Daniel 5:1-31
5 May kalabotan kan Hadi Belsazar,+ nag-andam hiya hin daku nga panagtawo para ha 1,000 han iya mga dungganon, ngan nag-iininom hiya hin bino ha ira atubangan.+
2 Hi Belsazar, nga nakainom, nagsugo nga dad-on ha iya an mga surudlan nga bulawan ngan silber nga ginkuha han iya amay nga hi Nabucodonosor tikang ha templo ha Jerusalem,+ basi an hadi ngan an iya mga dungganon, an iya mga asawa ngan an iya mga babaye makainom tikang hito.
3 Katapos, gindara nira an mga surudlan nga bulawan nga ginkuha tikang ha templo han balay han Dios ha Jerusalem, ngan an hadi ngan an iya mga dungganon, an iya mga asawa ngan an iya mga babaye ininom tikang hito.
4 Nanginom hira hin bino, ngan ira gindayaw an mga dios nga bulawan ngan silber, tumbaga,* puthaw, kahoy, ngan bato.
5 Hito mismo nga takna may nagpakita nga mga tudlo han kamot han tawo ngan nagtikang ito pagsurat dida ha nakapalitada nga bungbong han palasyo han hadi nga atbang han burutangan han lampara, ngan nakikita han hadi an kamot samtang nagsusurat ito.
6 Katapos an hadi nanuas* ngan an iya mga panhunahuna nakapahadlok gud ha iya, ngan an iya mga baliatang nangurog+ ngan an iya mga tuhod nagtikang magbunggoay.
7 An hadi nagyakan ha daku nga tingog basi ipatawag an mga salamangkero, an mga Caldeo,* ngan an mga astrologo.+ An hadi nagsiring ha maaramon nga mga lalaki ha Babilonya: “An bisan hin-o nga magbabasa hini nga sinurat ngan magsusumat ha akon han kahulogan hini babadoan hin purpura,* susul-otan hin kwintas nga bulawan,+ ngan magmamando sugad nga ikatulo ha ginhadian.”+
8 Katapos, nagkaabot an ngatanan nga maaramon nga lalaki han hadi, kondi diri hira nakakabasa han sinurat o nakakagpahibaro ha hadi han kahulogan hito.+
9 Salit hi Hadi Belsazar nahadlok gud ngan an iya nawong nanuas; ngan an iya mga dungganon nagupong.+
10 Tungod han mga pulong han hadi ngan han iya mga dungganon, an rayna sinulod ha ruwang diin hira nagpapanagtawo. An rayna nagsiring: “O hadi, mabuhi ka unta ha kadayonan. Ayaw tuguti nga makapahadlok ha imo an imo mga panhunahuna ngan manuas an imo nawong.
11 Ha imo ginhadian may usa nga tawo* nga may-ada han espiritu han baraan nga mga dios. Ha mga adlaw han imo amay, nakita ha iya an kahibaro ngan an hilarom nga pagsabot ngan an kinaadman nga pariho han kinaadman han mga dios.+ Gintokahan hiya ni Hadi Nabucodonosor nga imo amay nga magin lider han madyikero nga mga saserdote, han mga salamangkero, han mga Caldeo,* ngan han mga astrologo;+ ginbuhat ito han imo amay, O hadi.
12 Kay hi Daniel, nga ginngaranan han hadi hin Beltesazar,+ may-ada diri ordinaryo nga hunahuna* ngan kahibaro ngan hilarom nga pagsabot basi maghatag hin kahulogan han mga inop, magsaysay hin mga patigo, ngan magsulbad hin magkuri gud nga mga problema.*+ Yana ipatawag unta hi Daniel, ngan igsusumat niya ha imo an kahulogan han sinurat.”
13 Salit gindara hi Daniel ha atubangan han hadi. An hadi nagpakiana kan Daniel: “Ikaw ba hi Daniel nga usa han mga distyero nga tikang ha Juda,+ nga ginkuha han akon amay nga hadi tikang ha Juda?+
14 Nakabati ako mahitungod ha imo nga aada ha imo an espiritu han mga dios+ ngan nakita ha imo an kahibaro ngan hilarom nga pagsabot ngan diri ordinaryo nga kinaadman.+
15 Yana an maaramon nga mga lalaki ngan an mga salamangkero gindara ha akon atubangan basi basahon ini nga sinurat ngan igpahibaro ha akon an kahulogan hini, kondi diri hira nakakagsumat han kahulogan han mensahe.+
16 Kondi nakabati ako mahitungod ha imo nga nakakahatag ka hin mga kahulogan+ ngan nakakasulbad hin magkuri gud nga mga problema.* Yana kon mababasa mo ini nga sinurat ngan maipapahibaro ha akon an kahulogan hini, babadoan ka hin purpura, susul-otan hin kwintas nga bulawan, ngan magmamando sugad nga ikatulo ha ginhadian.”+
17 Katapos, hi Daniel binaton ha hadi: “Tipigi na la an imo mga regalo ngan ihatag na la ha iba an imo mga pahalipay. Pero babasahon ko ha hadi an sinurat ngan igpapahibaro ko ha iya an kahulogan hito.
18 Mahitungod ha imo, O hadi, ginhatag han Gihitaasi nga Dios kan Nabucodonosor nga imo amay an ginhadian ngan an pagkaharangdon ngan an dungog ngan an himaya.+
19 Tungod han pagkaharangdon nga iginhatag Niya ha iya, an ngatanan nga mga katawohan, mga nasud, ngan mga grupo nga iba-iba an yinaknan nangungurog ha iya atubangan tungod han kahadlok.+ Iya ginpapatay o gintutugotan nga mabuhi an bisan hin-o nga iya karuyag, ngan iya ginpapahitaas o ginpapaubos an bisan hin-o nga iya karuyag.+
20 Kondi han an iya kasingkasing nagin mapahitas-on ngan an iya disposisyon* nagin matig-a, nga tungod hito nagin paragbuot hiya,+ ginpalusad hiya tikang ha trono han iya ginhadian, ngan an iya dignidad ginkuha ha iya.
21 Ginpaiwas hiya tikang ha mga tawo, ngan an iya kasingkasing ginhimo nga pariho han kanan hayop, ngan inukoy hiya kaupod han ihalas nga mga asno. Kinaon hiya hin banwa pariho han mga baka, ngan an iya lawas nahulos han tun-og ha langit, tubtob nga nahibaro hiya nga an Gihitaasi amo an Magmarando ha ginhadian han mga tawo ngan ginhihimo Niya nga magmarando hito an bisan hin-o nga iya karuyag.+
22 “Kondi ikaw, Belsazar nga iya anak, waray mo paubsa an imo kasingkasing, bisan kon maaram ka hini ngatanan.
23 Lugod, ginpahitaas mo an imo kalugaringon kontra ha Ginoo han langit,+ ngan ginsugo mo hira nga dad-on ha imo an mga surudlan han iya balay.+ Katapos, ikaw ngan an imo mga dungganon, an imo mga asawa ngan an imo mga babaye nanginom hin bino tikang hito ngan nagdayaw ha mga dios nga silber ngan bulawan, tumbaga, puthaw, kahoy, ngan bato, mga dios nga waray nakikita, waray nababatian, ngan waray hinbabaroan.+ Kondi waray mo himayaa an Dios nga ha iya kamot aada an imo gininhawa+ ngan an ngatanan mo nga ginbubuhat.
24 Salit ginsugo niya an kamot, ngan iginpasurat niya ini nga sinurat.+
25 Ngan ini an sinurat nga iginsurat: MENE, MENE, TEKEL, ngan PARSIN.
26 “Ini an kahulogan han mga pulong: MENE, gin-ihap han Dios an mga adlaw han imo ginhadian ngan gintapos ito.+
27 “TEKEL, gintimbang ka ha timbangan ngan nakita nga kulang ka.
28 “PERES, an imo ginhadian ginbahin-bahin ngan iginhatag ha mga Mediano ngan mga Persiano.”+
29 Katapos, nagsugo hi Belsazar, ngan ginbadoan nira hi Daniel hin purpura ngan ginsul-otan hin kwintas nga bulawan; ngan nag-anunsyo hira mahitungod ha iya nga magigin ikatulo hiya nga magmarando ha ginhadian.+
30 Hito mismo nga gab-i, ginpatay hi Belsazar nga hadi han mga Caldeo.+
31 Ngan hi Dario+ nga Mediano an nagkarawat han ginhadian; mga 62 anyos hiya.
Mga footnote
^ Ha Ingles, copper.
^ O “an pamahongpahong han hadi nagbag-o.”
^ Karuyag sidngon, usa nga grupo nga eksperto ha panigo ngan ha astrolohiya.
^ Ha Ingles, purple.
^ O “tawo nga may kapas.”
^ Karuyag sidngon, usa nga grupo nga eksperto ha panigo ngan ha astrolohiya.
^ Lit., “espiritu.”
^ Lit., “magbak-ad hin mga higot.”
^ Lit., “nakakagbak-ad hin mga higot.”
^ Lit., “espiritu.”
