An Ikaduha nga Libro han mga Cronicas 31:1-21
31 Kahuman gud nira hini ngatanan, ginawas ngadto ha mga syudad han Juda an ngatanan nga Israelita nga nakadto, ngan ira gindugmok an sagrado nga mga harigi,+ gin-utod an sagrado nga mga poste,*+ ngan ginbungkag an higtaas nga mga lugar+ ngan an mga halaran+ ha bug-os nga Juda ngan Benjamin, pati ha Efraim ngan Manases,+ tubtob nga bug-os nga nabungkag nira ito, katapos hito an ngatanan nga Israelita binalik ha ira mga syudad, an kada tagsa ngadto ha iya panag-iya.
2 Katapos, gintuinan ni Hezekias an mga saserdote ha ira mga grupo+ ngan an mga Levita ha ira mga grupo,+ an tagsa han mga saserdote ngan mga Levita para ha ira buruhaton,+ para ha mga halad nga sinunog ngan ha mga halad nga ginsasarosaroan, basi mag-alagad ngan magpasalamat ngan magdayaw dida ha mga ganghaan han mga bungsaran* ni Jehova.+
3 Usa ka parte han mga panag-iya han hadi an iginhatag para ha mga halad nga sinunog,+ pati na an mga halad ha aga ngan ha pagsirom,+ sugad man an mga halad nga sinunog para ha mga Sabbath,+ ha mga dulom,+ ngan ha mga piyesta,+ uyon ha nakasurat ha Balaud ni Jehova.
4 Dugang pa, iya ginsugo an katawohan nga naukoy ha Jerusalem nga ihatag an malon nga para ha mga saserdote ngan ha mga Levita,+ basi masunod nira hin maopay an* balaud ni Jehova.
5 Katapos gud ipagawas an sugo, an mga Israelita naghatag hin damu gud han siyahan nga mga bunga han lugas, bag-o nga bino, lana,+ ngan dugos, ngan han ngatanan nga produkto han uma;+ nagdara hira hin hura han ikanapulo han ngatanan nga butang.+
6 Ngan an katawohan han Israel ngan han Juda nga naukoy ha mga syudad han Juda nagdara liwat han ikanapulo han mga baka ngan karnero ngan han ikanapulo han baraan nga mga butang+ nga ginbaraan para kan Jehova nga ira Dios. Gindara nira ito ngan ginpundok-pundok ito ha damu nga tambak.
7 Ha ikatulo ka bulan+ hira nagtikang pagtambak-tambak han ira mga kontribusyon; ngan natapos hira ha ikapito ka bulan.+
8 Han hi Hezekias ngan an mga prinsipe inabot ngan nakita an mga tambak, gindayaw nira hi Jehova ngan ginbendisyonan an Israel nga iya katawohan.
9 Hi Hezekias nagpakiana ha mga saserdote ngan ha mga Levita mahitungod han mga tambak,
10 ngan hi Azarias nga punoan nga saserdote tikang ha panimalay ni Zadok nagsiring ha iya: “Tikang ha panahon nga nagdara hira hin mga kontribusyon ngadto ha balay ni Jehova,+ an katawohan nagpinangaon tubtob nga nabusog ngan may-ada pa damu nga sobra, kay ginbendisyonan ni Jehova an iya katawohan, ngan ini nga damu hinduro amo an nahisalin.”+
11 Katapos, ginsidngan hira ni Hezekias nga mag-andam hin mga bodega*+ ha balay ni Jehova, salit gin-andam nira ito.
12 Matinumanon nga nagdara hira han mga kontribusyon, han ikanapulo nga mga bahin,*+ ngan han baraan nga mga butang; hi Conanias nga Levita an gintuinan hini ngatanan sugad nga nagdudumara, ngan an iya bugto nga hi Simei amo an ikaduha.
13 Hira Jehiel, Azazias, Nahat, Asahel, Jerimot, Jozabad, Eliel, Ismakias, Mahat, ngan Benaias amo an mga kabulig ni Conanias ngan han iya bugto nga hi Simei, uyon ha sugo ni Hadi Hezekias, ngan hi Azarias an nagdudumara han balay han tinuod nga Dios.
14 Ngan hi Kore nga anak ni Imnah, an Levita nga parabantay han ganghaan ha este nga dapit,+ amo an nagdudumara han boluntaryo nga mga halad+ para ha tinuod nga Dios, ngan iya ginpanhatag an mga kontribusyon para kan Jehova+ ngan an pinakabaraan nga mga butang.+
15 Ngan ilarom ha iya pagdumara hira Eden, Miniamin, Jesua, Semaias, Amarias, ngan Secanias, dida ha mga syudad han mga saserdote,+ ha ginpundok-pundok ha ira nga buruhaton nga amo an pagbatagbatag para ha ira kabugtoan ha mga grupo,+ parapriho ha edaran ngan batan-on.
16 Dugang pa ini ha panhatag para ha mga lalaki nga tikang ha tres anyos tipaigbaw nga nakalista ha lista han katulinan, nga napakadto ha balay ni Jehova kada adlaw basi magserbi ngan magtuman han mga buruhaton han ira mga grupo.
17 An lista han katulinan han mga saserdote uyon ha ira panimalay,*+ sugad han kanan mga Levita nga 20 anyos tipaigbaw,+ uyon ha mga buruhaton han ira mga grupo.+
18 Upod ha lista han katulinan an ngatanan nira nga anak, an ira mga asawa, an ira mga anak nga lalaki, ngan an ira mga anak nga babaye, an ira bug-os nga kongregasyon—kay gintipigan nira an ira kalugaringon nga baraan para ha kon ano an baraan tungod han igintuin ha ira nga buruhaton kay matataporan hira—
19 sugad man han katulinan ni Aaron, an mga saserdote nga naukoy ha mga kapatagan han mga panabsaban nga nakapalibot ha ira mga syudad.+ Ha ngatanan nga syudad, may mga lalaki nga gintuinan ha paghatag hin pagkaon ha tagsa nga lalaki dida ha mga saserdote ngan ha ngatanan nga nakalista ha lista han katulinan han mga Levita.
20 Ginbuhat ini ni Hezekias ha bug-os nga Juda, ngan padayon nga nagbuhat hiya han maopay ngan husto, ngan nagin matinumanon hiya ha atubangan ni Jehova nga iya Dios.
21 Ngan an ngatanan nga buruhaton nga iya ginhimo ha pagpamiling han iya Dios, may kalabotan man ito ha pag-alagad ha balay han tinuod nga Dios+ o ha Balaud ngan ha sugo, bug-os-kasingkasing nga ginbuhat niya ito, ngan nagin malampuson hiya.
Mga footnote
^ Lit., “mga kampo.”
^ O “magin bug-os nga debotado hira ha.”
^ O “mga kwarto nga karaonan.”
^ O “ikanapulo.”
