An Siyahan nga Libro han mga Hadi 7:1-51
7 Ngan inabot hin 13 ka tuig an pagtukod ni Solomon han iya kalugaringon nga balay,*+ tubtob nga nahuman an iya bug-os nga balay.+
2 Ngan gintukod niya an Balay han Kagurangan han Lebanon+ nga 100 ka siko* an kahilaba, 50 ka siko an kahilapad, ngan 30 ka siko an kahitaas nga may upat ka rumbay nga mga harigi nga sedro; ngan may mga sapayan nga sedro+ ha mga harigi.
3 Ginhaklapan ito ha igbaw hin kahoy nga sedro ha mga sapayan nga pabalabag nga nakatungbaw ha mga harigi; 45 an kadamu hito, nga 15 ha usa ka rumbay.
4 May-ada tulo ka rumbay nga mga bintana nga may hamba, ngan an kada bintana may katugbang nga bintana ha tulo ka rumbay.
5 An ngatanan nga aragian tipasulod ngan an mga poste ha purtahan may kwadrado* nga mga hamba, sugad han prente han mga bintana nga magkaturogbang ha tulo ka rumbay.
6 Ngan ginhimo niya an Ruwang* han mga Harigi nga 50 ka siko an kahilaba ngan 30 ka siko an kahilapad, ngan may beranda ha prente hito nga may mga harigi ngan sugabong.
7 Ginhimo liwat niya an Ruwang* han Trono,+ diin didto hiya naghuhukom—an Ruwang han Paghukom+—ngan ira ito ginhaklapan hin kahoy nga sedro tikang ha salóg tubtob ha mga pagbo.
8 An balay* nga iya gin-ukyan, ha lain nga bungsaran,+ aada ha luyo han Ruwang,* ngan pariho an pagkahimo hito. Nagtukod liwat hiya hin balay nga pariho hini nga Ruwang para ha anak nga babaye han Paraon, nga ginkuha ni Solomon sugad nga asawa.+
9 Ini ngatanan hinimo ha marahalon nga mga bato+ nga gintabas sumala ha sukol, ginhamis ha paluyoluyo gamit an mga panbato nga sarutso, tikang ha pundasyon tubtob ha pinakaigbaw, ngan ha gawas tubtob ha haluag nga bungsaran.+
10 Ngan iginpahamutang an pundasyon gamit an dagku hinduro ngan marahalon nga mga bato; an kadaku han iba nga mga bato napulo ka siko, ngan an iba nga bato, walo ka siko.
11 Ngan an bawbaw hini marahalon nga mga bato, gintabas sumala ha sukol, sugad man hin kahoy nga sedro.
12 Ha palibot han haluag nga bungsaran may tulo ka rumbay han tinabas nga bato ngan usa ka rumbay han mga sapayan nga sedro, pariho liwat hito an aada ha sulod nga bungsaran+ han balay ni Jehova ngan han beranda han balay.+
13 Hi Hadi Solomon nagsugo nga kuhaon hi Hiram+ ha Tiro.
14 Anak hiya nga lalaki han usa nga balo nga babaye nga tikang ha tribo ni Neptali, ngan an iya tatay taga-Tiro nga panday hin tumbaga;*+ ngan eksperto gud hiya, may pagsabot,+ ngan eksperyensyado ha ngatanan nga klase hin pagpanday hin tumbaga.* Salit kinadto hiya kan Hadi Solomon ngan ginbuhat an ngatanan niya nga buruhaton.
15 Ginhurma niya an duha nga harigi nga tumbaga;+ an tagsa nga harigi 18 ka siko an kahitaas, ngan an tagsa han duha nga harigi malilikosan hin higot nga isurukol nga 12 ka siko an kahilaba.*+
16 Ngan naghurma hiya hin duha nga ulo-ulo nga tumbaga basi igbutang ha bawbaw han mga harigi. An usa nga ulo-ulo lima ka siko an kahitaas, ngan an usa pa nga ulo-ulo lima ka siko an kahitaas.
17 An ulo-ulo ha bawbaw han tagsa nga harigi may disenyo nga pariho hin mga mata han pukot nga may linubid nga mga kadena;+ pito ha usa nga ulo-ulo ngan pito ha lain nga ulo-ulo.
18 Naghimo hiya hin mga prutas nga granada nga duha ka rumbay ha palibot han usa nga disenyo nga pariho hin pukot basi dekorasyonan an mga ulo-ulo nga aada ha bawbaw han mga harigi; pariho an iya ginhimo ha duha nga ulo-ulo.
19 An mga ulo-ulo ha bawbaw han mga harigi dida ha beranda bukad nga liryo an disenyo nga upat ka siko an kahitaas.
20 An mga ulo-ulo aada ha duha nga harigi, igbaw gud la han malidong nga parte nga ginsusumpayan han disenyo nga pariho hin pukot; ngan may-ada 200 nga prutas nga granada nga nagrurumbay ha palibot han tagsa nga ulo-ulo.+
21 Iya gintindog an mga harigi han beranda han templo.*+ Gintindog niya an too* nga harigi ngan ginngaranan ito hin Jakin,* ngan gintindog niya an wala* nga harigi ngan ginngaranan ito hin Boaz.*+
22 Ngan an bawbaw han mga harigi bukad nga liryo an disenyo. Salit nahuman an paghimo han mga harigi.
23 Katapos, ginhimo niya an Dagat* nga tikang ha hinurma nga metal.+ Malidong an kurti hito, 10 ka siko an diyametro han ganggang ngan 5 ka siko an kahitaas, ngan malilikosan ito hin higot nga isurukol nga 30 ka siko an kahilaba.*+
24 Ngan may-ada adorno nga mga prutas nga pariho hin pakwan+ ha ubos han ganggang hito, ha bug-os nga palibot, napulo ha kada siko ha palibot han Dagat,* nga may duha ka rumbay han mga prutas nga pariho hin pakwan nga ginhurma kaupod hito.
25 Nakatungbaw ito ha 12 nga todo nga baka,+ 3 nga naatubang ha norte, 3 nga naatubang ha weste, 3 nga naatubang ha sur, ngan 3 nga naatubang ha este; ngan an Dagat* igintungbaw ha mga baka, ngan an ngatanan nga tipaikog nga parte nagtatarapo ha sentro.
26 Ngan an kadakmulon hito usa ka dapal;* ngan an ganggang hito ginhimo pariho han ganggang hin kopa, pariho hin bukad nga liryo. Maeksakto dida hito an 2,000 ka bat* nga tubig.
27 Katapos, ginhimo niya an napulo nga kariton*+ nga tumbaga. An kada kariton upat ka siko an kahilaba, upat ka siko an kahilapad, ngan tulo ka siko an kahitaas.
28 Ngan ha sugad hini ginhimo an mga kariton: May-ada ito mga salipod ha ligid, ngan an mga salipod ha ligid nahibubutnga ha kwadrado nga mga balayan.
29 Ngan ha mga salipod ha ligid nga nahibubutnga ha kwadrado nga mga balayan may disenyo nga mga leon,+ todo nga mga baka, ngan mga kerubin,+ ngan may pariho nga disenyo ha kwadrado nga mga balayan. Ha igbaw ngan ubos han mga leon ngan han todo nga mga baka may giritinggiting nga disenyo.
30 Ngan an kada kariton may upat nga tumbaga nga kaliding ngan tumbaga nga mga ehe, ngan an upat nga tiil-tiil ha mga kanto hito nasuporta hito. Ha ilarom han planggana may-ada mga suporta, nga ginhurma nga may giritinggiting nga mga disenyo ha tagsa nga ligid.
31 An ganggang han surudlan aada ha sulod han malidong nga balayan, nga usa ka siko an sukol tikang ha ubos tipaigbaw; ngan malidong an ganggang hito, nga an kabug-osan nga sukol han kahitaas usa ngan tunga ka siko, ngan ha ganggang hito may mga inukit. Ngan an mga salipod hito ha ligid mga kwadrado, diri malidong.
32 An upat nga kaliding aada ha ilarom han mga salipod ha ligid, ngan an mga suporta han mga kaliding nakasumpay ha kariton, ngan an kahitaas han tagsa nga kaliding usa ngan tunga ka siko.
33 Ngan an mga kaliding ginhimo pariho han mga kaliding han karuwahe. An mga suporta hito, an mga yanta, mga rayos, ngan mga hab ngatanan hinimo ha hinurma nga metal.
34 May-ada upat nga suporta ha upat nga eskina han tagsa nga kariton; an mga suporta hito ginhurma nga kabahin* han kariton.
35 Ha bawbaw han kariton may malidong nga liog-liog nga tunga ka siko an kahitaas, ngan ha bawbaw han kariton, an mga balayan ngan an mga salipod hito ha ligid ginhurma nga kabahin* hito.
36 Ha bawbaw han mga balayan hito ngan ha mga salipod hito ha ligid nag-ukit hiya hin mga kerubin, mga leon, ngan mga kahoy nga palma sumala han kadaku han espasyo han kada tagsa, nga may mga giritinggiting ha palibot.+
37 Sugad hito niya ginhimo an napulo nga kariton;+ ito ngatanan ginhurma nga parapriho,+ an sukol ngan kurti hito parapriho.
38 Naghimo hiya hin napulo nga planggana nga tumbaga;+ ha tagsa hito maeksakto an 40 ka bat nga tubig. An kada planggana upat ka siko an kadaku.* May usa nga planggana ha tagsa han napulo nga kariton.
39 Katapos, iginbutang niya an lima nga kariton ha too nga dapit han balay ngan lima ha wala nga dapit han balay, ngan iginbutang niya an Dagat* ha too nga dapit han balay, nga naatubang ha sur-este.+
40 Ginhimo liwat ni Hiram+ an iba nga mga planggana, an mga pala,+ ngan an mga yahong.*+
Salit nahuman ni Hiram an ngatanan nga buruhaton nga iya ginbuhat para kan Hadi Solomon ha balay ni Jehova:+
41 an duha nga harigi+ ngan an mga ulo-ulo nga yahong an kurti nga aada ha bawbaw han duha nga harigi; an duha nga disenyo nga pariho hin pukot+ basi dekorasyonan an duha nga ulo-ulo nga yahong an kurti nga aada ha bawbaw han mga harigi;
42 an 400 nga prutas nga granada+ para ha duha nga disenyo nga pariho hin pukot, duha ka rumbay nga mga prutas nga granada para ha tagsa nga disenyo nga pariho hin pukot, basi dekorasyonan an duha nga ulo-ulo nga yahong an kurti nga aada ha bawbaw han duha nga harigi;
43 an napulo nga kariton+ ngan an napulo nga planggana+ ha mga kariton;
44 an Dagat*+ ngan an 12 nga todo nga baka ha ilarom han Dagat;
45 ngan an mga surudlan han abo, an mga pala, an mga yahong, ngan an ngatanan nga garamiton, nga ginhimo ni Hiram tikang ha tumbaga ngan iya ginhamis ngan ginpainggat para kan Hadi Solomon para ha balay ni Jehova.
46 Ginhurma ito han hadi ha mga hurmaan nga lapok didto ha distrito han Jordan, butnga han Sucot ngan Zaretan.
47 Waray timbanga ni Solomon an ngatanan nga garamiton tungod han sobra nga kadamu hito. Waray hibaroi an kabug-aton han tumbaga.+
48 Ginhimo ni Solomon an ngatanan nga garamiton para ha balay ni Jehova: an halaran+ nga bulawan; an lamesa+ nga bulawan nga ginbubutangan han halad nga tinapay;
49 an mga burutangan han lampara+ nga puro nga bulawan, lima ha too ngan lima ha wala ha atubangan han gisusuluri nga kwarto; ngan an mga bukad,+ an mga lampara, ngan an mga kimpit, nga hinimo ha bulawan;+
50 an mga planggana, an mga panparong,+ an mga yahong, an mga kopa,+ ngan an mga insensaryo,+ nga puro nga bulawan; ngan an mga pabirikan para ha mga purtahan ha sulod han balay,+ karuyag sidngon, an Pinakabaraan, ngan para ha mga purtahan han balay ha templo,+ nga hinimo ha bulawan.
51 Salit nahuman ni Hadi Solomon an ngatanan nga buruhaton nga kinahanglan niya buhaton para ha balay ni Jehova. Katapos, gindara ni Solomon ha sulod an mga butang nga ginbaraan han iya tatay nga hi David,+ ngan iya ginbutang an mga silber, an mga bulawan, ngan an mga garamiton didto ha mga tiripigan hin bahandi ha balay ni Jehova.+
Mga footnote
^ O “palasyo.”
^ O “upat an kanto; rektanggulo.”
^ O “Beranda.”
^ O “Beranda.”
^ O “palasyo.”
^ Lit., “balay ha Ruwang.”
^ O “bronse,” dinhi ngan ha masunod nga mga paggamit hini nga kapitulo.
^ Ha Ingles, copper.
^ O “an tagsa han duha nga harigi 12 ka siko an sukol han palibot.”
^ An Baraan an gintutudlok dinhi.
^ Posible nga nangangahulogan nga “Ha Kusog.”
^ O “norte.”
^ Nangangahulogan nga “Hinaot Iya [karuyag sidngon, hi Jehova] Ig-establisar hin Marig-on.”
^ O “sur.”
^ Daku nga surudlan hin tubig.
^ O “30 ka siko an sukol han palibot hito.”
^ Daku nga surudlan hin tubig.
^ Daku nga surudlan hin tubig.
^ O “mga kariton han tubig.”
^ O “ginhimo sugad nga sumpay.”
^ O “ginhimo sugad nga sumpay.”
^ O “upat ka siko an diyametro.”
^ Daku nga surudlan hin tubig.
^ Ha iba nga lugar, “makaong; uhataw.”
^ Daku nga surudlan hin tubig.
