An Ikaduha nga Surat kan Timoteo 3:1-17
3 Pero hibaroi ini nga ha kataposan nga mga adlaw+ maabot an peligroso nga mga panahon nga makuri pakiangayan.
2 Kay an mga tawo magigin mahigugmaon ha ira kalugaringon, mahigugmaon ha kwarta, hambog, mapahitas-on, mapasiparahon, diri masinugtanon ha mga kag-anak, diri mapasalamaton, diri maunungon,
3 waray kinaiya nga gugma, diri naruruyag ha bisan ano nga pakigsabot, mga parapakaraot, waray pagpugong ha kalugaringon, mapintas, waray gugma ha kaopayan,
4 mga traydor, matig-a an ulo, mahilig magrakudaku, mahigugmaon ha kalipayan imbes nga mahigugmaon ha Dios,
5 diosnon pagkit-on pero diri nagkikinabuhi uyon ha gahum hito;+ pahirayo hini ngatanan.
6 Kay ha ira nagtitikang an mga tawo nga tuso nga nasulod ha mga panimalay ngan ginbibihag nira an magluya nga kababayin-an nga nabubug-atan han ira mga sala, nga nadadara han iba-iba nga mga hingyap,
7 pirme nag-aaram pero diri gud nagkakaada husto nga kahibaro han kamatuoran.
8 Yana sugad la nga ginkontra nira Jannes ngan Jambres hi Moises, padayon liwat nira nga ginkukontra an kamatuoran. An sugad nga mga tawo bug-os nga nadaot an panhunahuna, waray uyuni may kalabotan ha pagtoo.
9 Labot pa, diri hira mag-uuswag, kay an ira katuyawan* makaklaro gud han ngatanan, pariho ha katuyawan hiton duha nga lalaki.+
10 Pero ginsunod mo hin maopay an akon igintutdo, an akon pagkinabuhi,+ an akon katuyoan, an akon pagtoo, an akon pagkapasensyoso, an akon gugma, an akon pagpailob,
11 ngan maaram ka han mga pagtimaraot ngan mga pag-antos nga akon naeksperyensyahan ha Antiokia,+ ha Iconio,+ ha Listra.+ Gin-ilob ko ini nga mga pagtimaraot, ngan gintalwas ako han Ginoo tikang hini ngatanan.+
12 Ha pagkamatuod, pagtitimarauton liwat an ngatanan nga naghihingyap magkinabuhi nga may debosyon ha Dios sugad nga mga disipulo ni Kristo Jesus.+
13 Pero an magraot nga mga tawo ngan mga impostor mas magtitikaraot pa gud, nanlilimbong ngan nalilimbongan.+
14 Pero ikaw, padayon nga buhata an mga butang nga imo hinbaroan ngan nakombinse ka nga toohan,+ kay maaram ka kon hin-o an nagtutdo hito ha imo
15 ngan tikang han minasus-an+ ka pa hinbaroan mo an baraan nga mga sinurat,+ nga nakakahimo ha imo nga magin maaramon para ha katalwasan pinaagi han pagtoo kan Kristo Jesus.+
16 An ngatanan nga Kasuratan giniyahan han Dios+ ngan mapulsanon ha pagtutdo,+ ha pagsaway, ha pagtadong han mga butang, ha pagdisiplina uyon ha katadongan,+
17 basi an surugoon han Dios magin bug-os nga may kapas, magin andam gud ha tagsa nga maopay nga buhat.
Mga footnote
^ O “kalurongan.”
