Mga Buhat han mga Apostol 12:1-25
12 Hito nga panahon, hi Herodes nga hadi nagtikang pagtimaraot ha pipira nga membro han kongregasyon.+
2 Ginpatay niya pinaagi han espada+ hi Santiago nga bugto ni Juan.+
3 Han nakita niya nga nalipay hito an mga Judio, gin-aresto liwat niya hi Pedro. (Durante ini han mga adlaw han Tinapay nga Waray Libadura.)+
4 Gindakop niya hiya ngan ginpriso,+ nga ginpapabantayan hiya ha upat nga grupo han mga sundalo nga nagsusurosaliwan pagbantay, nga tag-upat an kada grupo, kay karuyag ni Herodes nga dad-on hiya* ha atubangan han mga tawo katapos han Paskua.
5 Salit nagpabilin hi Pedro ha prisohan, pero an kongregasyon naniniguro ha pag-inampo ha Dios para ha iya.+
6 Han hirani na hiya dad-on ni Herodes, hito nga gab-i nakaturog hi Pedro nga nakagapos hin duha nga kadena ha butnga han duha nga sundalo, ngan may mga gwardya ha atubangan han purtahan nga nagbabantay ha prisohan.
7 Kondi kitaa! an anghel ni Jehova* nagtitinindog didto,+ ngan naglamrag an selda han prisohan. Gintapik niya hi Pedro ha kagiliran basi pukawon hiya, nga nasiring: “Pagdagmit pagbuhát!” Ngan natangtang an mga kadena ha iya mga kamot.+
8 Ginsidngan hiya han anghel: “Pagbado* ngan isul-ot an imo sandalyas.” Ginbuhat niya ito. Katapos nagsiring an anghel ha iya: “Isul-ot an imo pantungbaw nga bado ngan padayon nga sundi ako.”
9 Ngan ginawas hiya ngan padayon nga nagsinunod ha anghel, pero diri hiya maaram nga tinuod an nahitatabo pinaagi han anghel. Ngani, kahuna niya nga nakakakita hiya hin bisyon.
10 Ginlabyan nira an siyahan ngan ikaduha nga grupo han mga gwardya tubtob nga nakaabot hira ha puthaw nga ganghaan nga tipakadto ha syudad, ngan naglugaring ito pag-abri para ha ira. Pakagawas nira, nagpadayon hira ngadto ha usa nga kalye, ngan tigda nga binulag ha iya an anghel.
11 Ngan hi Pedro, han pakasantop niya kon ano an nahitatabo, nagsiring: “Yana nasasabtan ko na gud nga ginsugo ni Jehova* an iya anghel ngan gintalwas ako tikang ha kamot ni Herodes ngan tikang ha ngatanan nga ginlalaoman han mga Judio nga mahitabo.”+
12 Pakasantop niya hini, kinadto hiya ha balay ni Maria nga nanay ni Juan nga gintatawag nga Marcos,+ diin damu an nagkakatirok ngan nag-iinampo.
13 Pagtuktok niya ha purtahan han ganghaan, kinadto an surugoon nga babaye nga Roda an ngaran basi kitaon kon hin-o ito.
14 Han nakilala niya an tingog ni Pedro, nalipay gud hiya salit waray niya maabrihi an ganghaan, kondi dinalagan hiya tipasulod ngan nagsumat nga hi Pedro nagtitinindog ha may ganghaan.
15 Ginsidngan nira hiya: “Nalulurong ka na.” Pero padayon nga nag-insister hiya nga tinuod ito. Nagsiring hira: “Anghel niya ito.”
16 Pero nagpabilin didto hi Pedro, nga nagtitinuktok. Pag-abri nira ha purtahan, nakita nira hiya ngan nahipausa gud hira.
17 Kondi ginsinyasan niya hira nga magmingaw ngan detalyado nga ginsumatan hira kon paonan-o hiya igin-gawas ni Jehova* ha prisohan, ngan nagsiring hiya: “Isumat ini nga mga butang kan Santiago+ ngan ha kabugtoan.” Katapos ginawas hiya ngan kinadto ha iba nga lugar.
18 Pagkaaga, nagkarigumok an mga sundalo kon ano an nahitabo kan Pedro.
19 Ginbiniling gud hiya ni Herodes, ngan han waray niya hiya hiagii, gin-imbistigar niya an mga gwardya ngan nagsugo nga sirotan hira;+ ngan tikang ha Judea linugsad hiya ngadto ha Cesarea ngan nagpabilin didto hin pipira ka panahon.
20 Yana nasisina hiya ha mga tawo han Tiro ngan Sidon. Salit kinadto hira ha iya nga may uusa nga katuyoan, ngan katapos nira kombinsihon hi Blasto, an nagdudumara han mga buruhaton ha panimalay han hadi,* naghangyo hira nga makigmurayaw ha hadi, kay an ira nasud ginsusuplayan hin pagkaon tikang ha nasud han hadi.
21 Ha usa nga itinanda nga adlaw, nagsul-ot hi Herodes hin panhadi nga bado ngan liningkod ha lingkoran han paghukom ngan nagtikang pagpahayag ha ira.
22 Katapos, an mga tawo nga nagkakatirok nagtikang pan-gugliat: “Tingog ini hin dios, ngan diri han tawo!”
23 Ginhampak dayon hiya han anghel ni Jehova,* kay an himaya waray niya ihatag ha Dios, ngan ginkaon hiya hin mga ulod ngan namatay.
24 Pero an pulong ni Jehova* padayon nga nag-uswag ngan nagsarang.+
25 May kalabotan kanda Bernabe+ ngan Saul, katapos nira mabuhat hin bug-os an paghatag hin bulig ha Jerusalem,+ binalik hira ngan igin-upod hi Juan,+ an gintatawag liwat nga Marcos.
