Daniel 10:1-21
10 Ha ikatulo ka tuig ni Hadi Ciro+ han Persia, may iginpahayag kan Daniel, nga gintatawag ha ngaran nga Beltesazar;+ ngan tinuod an mensahe, ngan mahitungod ito hin daku nga araway. Ngan nasabtan niya an mensahe ngan iginpasabot ha iya an iya nakita.
2 Hito nga mga adlaw ako, hi Daniel, tulo na ka semana nga masurub-on.+
3 Waray ako kumaon hin marasa nga pagkaon, ngan waray karne o bino nga sinulod ha akon baba, ngan waray ako magpahid hin bisan ano nga lana ha sulod hin tulo ka semana.
4 Ha ika-24 ka adlaw han siyahan nga bulan, samtang nakadto ako ha ligid han daku nga salog, an Tigris,*+
5 hinangad ako ngan nakita ko an usa nga lalaki nga nakasul-ot hin lino,+ ngan ha iya hawak* may nakatakgong nga paha nga bulawan tikang ha Upaz.
6 An iya lawas pariho hin bato nga krisolito,+ an iya nawong sugad han kidlat pagkit-on, an iya mga mata pariho hin naglalaga nga mga sulô, an iya mga butkon ngan mga tiil pariho pagkit-on han pinainggat nga tumbaga,*+ ngan an kadaku han iya tingog pariho kadaku han tingog han damu nga tawo.
7 Ako la, hi Daniel, an nakakita han bisyon; an kalalakin-an nga kaupod ko waray makakita han bisyon.+ Pero nangurog gud hira, ngan nandadlagan hira ngan nanago.
8 Katapos ako na la an nahibilin, ngan han nakita ko inin daku nga bisyon, nanluya ako hinduro ngan nanuas gud an akon nawong ngan nawad-an ako hin kusog.+
9 Katapos hinbatian ko an tingog niya nga nagyayakan; pero han hinbatian ko hiya nga nagyayakan, nahingaturog ako hin hilarom nga an akon nawong nakulob ha tuna.+
10 Kondi katapos hito, may kamot nga kinapot ha akon,+ ngan ginpukaw ako hito basi bumuhát ako pinaagi han akon mga kamot ngan mga tuhod.
11 Katapos nagsiring hiya ha akon:
“O Daniel, ikaw nga presyoso gud* nga tawo,+ pamati hin maopay ha akon igsisiring ha imo. Yana tindog ha imo hinmumutangan, kay ginsugo ako nganhi ha imo.”
Han ginsiring niya ini ha akon, tinindog ako nga nangungurog.
12 Katapos nagsiring hiya ha akon: “Ayaw kahadlok,+ O Daniel. An imo mga pulong ginpamatian tikang pa han siyahan nga adlaw nga marig-on ka nga nagdesisyon nga magkaada hin pagsabot ngan magpaubos ha atubangan han imo Dios, ngan kinanhi ako tungod han imo mga pulong.+
13 Pero an prinsipe+ han ginhadian han Persia nag-ulang ha akon ha sulod hin 21 ka adlaw. Kondi hi Miguel,*+ nga usa han nangunguna nga mga prinsipe,* inabot basi buligan ako; ngan nagpabilin ako didto sapit han mga hadi han Persia.
14 Kinanhi ako basi ipasabot ha imo an mahitatabo ha imo katawohan ha ultimo nga bahin han mga adlaw,+ kay usa ito nga bisyon mahitungod han mahitatabo ha maabot nga mga adlaw.”+
15 Han ginyakan niya ha akon ini nga mga pulong, dinuko ako ha tuna ngan waray makayakan.
16 Katapos, usa nga pariho hin lalaki pagkit-on an nagkapot han akon mga im-im,+ ngan akon iginbuka an akon baba ngan nagsiring ha iya nga natindog ha akon atubangan: “Ginoo ko, nangungurog ako tungod han bisyon, ngan waray ako kusog.+
17 Salit paonan-o an surugoon han akon ginoo makikiistorya ha akon ginoo?+ Kay waray na ako kusog, ngan waray na gininhawa nga nabibilin ha akon.”+
18 Hiya nga pariho hin lalaki pagkit-on nagkapot utro ha akon ngan ginpakusog ako.+
19 Katapos nagsiring hiya: “Ayaw kahadlok,+ O presyoso gud* nga tawo.+ Magkaada ka unta kamurayawan.+ Magin makusog ka, oo, magin makusog ka.” Samtang nakikiistorya hiya ha akon nagin makusog ako ngan nagsiring: “Pagyakan ginoo ko, kay ginpakusog mo ako.”
20 Katapos nagsiring hiya: “Maaram ka ba kon kay ano nga kinanhi ako ha imo? Yana mabalik ako basi makig-away ha prinsipe han Persia.+ Pagbaya ko, maabot an prinsipe han Gresya.
21 Kondi susumatan ko ikaw han mga butang nga iginrekord ha mga libro han kamatuoran. Waray bisan hin-o nga nabulig gud ha akon hini nga mga butang kondi hi Miguel,+ an iyo prinsipe.+
Mga footnote
^ Lit., “Hidekel.”
^ Ha iba nga lugar, “kupsan.”
^ Ha Ingles, copper.
^ O “makaruruyag gud; talahuron gud.”
^ Nangangahulogan nga “Hin-o an Pariho han Dios?”
^ O “usa nga prinsipe ha gihitaasi nga ranggo.”
^ O “makaruruyag gud; talahuron gud.”
