Pahayag 22:1-21
22 Katapos, iginpakita niya ha akon an usa nga salog han tubig han kinabuhi, nga pariho katin-aw han kristal, nga naawas tikang ha trono han Dios ngan han Kordero
2 ngadto ha butnga han haluag nga kalye. Ha paluyoluyo han salog may mga kahoy han kinabuhi nga namumunga hin 12 ka beses kada tuig, nga naghahatag hin bunga kada bulan. Ngan an mga dahon han mga kahoy nakakatambal ha mga nasud.
3 Waray na didto bisan ano nga sumpa. Lugod, an trono han Dios ngan han Kordero mahingangada ha syudad, ngan an iya mga uripon magbubuhat hin sagrado nga pag-alagad ha iya;
4 ngan ira makikita an iya nawong, ngan an iya ngaran isusurat ha ira agtang.
5 Waray na liwat kagab-ihon, ngan diri na hira magkikinahanglan hin lamrag han lampara o hin sirak han adlaw, kay hi Jehova nga Dios an maghahatag ha ira hin kalamrag, ngan magmamando hira sugad nga mga hadi ha waray kataposan.
6 Ngan nagsiring hiya ha akon: “Ini nga mga pulong masasarigan ngan totoo; oo, hi Jehova, an Dios nga naggiya* ha mga propeta nagsugo han iya anghel basi ipakita ha iya mga uripon an mga butang nga hirani na gud mahitabo.
7 Kitaa! Makada dayon ako. Malipayon an bisan hin-o nga nagtutuman han mga pulong han tagna hini nga linukot nga basahon.”
8 Oo, ako hi Juan, an usa nga nakabati ngan nakakita hini nga mga butang. Han nabatian ko ito ngan nakita, yinukbo ako ha tiilan han anghel nga nagpakita ha akon hini nga mga butang, basi singbahon hiya.
9 Pero ginsidngan niya ako: “Ayaw pagbuhat hito! Igkasi-uripon mo la ako ngan han imo kabugtoan nga mga propeta ngan hadton nagtutuman han mga pulong hini nga linukot nga basahon. Singbaha an Dios.”
10 Nagsiring liwat hiya ha akon: “Ayaw pagtagoa an mga pulong han tagna hini nga linukot nga basahon, kay hirani na an itinanda nga panahon.
11 Pabay-i an diri-matadong nga magpadayon ha iya pagkadiri-matadong, ngan pabay-i an mahugaw an paggawi nga magpadayon ha iya mahugaw nga paggawi. Pero pabay-i an matadong nga magpadayon ha iya pagkamatadong, ngan pabay-i an baraan nga magpadayon ha iya pagkabaraan.
12 “ ‘Kitaa! Makada dayon ako, ngan dara ko an balos nga akon ihahatag, basi balosan an kada tagsa uyon ha iya buhat.
13 Ako an Alpha ngan an Omega, an una ngan an urhi, an tinikangan ngan an kataposan.
14 Malipayon an naglalaba han ira higlaba nga bado, basi magkaada hira awtoridad pagkadto ha mga kahoy han kinabuhi ngan basi makasulod hira ha syudad pinaagi han mga ganghaan hito.
15 Ha gawas han syudad adto an mga ayam,* an mga nagbubuhat hin espiritismo, an mga imoral,* an mga parapamatay, an mga parasingba ha dios-dios, ngan an bisan hin-o nga nalilipay ha pagbuwa ngan nagbubuhat hito.’
16 “ ‘Ako, hi Jesus, an nagsugo han akon anghel basi magpamatuod ha iyo mahitungod hini nga mga butang para ha mga kongregasyon. Ako an gamot ngan an tulin ni David, ngan an mapawa nga bitoon ha kaagahon.’ ”
17 An espiritu ngan an karaslon nga babaye padayon nga nasiring: “Kadi!” Ngan an bisan hin-o nga nakakabati pasiringa: “Kadi!” An bisan hin-o nga nauuhaw pakadia; ngan an bisan hin-o nga naruruyag, pakuhaa han tubig han kinabuhi nga waray bayad.
18 “Nagpapamatuod ako ha kada tagsa nga namamati han mga pulong han tagna hini nga linukot nga basahon: An bisan hin-o nga magdugang han mga iginsurat dinhi hini nga linukot nga basahon, idudugang ha iya han Dios an mga peste nga iginsurat dinhi.
19 Ngan an bisan hin-o nga magkuha hin bisan ano tikang ha mga pulong han tagna dinhi hini nga linukot nga basahon, kukuhaon han Dios an iya bahin tikang ha mga kahoy han kinabuhi ngan diri hiya pasusudlon ha baraan nga syudad, sumala ha iginsurat dinhi hini nga basahon.
20 “Hiya nga nagpapamatuod mahitungod hini nga mga butang nasiring, ‘Oo, makada dayon ako.’ ”
“Amen! Pakadi, Ginoo Jesus.”
21 Makarawat unta han mga baraan an diri-matupngan nga pagkabuotan han Ginoo nga hi Jesu-Kristo.
Mga footnote
^ Ha literal, “han mga espiritu.”
^ Karuyag sidngon, an mga nagbubuhat han ginkakangalasan han Dios.
^ Kitaa an footnote ha 1Co 5:9.
