An Ikaduha nga Libro ni Samuel 9:1-13
-
Maunungon nga gugma ni David kan Mefiboset (1-13)
9 Katapos, hi David nagsiring: “May nahibibilin pa ba ha panimalay ni Saul nga mahimo ko pakitaan hin maunungon nga gugma tungod kan Jonathan?”+
2 Yana may surugoon ha panimalay ni Saul nga an ngaran amo hi Ziba.+ Salit ira hiya iginpatawag ngadto kan David, ngan an hadi nagpakiana ha iya: “Ikaw ba hi Ziba?” Binaton hiya: “Imo ako surugoon.”
3 An hadi nagpadayon: “May nahibibilin pa ba ha panimalay ni Saul nga mahimo ko pakitaan han maunungon nga gugma han Dios?” Hi Ziba binaton ha hadi: “May nahibibilin pa nga usa nga anak nga lalaki hi Jonathan; baldado* an iya duha nga tiil.”+
4 An hadi nagpakiana ha iya: “Hain hiya?” Hi Ziba binaton ha hadi: “Aadto hiya ha balay ni Makir+ nga anak nga lalaki ni Amiel ha Lo-debar.”
5 Hi Hadi David nagpasugo dayon ngadto ha iya ngan iginpakuha hiya tikang ha balay ni Makir nga anak ni Amiel ha Lo-debar.
6 Han hi Mefiboset nga anak ni Jonathan nga anak ni Saul inabot kan David, yinukbo dayon hiya ngan hinapa. Katapos, hi David nagsiring: “Mefiboset!” ngan binaton hiya: “Iini an imo surugoon.”
7 Hi David nagsiring ha iya: “Ayaw kahadlok, kay magpapakita gud ako ha imo hin maunungon nga gugma+ tungod kan Jonathan nga imo tatay, ngan ibabalik ko ha imo an bug-os nga tuna ni Saul nga imo lolo, ngan pirme ka makaon* ha akon lamesa.”+
8 Tungod hito hinapa hiya ngan nagsiring: “Ano ba an imo surugoon, nga imo man iginhatag an imo atensyon* ha patay nga ayam+ sugad ha akon?”
9 Yana iginpatawag han hadi hi Ziba, nga kabulig ni Saul, ngan nagsiring ha iya: “An ngatanan nga panag-iya ni Saul ngan han bug-os niya nga panimalay akon iginhahatag ha apo han imo agaron.+
10 Mag-uuma ka han tuna para ha iya—ikaw ngan an imo mga anak nga lalaki ngan an imo mga surugoon—ngan titirukon mo an mga produkto hito basi magtagana hin pagkaon para ha panimalay han apo han imo agaron. Kondi hi Mefiboset, nga apo han imo agaron, pirme makaon ha akon lamesa.”+
Hi Ziba may-ada 15 nga anak nga lalaki ngan 20 nga surugoon.+
11 Katapos, hi Ziba nagsiring ha hadi: “Bubuhaton han imo surugoon an ngatanan nga iginsusugo han akon ginoo nga hadi nga buhaton han iya surugoon.” Salit hi Mefiboset kinaon ha lamesa ni David* pariho han usa han mga anak nga lalaki han hadi.
12 Hi Mefiboset may-ada liwat bata pa nga anak nga lalaki nga an ngaran amo hi Mica;+ ngan an ngatanan nga naukoy ha balay ni Ziba nagin mga surugoon ni Mefiboset.
13 Ngan hi Mefiboset inukoy ha Jerusalem, kay pirme hiya nakaon ha lamesa han hadi;+ ngan baldado an iya duha nga tiil.+
Mga footnote
^ O “piay.”
^ Lit., “makaon hin tinapay.”
^ Lit., “iginlingi an imo nawong.”
^ O posible nga “akon lamesa.”
