Roma 6:1-23
6 Salit ano an aton masisiring? Magpapadayon ba kita ha pakasala basi magdugang an diri-matupngan nga pagkabuotan?
2 Diri! Tungod kay namatay na kita ha makasasala nga pagkinabuhi, kay ano nga magpapadayon pa kita ha pagbuhat hin mga sala?
3 O diri ba kamo maaram nga kita ngatanan nga ginbawtismohan basi magin kahiusa ni Kristo Jesus, ginbawtismohan basi magin kaangbit han iya kamatayon?
4 Kon sugad, iginlubong kita upod han Kristo pinaagi han aton bawtismo basi magin kaangbit han iya kamatayon. Sugad la nga ginbanhaw hiya pinaagi han mahimayaon nga gahum han Amay, sadang liwat kita maglakat uyon ha bag-o nga pagkinabuhi.
5 Kay kon mamatay kita pariho ha iya, sigurado nga mababanhaw liwat kita pariho ha iya, ngan hini nga mga paagi magigin kahiusa kita niya,
6 kay maaram kita nga an aton daan nga personalidad iginraysang upod niya, basi mawaray gahum an aton makasasala nga lawas, ngan basi diri na kita magin uripon han sala.
7 Kay hiya nga namatay gin-abswelto na ha iya sala.
8 Kon namatay na kita upod han Kristo, natoo kita nga mabubuhi liwat kita upod niya.
9 Kay maaram kita nga yana nga ginbanhaw na an Kristo, diri na hiya mamamatay. An kamatayon, nga sugad hin agaron, waray na gahum ha iya.
10 Kay makausa la hiya namatay basi wad-on an sala, pero buhi hiya basi mabuhat niya an kaburut-on han Dios.
11 Sugad man kamo, tagda an iyo kalugaringon nga patay ha makasasala nga pagkinabuhi pero buhi para ha Dios pinaagi kan Kristo Jesus.
12 Salit ayaw na niyo pasagdi nga an sala padayon nga maghadi ha iyo mortal nga lawas nga tungod hito ginsusugot niyo an mga hingyap hito.
13 Ngan ayaw liwat niyo itubyan ha sala an mga bahin han iyo lawas sugad nga mga armas han pagkadiri-matadong, lugod itubyan ha Dios an iyo kalugaringon sugad hin patay nga nabuhi, ngan itubyan ha Dios an iyo mga bahin sugad nga mga armas han katadongan.
14 Kinahanglan diri magin agaron niyo an sala kay diri kamo sakop han balaud kondi sakop han diri-matupngan nga pagkabuotan.
15 Kon sugad, ano an aton masisiring? Magbubuhat ba kita hin sala kay diri kita sakop han balaud kondi sakop han diri-matupngan nga pagkabuotan? Diri!
16 Diri ba kamo maaram nga kon iyo igintutubyan ha bisan hin-o an iyo kalugaringon sugad nga masinugtanon nga uripon, uripon kamo han iyo ginsusugot, mga uripon man han sala nga nagriresulta hin kamatayon, o mga uripon han pagkamasinugtanon nga nagriresulta hin pagkamatadong?
17 Pero nagpapasalamat ako ha Dios kay hadto mga uripon kamo han sala, kondi yana kinasingkasing nga nagin masinugtanon na kamo tungod hito nga katutdoan nga igintapod ha iyo.
18 Oo, tungod kay gintalwas na kamo tikang ha pagkauripon ha sala, nagin mga uripon kamo han katadongan.
19 Tungod han kaluyahan han iyo lawas, nagyayakan ako ha paagi nga nasasabtan han tawo. Kay sugad la nga igintubyan niyo an mga bahin han iyo lawas sugad nga mga uripon han kahugaw ngan han pagtalapas nga nagriresulta hin pagtalapas, sugad man yana itubyan niyo an mga bahin han iyo lawas sugad nga mga uripon han katadongan nga nagriresulta ha pagkabaraan.
20 Kay han mga uripon pa kamo han sala, diri niyo agaron an katadongan.
21 Kon sugad, ano nga klase hin bunga an iyo gin-aani hadto? Mga butang nga iginkakaawod niyo yana. Kay an kataposan hito nga mga butang amo an kamatayon.
22 Pero yana, tungod kay gintalwas na kamo tikang ha sala ngan nagin mga uripon na han Dios, gin-aani na niyo an iyo bunga han pagkabaraan, ngan an resulta hito, kinabuhi nga waray kataposan.
23 Kay an bayad han sala amo an kamatayon, pero an regalo nga iginhahatag han Dios amo an kinabuhi nga waray kataposan pinaagi kan Kristo Jesus nga aton Ginoo.
