An Siyahan nga Libro han mga Hadi 15:1-34
15 Ha ika-18 ka tuig ni Hadi Jeroboam+ nga anak ni Nebat, hi Abiam nagin hadi ha Juda.+
2 Naghadi hiya hin tulo ka tuig ha Jerusalem. An ngaran han iya nanay amo hi Maaca+ nga apo ni Abisalom.
3 Ngan ginsunod niya an ngatanan nga sala nga ginbuhat han iya tatay nga nahiuna ha iya, ngan an iya kasingkasing diri bug-os ngadto* kan Jehova nga iya Dios, diri pariho han kasingkasing ni David nga iya kaapoy-apoyan.
4 Pero, tungod kan David,+ hi Jehova nga iya Dios naghatag kan Abiam hin lampara ha Jerusalem+ pinaagi ha pagpili ha iya anak nga magin hadi sunod ha iya ngan pagtipig nga magpadayon ha pag-eksister an Jerusalem.
5 Tungod kay ginbuhat ni David an husto ha pagkita ni Jehova, ngan waray hiya simang tikang ha bisan ano nga Iya iginsugo ha iya ha ngatanan nga adlaw han iya kinabuhi, gawas la han may kalabotan kan Uria nga Hiteo.+
6 Ngan pirme hadto may girra ha butnga nira Rehoboam ngan Jeroboam ha ngatanan nga adlaw han iya kinabuhi.+
7 Mahitungod han iba pa nga bahin han kasaysayan ni Abiam, an ngatanan nga iya ginbuhat, diri ba iginsurat ito ha libro han kasaysayan han mga panahon han mga hadi han Juda?+ Nagkaada liwat girra ha butnga nira Abiam ngan Jeroboam.+
8 Katapos, hi Abiam pinahuway kaupod han iya mga kaapoy-apoyan, ngan iginlubong nira hiya ha Syudad ni David; ngan an iya anak nga hi Asa+ an nagin hadi kasaliwan niya.+
9 Ha ika-20 ka tuig ni Hadi Jeroboam han Israel, hi Asa nagtikang paghadi ha Juda.
10 Naghadi hiya ha Jerusalem hin 41 ka tuig. An ngaran han iya lola amo hi Maaca+ nga apo ni Abisalom.
11 Ginbuhat ni Asa an husto ha pagkita ni Jehova,+ pariho han iya kaapoy-apoyan nga hi David.
12 Ginpaiwas niya tikang ha tuna an mga lalaki nga ginbabayaran basi makighilawas didto ha templo+ ngan ginpanguha an ngatanan nga mangil-ad nga idolo* nga ginhimo han iya mga kaapoy-apoyan.+
13 Gintangtang pa ngani niya an iya lola nga hi Maaca+ ha iya katungdanan sugad nga rayna, kay naghimo hiya hin mangil-ad nga idolo para ha pagsingba ha sagrado nga poste.* Gin-utod ni Asa an iya mangil-ad nga idolo+ ngan ginsunog ito ha Walog han Kidron.+
14 Pero waray pananggala an higtaas nga mga lugar.+ Bisan pa hito, bug-os* an kasingkasing ni Asa ngadto kan Jehova ha bug-os niya nga kinabuhi.*
15 Ngan gindara niya an mga butang nga ginbaraan niya ngan han iya tatay ngadto ha balay ni Jehova—silber, bulawan, ngan magkalain-lain nga mga gamit.+
16 Pirme hadto may girra ha butnga nira Asa ngan Baasa+ nga hadi han Israel.
17 Salit hi Hadi Baasa han Israel sinulong ha Juda ngan nagtikang pagtukod* han Rama+ basi pugngan an bisan hin-o ha paggawas o pagkadto kan* Hadi Asa han Juda.+
18 Ngan ginkuha ni Asa an ngatanan nga silber ngan bulawan nga nahibilin ha mga tiripigan hin bahandi ha balay ni Jehova ngan ha mga tiripigan hin bahandi ha balay* han hadi ngan igintapod ito ha iya mga surugoon. Katapos, ginsugo hira ni Hadi Asa ngadto kan Ben-hadad nga anak ni Tabrimon nga anak ni Hezion, nga hadi han Sirya,+ nga naukoy ha Damasco, nga nasiring:
19 “May-ada kasabotan butnga ha aton nga duha ngan butnga han akon tatay ngan han imo tatay. Nagpadara ako hin regalo ha imo nga silber ngan bulawan. Kadi, talapasa an imo kasabotan kan Hadi Baasa han Israel, basi umatras hiya tikang ha akon.”
20 Hi Ben-hadad namati kan Hadi Asa ngan ginsugo an mga lider han iya mga kasundalohan kontra ha mga syudad han Israel, ngan ira ginsakop an Ijon,+ Dan,+ Abel-bet-maaca, an bug-os nga Kineret, ngan an bug-os nga tuna han Neptali.
21 Pakabati hito ni Baasa, inundang dayon hiya ha pagtukod* han Rama ngan padayon nga inukoy ha Tirza.+
22 Katapos, iginpatawag ni Hadi Asa an bug-os nga Juda—waray bisan usa nga diri api—ngan ira gindara an mga bato ngan mga kahoy ha Rama nga gin-gamit ni Baasa ha pagtukod, ngan gin-gamit ito ni Hadi Asa ha pagtukod* han Geba+ ha Benjamin, ngan han Mizpa.+
23 Mahitungod han ngatanan nga iba pa nga bahin han kasaysayan ni Asa, an ngatanan nga iya pagkagamhanan ngan an ngatanan nga iya ginbuhat ngan an mga syudad nga iya gintukod,* diri ba iginsurat ito ha libro han kasaysayan han mga panahon han mga hadi han Juda? Pero han lagas na hiya nag-antos hiya hin sakit ha iya mga tiil.+
24 Katapos, hi Asa pinahuway kaupod han iya mga kaapoy-apoyan ngan iginlubong kaupod nira ha Syudad ni David nga iya kaapoy-apoyan; ngan an iya anak nga hi Jehosafat+ an nagin hadi kasaliwan niya.
25 Hi Nadab+ nga anak ni Jeroboam nagin hadi han Israel ha ikaduha ka tuig ni Hadi Asa han Juda, ngan nagmando hiya ha Israel hin duha ka tuig.
26 Padayon nga ginbuhat niya an maraot ha pagkita ni Jehova ngan naglakat ha dalan han iya tatay+ ngan ha iya sala nga nagin hinungdan han pakasala han Israel.+
27 Hi Baasa nga anak ni Ahias ha panimalay ni Isacar nakigkunsabo kontra ha iya, ngan ginpatay hiya ni Baasa ha Gibeton+ nga sakop han mga Filisteo, samtang ginpapalibotan nira Nadab ngan han bug-os nga Israel an Gibeton.
28 Salit ginpatay hiya ni Baasa ha ikatulo ka tuig ni Hadi Asa han Juda ngan nagin hadi kasaliwan niya.
29 Ngan pagtikang gud niya ha paghadi, ginpamatay niya an bug-os nga panimalay ni Jeroboam. Waray hiya iginbilin nga bisan hin-o nga naggiginhawa nga kan Jeroboam; iginpapoo niya hira sumala ha pulong ni Jehova nga iya ginyakan pinaagi ha iya surugoon nga hi Ahias nga Shilonita.+
30 Tungod ini han mga sala nga ginbuhat ni Jeroboam ngan nagin hinungdan liwat nga makasala an Israel ngan tungod kay ginpasina gud niya hi Jehova nga Dios han Israel.
31 Mahitungod han iba pa nga bahin han kasaysayan ni Nadab, an ngatanan nga iya ginbuhat, diri ba iginsurat ito ha libro han kasaysayan han mga panahon han mga hadi han Israel?
32 Ngan pirme hadto may girra ha butnga nira Asa ngan Hadi Baasa han Israel.+
33 Ha ikatulo ka tuig ni Hadi Asa han Juda, hi Baasa nga anak ni Ahias nagin hadi ha Tirza ha bug-os nga Israel ngan nagmando hin 24 ka tuig.+
34 Pero padayon nga ginbuhat niya an maraot ha pagkita ni Jehova,+ ngan naglakat hiya ha dalan ni Jeroboam ngan ha iya sala nga nagin hinungdan han pakasala han Israel.+
Mga footnote
^ O “diri bug-os nga debotado.”
^ An Hebreo nga termino bangin may koneksyon ha pulong para ha “tai” ngan gin-gagamit sugad nga pagtamay.
^ O “bug-os nga debotado.”
^ Lit., “ha ngatanan niya nga adlaw.”
^ O “pagpader; pagtukod utro.”
^ O “pagbaya o pagsulod ha teritoryo ni.”
^ O “palasyo.”
^ O “pagpader; pagtukod utro.”
^ O “pagpader; pagtukod utro.”
^ O “ginpader; gintukod utro.”
