisiring ngan nagbubuhat hito magigin pariho ha maaramon nga tawo nga nagtindog han iya balay ha bato.
25 Ngan ito nga balay gin-inuranan, ginbahaan, ngan ginbagyohan, kondi waray ito maruba, kay ha bato gintindog an pundasyon hito.
26 Sugad man, an bisan hin-o nga namamati han akon ginsisiring pero diri nagbubuhat hito maipapariho ha diri maaramon nga tawo, nga nagtukod han iya balay ha baras.
27 Ngan ito nga balay gin-inuranan, ginbahaan, ngan ginbagyohan, ngan narumpag ito.”
28 Katapos ni Jesus magyakan hini, nahipausa gud an mga tawo ha iya paagi han pagtutdo,
29 kay may awtoridad an iya pagtutdo ngan diri sugad han ira mga eskriba.
Mga footnote
^ Pagbo nga suporta ha atop.
