An Ikaduha nga Libro han mga Cronicas 11:1-23
11 Pag-abot ni Rehoboam ha Jerusalem, gintirok dayon niya an panimalay ni Juda ngan ni Benjamin,+ 180,000 nga binansay* nga girriro basi makig-away ha Israel para maibalik an ginhadian kan Rehoboam.+
2 Katapos, an mensahe ni Jehova inabot kan Semaias+ nga surugoon han tinuod nga Dios, nga nasiring:
3 “Sumati hi Rehoboam nga anak ni Solomon nga hadi han Juda ngan an bug-os nga Israel ha Juda ngan Benjamin,
4 ‘Ini an siring ni Jehova: “Ayaw kamo pagsagka ngan pakig-away ha iyo kabugtoan. An tagsa ha iyo umuli ha iya balay, kay ako an nagpahinabo hini.”’”+ Salit sinugot hira ha ginsiring ni Jehova ngan binalik ngan waray hira makiggirra kan Jeroboam.
5 Hi Rehoboam inukoy ha Jerusalem ngan nagtukod hin pinader nga mga syudad ha Juda.
6 Iya gintukod* an Bethlehem,+ Etam, Tekoa,+
7 Bet-zur, Soco,+ Adulam,+
8 Gat,+ Maresah, Zip,+
9 Adoraim, Lakis,+ Azeka,+
10 Zora, Aijalon,+ ngan Hebron,+ pinader nga mga syudad didto ha Juda ngan Benjamin.
11 Dugang pa, iya ginparig-on an pinader nga mga lugar ngan ginpanmutangan ito hin mga kumander ngan ginsuplayan ito hin pagkaon ngan lana ngan bino,
12 ngan iya ginsuplayan an ngatanan nga iba-iba nga syudad hin dagku nga mga taming ngan mga sugob; iya gud ito ginparig-on hinduro. Ngan nagpabilin nga iya an Juda ngan Benjamin.
13 Ngan an mga saserdote ngan an mga Levita nga nakada ha bug-os nga Israel sinuporta ha iya, tikang hira ha ngatanan nira nga teritoryo.
14 Ginbayaan han mga Levita an ira mga panabsaban ngan an ira panag-iya+ ngan kinadto ha Juda ngan Jerusalem, kay ginpaiwas hira ni Jeroboam ngan han iya mga anak sugad nga mga saserdote ni Jehova.+
15 Katapos, nagpili hi Jeroboam hin iya kalugaringon nga mga saserdote para ha higtaas nga mga lugar+ ngan para ha sugad-kanding nga mga demonyo*+ ngan para ha nati nga mga baka nga iya ginhimo.+
16 Ngan an mga tawo nga tikang ha ngatanan nga tribo han Israel nga an kasingkasing determinado nga pamilngon hi Jehova nga Dios han Israel, sinunod ha ira ngadto ha Jerusalem basi maghalad kan Jehova, nga Dios han ira mga kaapoy-apoyan.+
17 Ha sulod hin tulo ka tuig ira ginparig-on an paghadi han Juda ngan ginsuportaran hi Rehoboam nga anak ni Solomon, kay naglakat hira ha dalan ni David ngan ni Solomon hin tulo ka tuig.
18 Katapos, ginkuha ni Rehoboam sugad nga iya asawa hi Mahalat. Anak hiya ni Jerimot nga anak nga lalaki ni David, ngan ni Abihail nga anak nga babaye ni Eliab+ nga anak nga lalaki ni Jesse.
19 Paglabay han panahon, nagkaada hira mga anak nga lalaki: hira Jeus, Semarias, ngan Zaham.
20 Labot kan Mahalat, nagin asawa niya hi Maaca nga apo nga babaye ni Absalom.+ Paglabay han panahon nagkaada hira mga anak nga hira Abias,+ Atai, Ziza, ngan Selomit.
21 Mas hinigugma ni Rehoboam hi Maaca nga apo ni Absalom kay ha ngatanan nga iba pa niya nga asawa ngan babaye,+ kay nagkuha hiya hin 18 nga asawa ngan 60 nga babaye, ngan nagkaada hiya 28 nga anak nga lalaki ngan 60 nga anak nga babaye.
22 Salit ginpili ni Rehoboam hi Abias nga anak ni Maaca sugad nga ulo ngan lider han iya kabugtoan, kay plano niya nga himoon hiya nga hadi.
23 Kondi, ginios hiya nga may pagsabot ngan ginpakadto* niya an iba han iya mga anak ha ngatanan nga rehiyon han Juda ngan Benjamin, ha ngatanan nga pinader nga syudad,+ ngan gintagan hira hin hura nga pagkaon ngan nagkuha hin damu nga asawa para ha ira.
