An Ikaduha nga Libro ni Samuel 10:1-19
-
Kadaogan ha Ammon ngan Sirya (1-19)
10 Ha urhi, namatay an hadi han mga Ammonita,+ ngan an iya anak nga hi Hanun an nagin hadi kasaliwan niya.+
2 Ngan nagsiring hi David: “Magpapakita ako hin maunungon nga gugma kan Hanun nga anak ni Nahas sugad la nga an iya tatay nagpakita hin maunungon nga gugma ha akon.” Salit ginsugo ni David an iya mga surugoon basi liawon hiya tungod han kamatay han iya tatay. Pero han an mga surugoon ni David sinulod ha tuna han mga Ammonita,
3 an mga prinsipe han mga Ammonita nagsiring kan Hanun nga ira ginoo: “Kahuna mo ba nga ginpapasidunggan ni David an imo tatay pinaagi ha pagsugo hin mga magliliaw ha imo? Diri ba ginsugo ni David nganhi ha imo an iya mga surugoon basi usisahon an syudad ngan mag-espiya dinhi ngan bungkagon ini?”
4 Salit ginkuha ni Hanun an mga surugoon ni David ngan gin-ahitan an katunga han ira mga bungot+ ngan gin-utod an katunga han ira mga bado tubtob ha ira bubot ngan ginpalakat hira.
5 Han iginsumat ito kan David, nagsugo dayon hiya hin kalalakin-an basi tapoon hira, kay naalohan gud hira; ngan an hadi nagsiring ha ira: “Didto la anay kamo ha Jerico+ tubtob nga tumubo utro an iyo mga bungot, ngan katapos, balik kamo.”
6 Paglabay han panahon, nakita han mga Ammonita nga nangangalas gud hi David ha ira, salit an mga Ammonita nagpadara ngan nagsuhol hin mga Siryano han Bet-rehob+ ngan hin mga Siryano han Zoba,+ 20,000 nga nagbabaktas nga sundalo; ngan han hadi han Maaca,+ upod an 1,000 nga lalaki; ngan hin 12,000 nga lalaki tikang ha Istob.*+
7 Han nakabati hi David mahitungod hito, iya ginsugo hi Joab ngan an ngatanan nga sundalo, pati na an iya pinakamagkusog nga mga girriro.+
8 Ngan an mga Ammonita ginawas ngan pinwesto basi makiggirra didto ha aragian tipasulod ha ganghaan han syudad samtang an mga Siryano han Zoba ngan han Rehob, pati na han Istob* ngan han Maaca, nakadto ha kapatagan nga bulag ha ira.
9 Han nakita ni Joab nga an nasulong nga kasundalohan naatake ha iya tikang ha prente ngan ha luyo, ginpili niya an pipira han pinakamag-opay nga mga sundalo ha Israel ngan ginpapwesto hira basi tapoon an mga Siryano.+
10 An iba pa nga kalalakin-an iya iginbutang ilarom han pagpanguna* han iya bugto nga hi Abisai,+ para papwestuhon hira basi tapoon an mga Ammonita.+
11 Katapos, nagsiring hiya: “Kon an mga Siryano magin mas makusog kay ha akon, kinahanglan buligan mo ako; pero kon an mga Ammonita magin mas makusog kay ha imo, bubuligan ko ikaw.
12 Kinahanglan magin marig-on ngan maisugon+ kita para ha aton katawohan ngan para ha mga syudad han aton Dios, ngan bubuhaton ni Jehova kon ano an maopay ha iya pagkita.”+
13 Katapos, gintapo ni Joab ngan han iya mga tawo an mga Siryano ngan nakiggirra ha ira, ngan namalagiw hira tikang ha iya atubangan.+
14 Han nakita han mga Ammonita nga namalagiw na an mga Siryano, namalagiw hira tikang kan Abisai ngan sinulod ha syudad. Katapos hini, binaya hi Joab ha mga Ammonita ngan binalik ha Jerusalem.
15 Han nakita han mga Siryano nga napirde na hira han Israel, nagtirirok hira utro.+
16 Salit iginpatawag ni Hadadezer+ an mga Siryano ha rehiyon han Salog,*+ katapos, kinadto hira ha Helam, ngan hi Sobac nga lider han kasundalohan ni Hadadezer an nangunguna ha ira.
17 Han iginsumat ito kan David, gintirok dayon niya an bug-os nga Israel ngan tinabok ha Jordan ngan kinadto ha Helam. Katapos, an mga Siryano pinwesto basi tapoon hi David ngan nakiggirra hira ha iya.+
18 Kondi an mga Siryano namalagiw tikang ha Israel; ngan ginpamatay ni David an 700 nga parapadalagan hin karuwahe ngan 40,000 nga parapangabayo nga mga Siryano, ngan iya liwat ginpatay hi Sobac nga lider han ira kasundalohan.+
19 Han nakita han ngatanan nga hadi, nga mga surugoon ni Hadadezer, nga napirde na hira han Israel, nakigmurayaw dayon hira ha Israel ngan nagin ira mga sakop;+ ngan an mga Siryano nahadlok na pagbulig ha mga Ammonita.
Mga footnote
^ O “kalalakin-an han Tob.”
^ O “kalalakin-an han Tob.”
^ Lit., “ha kamot.”
^ Karuyag sidngon, an Eufrates.
