An Ikaduha nga Libro han mga Hadi 21:1-26
21 Hi Manases+ 12 anyos han nagin hadi hiya, ngan nagmando hiya hin 55 ka tuig ha Jerusalem.+ An ngaran han iya nanay amo hi Hepziba.
2 Ginbuhat niya an maraot ha pagkita ni Jehova, iya ginsunod an mangil-ad nga mga buhat han mga nasud+ nga ginpaiwas ni Jehova ha atubangan han katawohan han Israel.+
3 Iya gintukod utro an higtaas nga mga lugar nga ginbungkag han iya tatay nga hi Hezekias,+ ngan nagtindog hiya hin mga halaran para kan Baal ngan naghimo hin sagrado nga poste,*+ sugad han ginbuhat ni Ahab nga hadi han Israel.+ Ngan nagyukbo hiya ha bug-os nga hugpo han langit ngan nag-alagad hito.+
4 Naghimo liwat hiya hin mga halaran ha balay ni Jehova,+ nga mahitungod hito hi Jehova nagsiring: “Ibubutang ko an akon ngaran ha Jerusalem.”+
5 Ngan naghimo hiya hin mga halaran para ha bug-os nga hugpo han langit+ ha duha nga bungsaran han balay ni Jehova.+
6 Ngan iya ginsunog ha kalayo* an iya mismo anak; nagbuhat hiya hin madyik, namiling hin mga tigaman,+ ngan nagpili hin mga espiritista ngan mga parapanigo.+ Damu an iya ginbuhat nga maraot ha pagkita ni Jehova, basi pasinahon hiya.
7 An inukit nga imahen han sagrado nga poste*+ nga iya ginhimo iya iginbutang didto ha balay nga mahitungod hito hi Jehova nagsiring kan David ngan ha iya anak nga hi Solomon: “Dinhi hini nga balay ngan ha Jerusalem, nga akon ginpili ha ngatanan nga tribo han Israel, ibubutang ko hin permanente an akon ngaran.+
8 Ngan diri ko na gud palalakatlakaton utro an Israel tikang ha tuna nga iginhatag ko ha ira mga kaapoy-apoyan,+ kon sundon nira hin maopay an ngatanan nga iginsugo ko ha ira,+ an bug-os nga Balaud nga kan Moises nga akon surugoon iginsugo ha ira nga sundon.”
9 Pero waray hira sumugot, ngan padayon nga iginsimang hira ni Manases, nga tungod ha iya nagbuhat hira hin mas maraot pa kay han mga nasud nga ginpoo ni Jehova ha atubangan han mga Israelita.+
10 Hi Jehova padayon nga nagyakan pinaagi han iya mga surugoon nga mga propeta,+ nga nasiring:
11 “Ginbuhat ni Manases nga hadi han Juda ini ngatanan nga mangil-ad nga butang; mas maraot pa an iya ginbuhat kay ha ngatanan nga Amorita+ nga nauna ha iya,+ ngan hiya an hinungdan han pakasala han Juda pinaagi han iya mangil-ad nga mga idolo.*
12 Salit ini an siring ni Jehova nga Dios han Israel: ‘Kitaa, magpapahinabo ako hin kadaot ha Jerusalem+ ngan Juda, nga tungod hito mahahadlok gud an* bisan hin-o nga makabati mahitungod hito.+
13 Ngan uunaton ko ha Jerusalem an higot nga isurukol+ nga gin-gamit ha Samaria+ ngan gagamiton ko an nibel* nga gin-gamit ha balay ni Ahab,+ ngan tatrapohan ko an Jerusalem basi maglimpyo, sugad han usa nga nagtatrapo hin yahong basi maglimpyo ngan kukulbon ito.+
14 Isasalikway ko an mga nahisalin ha akon panurundon+ ngan igtutubyan ko hira ha kamot han ira mga kaaway, ngan hira magigin bihag ngan dinag-an han ngatanan nira nga kaaway,+
15 kay ginbuhat nira an maraot ha akon pagkita ngan padayon nga ginpapasina ako tikang ha adlaw nga ginawas ha Ehipto an ira mga kaapoy-apoyan tubtob hini nga adlaw.’”+
16 Damu liwat hinduro nga inosente nga tawo an ginpamatay* ni Manases tubtob nga napuno niya an Jerusalem tikang ha usa nga kataposan tubtob ha luyo nga kataposan,+ labot pa han iya sala nga hiya an hinungdan han pakasala han Juda pinaagi ha pagbuhat han maraot ha pagkita ni Jehova.
17 Mahitungod han iba pa nga bahin han kasaysayan ni Manases ngan han ngatanan nga iya ginbuhat ngan han mga sala nga iya ginbuhat, diri ba iginsurat ito ha libro han kasaysayan han mga panahon han mga hadi han Juda?
18 Katapos, hi Manases pinahuway kaupod han iya mga kaapoy-apoyan ngan iginlubong ha garden han iya balay, ha garden han Uza;+ ngan an iya anak nga hi Amon an nagin hadi kasaliwan niya.
19 Hi Amon+ 22 anyos han nagin hadi hiya, ngan nagmando hiya hin duha ka tuig ha Jerusalem.+ An ngaran han iya nanay amo hi Mesulemet nga anak ni Haruz nga taga-Jotba.
20 Padayon nga ginbuhat niya an maraot ha pagkita ni Jehova, sugad han ginbuhat han iya tatay nga hi Manases.+
21 Padayon nga ginsunod niya an ngatanan nga dalan nga ginsunod han iya tatay, ngan padayon hiya nga nag-alagad ngan nagyukbo ha mangil-ad nga mga idolo nga gin-alagaran han iya tatay.+
22 Salit ginbayaan niya hi Jehova nga Dios han iya mga kaapoy-apoyan, ngan waray hiya maglakat ha dalan ni Jehova.+
23 Ha urhi, an mga surugoon ni Amon nagkunsabo kontra ha iya ngan ginpatay an hadi ha iya mismo balay.
24 Pero ginpamatay han katawohan han tuna an ngatanan nga nagkunsabo kontra kan Hadi Amon, ngan ira ginhimo nga hadi an iya anak nga hi Josias kasaliwan niya.+
25 Mahitungod han iba pa nga bahin han kasaysayan ni Amon, kon ano an iya ginbuhat, diri ba iginsurat ito ha libro han kasaysayan han mga panahon han mga hadi han Juda?
26 Salit ira iginlubong hiya ha iya lubnganan ha garden han Uza,+ ngan an iya anak nga hi Josias+ an nagin hadi kasaliwan niya.
Mga footnote
^ Lit., “ginpaagi ha kalayo.”
^ An Hebreo nga termino bangin may koneksyon ha pulong para ha “tai” ngan gin-gagamit sugad nga pagtamay.
^ Lit., “manggigirabo an mga talinga han.”
^ O “tunton.”
^ Lit., “inosente nga dugo an ginpaagay.”
