An Siyahan nga Surat ha mga Taga-Corinto 5:1-13
5 Ha pagkamatuod, may-ada sumat nga may seksuwal nga imoralidad*+ dida ha iyo, ngan an sugad nga imoralidad* diri ngani nahitatabo ha mga nasud—mahitungod hin lalaki nga gin-uroasawa* an asawa han iya tatay.+
2 Ngan iginhahambog ba niyo ito? Diri ba sadang lugod kamo mabido,+ amo nga an tawo nga nagbuhat hito kinahanglan paiwason tikang ha butnga niyo?+
3 Bisan kon waray ako dida, aada ha iyo an akon hunahuna,* ngan ginhukman ko na an tawo nga nagbuhat hito, nga baga hin aada gud ako ha iyo.
4 Kon nagkakatirok kamo ha ngaran han aton Ginoo nga hi Jesus, ngan maaram kamo nga aada ha iyo an akon hunahuna* upod an gahum han aton Ginoo nga hi Jesus,
5 kinahanglan itubyan niyo ito nga tawo kan Satanas+ para ha kabungkagan han unod, basi an espiritu matalwas ha adlaw han Ginoo.+
6 Diri maopay an iyo paghambog. Diri ba kamo maaram nga an gutiay nga libadura nakakapatubo han bug-os nga minasa?+
7 Kuhaa an daan nga minasa nga may libadura basi kamo magin bag-o nga minasa, kay waray na ipaturubo* dida ha iyo. Kay ha pagkamatuod, an Kristo nga aton kordero ha Paskua+ iginhalad na.+
8 Salit iselebrar naton an piyesta,+ diri pinaagi hin daan nga minasa nga may libadura, ngan diri liwat pinaagi hin libadura han karaotan ngan pagkamakasasala, kondi pinaagi hin tinapay nga waray libadura han pagkasinsero ngan kamatuoran.
9 Ha akon surat ginsidngan ko kamo nga diri na kamo makig-upod* ha mga tawo nga nagbubuhat hin seksuwal nga imoralidad,*
10 diri karuyag sidngon nga bug-os nga diri kamo makig-upod ha mga tawo nga nagbubuhat hin seksuwal nga imoralidad* hini nga kalibotan+ o ha mga tawo nga hakog o ha mga parapangilkil* o ha mga nagbubuhat hin idolatriya. Kay kon amo, kinahanglan gumawas kamo ha kalibotan.+
11 Kondi yana nagsusurat ako ha iyo nga diri na kamo makig-upod*+ ha bisan hin-o nga tinatawag nga bugto nga nagbubuhat hin seksuwal nga imoralidad* o hin tawo nga hakog+ o nagbubuhat hin idolatriya o parapanginsulto* o parahubog+ o parapangilkil,+ bisan ha pakig-upod ha pagkaon ha sugad nga tawo.
12 Kay ano an akon labot ha paghukom ha mga aadto ha gawas? Diri ba kamo an naghuhukom han mga aada ha sulod,
13 samtang an Dios an naghuhukom han mga aadto ha gawas?+ “Paiwasa tikang ha iyo an maraot nga tawo.”+
Mga footnote
^ Lit., “ginkuha.”
^ O “presente ako ha espiritu.”
^ O “kaupod ako niyo ha espiritu.”
^ Lit., “waray na libadura.”
^ O “diri na kamo makigturotarampo.”
^ Karuyag sidngon, tawo nga nangangaro nga may panarhog o pamirit.
^ O “diri na kamo makigturotarampo.”
^ O “tawo nga nakakadaot manyakan.”
