An Ikaduha nga Libro ni Samuel 5:1-25
5 Paglabay han panahon, an ngatanan nga tribo han Israel kinadto kan David ha Hebron+ ngan nagsiring: “Kitaa! Imo kami kalugaringon nga tul-an ngan unod.*+
2 Ha naglabay nga mga panahon han hi Saul pa an amon hadi, ikaw an nangunguna ha Israel ha mga pakiggirra hito.*+ Ngan hi Jehova nagsiring ha imo: ‘Ikaw an mag-aataman* ha Israel nga akon katawohan, ngan ikaw an magigin lider han Israel.’”+
3 Salit an ngatanan nga tigurang han Israel kinadto ha hadi didto ha Hebron, ngan hi Hadi David naghimo hin kasabotan kaupod nira+ ha Hebron ha atubangan ni Jehova. Katapos, ira gindihogan hi David sugad nga hadi han Israel.+
4 Hi David 30 anyos han nagin hadi hiya, ngan naghadi hiya ha sulod hin 40 ka tuig.+
5 Ha Hebron naghadi hiya ha Juda hin 7 ka tuig ngan 6 ka bulan, ngan ha Jerusalem+ naghadi hiya hin 33 ka tuig ha bug-os nga Israel ngan Juda.
6 Ngan an hadi ngan an iya mga tawo kinadto ha Jerusalem basi makiggirra ha mga Jebusita+ nga naukoy hito nga tuna. Ira gintamay hi David: “Diri ka gud makakasulod ngadi! Paiiwason ka bisan han mga buta ngan han mga piay.” Naghunahuna hira, ‘Diri gud makakasulod dinhi hi David.’+
7 Kondi ginsakop ni David an balwarte han Zion, nga amo yana an Syudad ni David.+
8 Salit hito nga adlaw nagsiring hi David: “An mga masulong ha mga Jebusita sadang umagi ha tanel han tubig basi pamatayon ‘an mga piay ngan an mga buta,’ nga ginkakangalasan ni David!”* Ito an hinungdan kon kay ano nga ini an ginsisiring: “An mga buta ngan an mga piay diri gud makakasulod ha balay.”
9 Katapos, hi David inukoy ha balwarte, ngan gintawag ito* nga Syudad ni David; ngan hi David nagtikang pagtukod hin mga pader ngan hin iba pa nga mga istraktura ha Bungtod*+ ngan ha iba pa nga mga bahin han syudad.+
10 Hito nga paagi hi David padayon nga nagtikabantog,+ ngan kaupod niya hi Jehova nga Dios han mga hugpo.+
11 Hi Hadi Hiram+ han Tiro nagpadara hin mga mensahero ngadto kan David, pati na hin mga kahoy nga sedro,+ mga panday, ngan mga mason basi magtukod hin mga pader, ngan nagtikang hira pagtukod hin balay* para kan David.+
12 Ngan maaram hi David nga marig-on nga gin-establisar ni Jehova an iya posisyon sugad nga hadi ha Israel+ ngan ginpahitaas Niya an iya ginhadian+ para ha Israel nga Iya katawohan.+
13 Nagkuha hi David hin damu pa nga babaye*+ ngan mga asawa ha Jerusalem katapos niya umabot tikang ha Hebron, ngan nadugangan pa an mga anak nga lalaki ngan mga anak nga babaye ni David.+
14 Ini an mga ngaran han iya mga anak nga natawo ha Jerusalem: hira Sammua, Sobab, Nathan,+ Solomon,+
15 Ibhar, Elisua, Nefeg, Jafia,
16 Elisama, Eliada, ngan Elifelet.
17 Han hinbatian han mga Filisteo nga gindihogan na hi David sugad nga hadi han Israel,+ an ngatanan nga Filisteo nagkasagka basi pamilngon hi David.+ Han hinbatian ni David an mahitungod hito, linugsad hiya ngadto ha iya arayopan.+
18 Katapos, an mga Filisteo nagkaabot ngan naglibot-libot ha Walog* han Refaim.+
19 Hi David nagpakiana kan Jehova,+ nga nasiring: “Sadang ba ako sumagka basi makiggirra ha mga Filisteo? Ihahatag mo ba hira ha akon kamot?” Hi Jehova binaton kan David: “Sagka, kay ihahatag ko gud ha imo kamot an mga Filisteo.”+
20 Salit hi David kinadto ha Baal-perazim, ngan ginpamatay hira ni David didto. Ngan nagsiring hiya: “Gin-guhangan ni Jehova an rumbay han akon mga kaaway+ ha akon atubangan, pariho hin guhang nga nahihimo han katubigan.” Ito an hinungdan kon kay ano nga ginngaranan niya ito nga lugar hin Baal-perazim.*+
21 Ginbayaan han mga Filisteo an ira mga idolo didto, ngan ginkuha ito ni David ngan han iya mga tawo.
22 Ha urhi, an mga Filisteo nagkasagka utro ngan naglibot-libot ha Walog* han Refaim.+
23 Hi David nagpakiana kan Jehova, pero nagsiring Hiya: “Ayaw pagdiretso pagsagka. Lugod, libot ha ira luyo, ngan sulonga hira ha atubangan han kakahoyan nga baca.
24 Ngan kon mabatian mo tikang ha bawbaw han kakahoyan nga baca an tunog nga sugad hin nagmamartsa, gios dayon, kay hi Jehova nag-una na ha imo basi pamatayon an kasundalohan han mga Filisteo.”
25 Salit ginbuhat ni David an iginsugo ha iya ni Jehova, ngan iya ginpamatay an mga Filisteo+ tikang ha Geba+ tubtob ha Gezer.+
Mga footnote
^ O “Imo kami mga kadugo.”
^ Lit., “an naggagawas ngan an nagsusulod han Israel.”
^ O “han kalag ni David.”
^ O posible nga “ngan gintawag niya ito.”
^ O “Milo.” Usa nga Hebreo nga termino nga nangangahulogan nga “pantambak.”
^ O “palasyo.”
^ O “Hamubo nga Kapatagan.”
^ Nangangahulogan nga “Agaron han mga Pagguhang.”
^ O “Hamubo nga Kapatagan.”
