An Ikaduha nga Libro han mga Cronicas 13:1-22
13 Ha ika-18 ka tuig ni Hadi Jeroboam, hi Abias nagin hadi ha Juda.+
2 Naghadi hiya hin tulo ka tuig ha Jerusalem. An ngaran han iya nanay amo hi Micaias+ nga anak ni Uriel nga taga-Gibeah.+ Ngan nagkaada girra ha butnga nira Abias ngan Jeroboam.+
3 Salit hi Abias nakiggirra upod an 400,000 nga sundalo nga magkusog ngan binansay* nga girriro.+ Ngan hi Jeroboam upod an 800,000 nga binansay* nga lalaki ngan magkusog nga girriro pinwesto basi makiggirra kontra ha iya.
4 Yana hi Abias tinindog ha Bukid Zemaraim nga aada ha kabukiran han Efraim, ngan nagsiring: “Pamati ha akon, O Jeroboam ngan bug-os nga Israel.
5 Diri ba kamo maaram nga hi Jehova nga Dios han Israel naghatag kan David hin ginhadian nga magmamando ha Israel ha kadayonan,+ ha iya ngan ha iya mga anak,+ pinaagi hin kasabotan han asin?*+
6 Pero hi Jeroboam+ nga anak ni Nebat, nga surugoon han anak ni David nga hi Solomon, nagrebelde ha iya ginoo.+
7 Ngan may mga tawo nga waray ginbubuhat ngan waray pulos nga padayon nga nagtitirok ngadto ha iya. Ngan naglampos hira ha pagrebelde kan Rehoboam nga anak ni Solomon han hi Rehoboam batan-on pa ngan hadlukon, ngan diri pa hiya nakakaato ha ira.
8 “Ngan yana naghuhunahuna kamo nga makakaato kamo ha ginhadian ni Jehova ha kamot han mga anak ni David kay daku kamo nga grupo ngan aada ha iyo an bulawan nga nati nga mga baka nga ginhimo ni Jeroboam sugad nga iyo mga dios.+
9 Diri ba ginpaiwas niyo an mga saserdote ni Jehova,+ an katulinan ni Aaron, ngan an mga Levita, ngan diri ba nagpili kamo hin iyo kalugaringon nga mga saserdote pariho han mga katawohan han iba nga mga tuna?+ An bisan hin-o nga nakanhi nga may dara nga* turilyo nga baka ngan pito nga karnero nga lalakí mahimo magin saserdote hin diri mga dios.
10 Para ha amon, hi Jehova an amon Dios,+ ngan waray kami bumaya ha iya; an amon mga saserdote, an katulinan ni Aaron, nag-aalagad kan Jehova, ngan an mga Levita nabulig ha buruhaton.
11 Ginpapaaso nira an mga halad nga sinunog para kan Jehova kada aga ngan kada pagsirom+ upod an mahamot nga insenso,+ ngan an ginturungbaw nga tinapay*+ aada ha lamesa nga puro nga bulawan, ngan an burutangan han lampara nga bulawan+ ngan an mga lampara hito ira gindadagkotan ha kada pagsirom,+ kay gintutuman namon an amon responsabilidad kan Jehova nga amon Dios; pero binaya kamo ha iya.
12 Yana kitaa! an tinuod nga Dios kaupod namon, nangunguna ha amon, kaupod an iya mga saserdote nga may mga trumpeta nga ginagamit ha pagpatunog hin sinyales ha pakiggirra kontra ha iyo. O kalalakin-an han Israel, ayaw kamo pakig-away kan Jehova nga Dios han iyo mga kaapoy-apoyan, kay diri kamo maglalampos.”+
13 Pero hi Jeroboam nagsugo hin mag-aambus tikang ha ira luyo, salit an iya kasundalohan nakadto ha atubangan han Juda ngan an mag-aambus nakadto ha ira luyo.
14 Han liningi an kalalakin-an han Juda, nakita nira nga kinahanglan makiggirra hira ha prente ngan ha luyo. Salit sininggit hira ngadto kan Jehova,+ samtang an mga saserdote nagpapatunog hin makusog han mga trumpeta.
15 Nagsinggit an kalalakin-an han Juda han singgit han pakiggirra, ngan pagsinggit han kalalakin-an han Juda han singgit han pakiggirra, ginpirde han tinuod nga Dios hi Jeroboam ngan an bug-os nga Israel ha atubangan ni Abias ngan han Juda.
16 An mga Israelita pinalagiw ha atubangan han Juda, ngan igintubyan hira han Dios ha ira kamot.
17 Damu gud ha ira an ginpamatay ni Abias ngan han iya katawohan, ngan an nagkamatay ha Israel 500,000 nga binansay* nga lalaki.
18 Salit an kalalakin-an han Israel hito nga panahon naalohan tungod han kapirde, pero an kalalakin-an han Juda an nagdaog kay sinarig* hira kan Jehova nga Dios han ira mga kaapoy-apoyan.+
19 Padayon nga ginlanat ni Abias hi Jeroboam ngan iya ginsakop an syudad han Bethel+ ngan an mga bungto nga sakop* hito, an Jesana ngan an mga bungto nga sakop hito, ngan an Efrain+ ngan an mga bungto nga sakop hito.
20 Ngan hi Jeroboam waray na gud magkaada utro hin gahum durante han panahon ni Abias; katapos, ginsirotan hiya ni Jehova ngan namatay hiya.+
21 Pero hi Abias nagtikakusog. Inabot an panahon nga nagkaada hiya 14 nga asawa,+ ngan nagkaada hiya 22 nga anak nga lalaki ngan 16 nga anak nga babaye.
22 Ngan an iba pa nga bahin han kasaysayan ni Abias, an iya mga ginbuhat ngan an iya mga ginsiring, nakarekord ha mga sinurat* han propeta nga hi Ido.+
Mga footnote
^ Lit., “pinili.”
^ Lit., “pinili.”
^ Karuyag sidngon, permanente ngan diri nagbabag-o nga kasabotan.
^ Lit., “nakanhi basi pun-on an iya kamot hin.”
^ Karuyag sidngon, an halad nga tinapay.
^ Lit., “pinili.”
^ Lit., “sinandig.”
^ O “nakapalibot.”
^ O “asoy; komentaryo.”
