An Siyahan nga Libro ni Samuel 11:1-15
11 Katapos, hi Nahas nga Ammonita+ sinagka ha Jabes+ ha Gilead basi makiggirra hito. An ngatanan nga kalalakin-an ha Jabes nagsiring kan Nahas: “Paghimo hin kasabotan* ha amon, ngan magsiserbi kami ha imo.”
2 Hi Nahas nga Ammonita nagsiring ha ira: “Maghihimo ako hin kasabotan ha iyo hini nga kondisyon: nga lulukaton an ngatanan niyo nga too nga mata. Bubuhaton ko ini basi pakaalohan an bug-os nga Israel.”
3 An mga tigurang han Jabes binaton ha iya: “Tagi kami hin pito ka adlaw basi makapadara kami hin mga mensahero ha bug-os nga teritoryo han Israel. Katapos, kon waray magtatalwas ha amon, masurender kami ha imo.”
4 Ha urhi an mga mensahero inabot ha Gibeah+ ni Saul, ngan ira iginsumat ha katawohan ini nga mga pulong, ngan an ngatanan nga katawohan nanangis hin makusog gud.
5 Kondi tiabot hi Saul tikang ha uma nga nasunod ha mga baka, ngan nagsiring hiya: “Ano an problema han katawohan? Kay ano nga nananangis hira?” Salit ira iginsumat ha iya an ginsiring han kalalakin-an han Jabes.
6 Han hinbatian ni Saul ini nga mga pulong, an espiritu han Dios naghatag ha iya hin gahum,+ ngan naglaga an iya kasina.
7 Salit nagkuha hiya hin duha nga todo nga baka ngan gintadtad ito, ngan iya ito iginpadara ha bug-os nga teritoryo han Israel pinaagi han mga mensahero, nga nagsiring: “An bisan hin-o nga diri sumunod kan Saul ngan kan Samuel, sugad hini an bubuhaton ha iya mga baka!” Ngan inabat han katawohan an kahadlok kan Jehova, salit nagkagawas hira nga uusa an katuyoan.*
8 Katapos, gin-ihap hira ni Saul ha Bezek, ngan may 300,000 nga Israelita ngan 30,000 nga kalalakin-an han Juda.
9 Yana nagsiring hira ha mga mensahero nga nagkaabot: “Ini an iyo isisiring ha kalalakin-an han Jabes ha Gilead, ‘Buwas ha tikaudto,* matatalwas kamo.’” Salit linakat an mga mensahero ngan ginsumatan an kalalakin-an han Jabes, ngan nalipay gud hira.
10 Salit an kalalakin-an han Jabes nagsiring: “Buwas masurender kami ha imo, ngan mahimo mo buhaton ha amon an anoman nga baga hin maopay ha imo.”+
11 Kinabuwasan, ginbahin-bahin ni Saul an katawohan ha tulo nga grupo, ngan sinulod hira ha butnga han kampo durante han pagbantay ha maagahon* ngan ginpamatay an mga Ammonita+ tubtob ha tikaudto.* An mga nahisalin nga buhi nagsarang, ngan an kada tagsa ha ira naglugaring pagpalagiw.
12 Katapos, an katawohan nagsiring kan Samuel: “Hin-o an nasiring, ‘Hi Saul ba an maghahadi ha aton?’+ Itubyan ha amon an kalalakin-an, ngan pamamatayon namon hira.”
13 Kondi hi Saul nagsiring: “Waray tawo nga papatayon hini nga adlaw,+ kay yana nga adlaw gintalwas ni Jehova an Israel.”
14 Ha urhi, hi Samuel nagsiring ha katawohan: “Tana, pakadto kita ha Gilgal+ basi iproklamar utro an pagkahadi ni Saul.”+
15 Salit an ngatanan nga katawohan kinadto ha Gilgal, ngan didto ha Gilgal ira ginhimo nga hadi hi Saul ha atubangan ni Jehova. Katapos, naghalad hira didto ha atubangan ni Jehova hin mga halad nga ginsasarosaroan,+ ngan hi Saul ngan an ngatanan nga Israelita nagselebrar nga duro an kalipay.+
Mga footnote
^ O “kauyonan.”
^ Lit., “sugad nga usa ka tawo.”
^ Lit., “ha pagpaso han adlaw.”
^ Lit., “ha pagpaso han adlaw.”
^ Karuyag sidngon, mga alas-2 han maagahon tubtob ha alas-6 han aga.
