An Siyahan nga Surat ha mga Taga-Corinto 2:1-16
2 Salit mga kabugtoan, han kinada ako ha iyo ha pagpahayag han sagrado nga tinago+ han Dios, waray ako gumamit hin higlarom nga mga pulong+ o magparayaw han kinaadman.
2 Kay nagdesisyon ako nga diri hibaroan an bisan ano dida ha iyo gawas la kan Jesu-Kristo, ngan ha iya nga ginpatay ha kahoy.+
3 Ngan kinada ako ha iyo nga maluya ngan nahahadlok ngan nangungurog gud;
4 ngan an akon pagyakan ngan an akon iginsangyaw diri pinaagi han makakombinse nga mga pulong han kinaadman kondi pinaagi ha pagpakita han espiritu ngan gahum,+
5 basi an iyo pagtoo igbasar, diri ha kinaadman han mga tawo, kondi ha gahum han Dios.
6 Yana ginhihisgotan naton an kinaadman ha butnga han mga hamtong,+ pero diri an kinaadman hini nga sistema han mga butang* ngan diri liwat an kinaadman han mga magmarando hini nga sistema han mga butang, nga hirani na wad-on.+
7 Kondi ginhihisgotan naton an kinaadman han Dios ha sagrado nga tinago,+ an nakatago nga kinaadman, nga itinanda nga daan han Dios antes pa han mga sistema han mga butang para ha aton himaya.
8 Diri maaram hini nga kinaadman an bisan usa han mga magmarando hini nga sistema han mga butang,*+ kay kon maaram hira hito, waray unta nira pataya* an mahimayaon nga Ginoo.
9 Pero sugad la han nahisurat: “Waray makita han mata ngan waray mabatii han talinga, waray liwat matugkad han kasingkasing han tawo an mga butang nga gin-andam han Dios para ha mga nahigugma ha iya.”+
10 Kay iginpahayag ito ha aton han Dios+ pinaagi han iya espiritu,+ kay gin-uusisa han espiritu an ngatanan nga butang, bisan an higlarom nga mga butang han Dios.+
11 Kay hin-o ha mga tawo an maaram han mga butang han usa nga tawo labot la han espiritu han tawo nga aada ha iya? Sugad man, waray maaram han mga butang han Dios labot la han espiritu han Dios.
12 Yana ginkarawat naton, diri an espiritu han kalibotan, kondi an espiritu nga tikang ha Dios,+ basi hibaroan naton an mga butang nga mahigugmaon nga iginhatag ha aton han Dios.
13 Ginhihisgotan liwat naton ini nga mga butang, diri pinaagi han mga pulong nga igintutdo han kinaadman han tawo,+ kondi pinaagi han mga igintutdo han espiritu,+ samtang gin-iesplikar* naton an espirituwal nga mga butang pinaagi han espirituwal nga mga pulong.
14 Kondi an pisikal nga tawo diri nakarawat han mga butang han espiritu han Dios, kay para ha iya kalurongan la ito; ngan diri hiya mahibabaro hito, kay gin-uusisa ito ha espirituwal nga paagi.
15 Pero an espirituwal nga tawo nag-uusisa han ngatanan nga butang,+ kondi diri hiya gin-uusisa han bisan hin-o nga tawo.
16 Kay “hin-o an maaram han panhunahuna ni Jehova,* basi niya matutdoan hiya?”+ Pero may-ada gud kita han panhunahuna han Kristo.+
