An Ikaduha nga Surat ha mga Taga-Tesalonica 3:1-18
3 Ha kataposan, mga kabugtoan, padayon nga ig-ampo kami niyo,+ basi an pulong ni Jehova* padayon nga maipasamwak hin madagmit+ ngan mahimaya, sugad han nahitatabo dida ha iyo,
2 ngan basi matalwas kami tikang ha peligroso ngan magraot nga mga tawo,+ kay diri ngatanan nga tawo may pagtoo.+
3 Pero an Ginoo matinumanon, ngan paririg-unon kamo niya ngan papanalipdan kamo tikang ha usa nga maraot.
4 Dugang pa, may pagsarig kami ha Ginoo may kalabotan ha iyo, nga ginsusunod niyo ngan padayon nga susundon an amon mga instruksyon.
5 Hinaot an Ginoo padayon nga maggiya ha iyo kasingkasing hin malampuson ngadto ha gugma ha Dios+ ngan ha pagpailob+ para ha Kristo.
6 Yana mga kabugtoan, gintatagan namon kamo hin mga instruksyon ha ngaran han aton Ginoo nga hi Jesu-Kristo, nga maglikay kamo ha tagsa nga bugto nga nagpipinasaway+ ngan diri nasunod ha tradisyon* nga iyo* nakarawat tikang ha amon.+
7 Kay kamo mismo maaram kon paonan-o kamo sadang magsubad ha amon,+ kay waray kami magpinasaway ha iyo,
8 waray liwat namon kaona hin libre* an pagkaon han bisan hin-o.+ Lugod, pinaagi han makuri nga trabaho ngan duro nga kakapoy nagtrabaho kami ha gab-i ngan adlaw basi diri makapabug-at ha pinansyal ha bisan hin-o ha iyo.+
9 Diri nga waray kami awtoridad,+ kondi karuyag namon nga ipakita ha iyo an amon kalugaringon sugad nga ehemplo basi iyo subaron.+
10 Ha pagkamatuod, han kaupod pa kami niyo, ini na an amon iginsusugo ha iyo: “Kon may nadiri pagtrabaho, ayaw liwat hiya pakaona.”+
11 Kay hinbatian namon nga may pipira dida ha iyo nga nagpipinasaway,+ nga diri gud nagtatrabaho, lugod nanginginlabot ha mga butang nga waray hira labot.+
12 Ha sugad nga mga tawo nagsusugo kami ngan sinsero nga nagsasagdon ha ngaran han Ginoo nga hi Jesu-Kristo nga sadang hira magtrabaho nga diri nakakadisturbo ngan kumaon han pagkaon nga ira mismo gintrabahoan.+
13 Ha iyo bahin, mga kabugtoan, ayaw kamo pag-undang* ha pagbuhat han maopay.
14 Pero kon may diri nasugot ha amon ginsisiring pinaagi hini nga surat, tigamni niyo hiya ngan ayaw na pakig-upod ha iya,+ basi maawod hiya.
15 Kondi ayaw hiya tagda nga kaaway, lugod padayon nga sagdoni hiya+ sugad nga bugto.
16 Yana, hinaot an Ginoo han kamurayawan maghatag pirme ha iyo hin kamurayawan ha ngatanan nga paagi.+ Hinaot an Ginoo umupod ha iyo ngatanan.
17 Ako, hi Pablo, ako an nagsurat hini nga akon pangumusta,+ nga amo an pangirilal-an han ngatanan ko nga surat; amo ini an akon agi.
18 Hinaot makarawat niyo ngatanan an diri matupngan nga pagkabuotan han aton Ginoo nga hi Jesu-Kristo.
Mga footnote
^ O “instruksyon.”
^ O posible nga “ira.”
^ O “nga waray bayari.”
^ Ha iba nga lugar, “pagtuko.”
