Esther 2:1-23
2 Katapos hini nga mga butang, han nawara na an kasina ni Hadi Ahasuero,+ nahinumdoman niya an ginbuhat ni Vasti+ ngan an nagin desisyon kontra ha iya.+
2 Katapos, an personal nga mga kabulig han hadi nagsiring: “Kinahanglan mamiling hin batan-on ngan maghusay nga mga birhen para ha hadi.
3 Ngan magpili an hadi hin mga representante ha ngatanan nga probinsya* han iya ginhadian+ basi tirukon nira an ngatanan nga maghusay nga batan-on nga mga birhen ngadto ha balwarte* han Susan,* ngadto ha balay han mga babaye.* Ibutang hira ha pag-ataman ni Hegai+ nga yunuko han hadi ngan nagmamangno ha mga babaye, ngan tagan hira hin mga programa han pagpahusay.*
4 Ngan an batan-on nga babaye nga nakakapalipay gud ha hadi amo an magigin rayna nga isasaliwan kan Vasti.”+ Naruyagan han hadi an suhestyon, ngan ito an iya ginbuhat.
5 May usa nga Judio ha balwarte* han Susan*+ nga an ngaran hi Mordecai+ nga anak nga lalaki ni Jair nga anak nga lalaki ni Simei nga anak nga lalaki ni Kis, nga usa nga Benjaminita,+
6 nga igindistyero tikang ha Jerusalem upod han katawohan nga igindistyero kaupod ni Hadi Jeconias*+ han Juda, nga igindistyero ni Hadi Nabucodonosor han Babilonya.
7 Hiya an nagmangno* kan Hadasa,* karuyag sidngon, hi Esther, nga anak han bugto han iya tatay,+ kay hi Esther waray na tatay ngan nanay. An batan-on nga babaye maopay an lawas ngan mahusay, ngan han namatay an iya tatay ngan nanay, ginkuha hiya ni Mordecai ngan gintratar nga sugad hin iya anak.
8 Han iginpasamwak an pulong han hadi ngan an iya balaud ngan han gintirok an damu nga batan-on nga mga babaye ngadto ha balwarte* han Susan* ilarom han pag-ataman ni Hegai,+ hi Esther gindara liwat ha balay* han hadi ilarom han pag-ataman ni Hegai nga nagmamangno ha mga babaye.
9 Yana an batan-on nga babaye nakapalipay kan Hegai ngan nakakarawat han iya pag-uyon,* salit ginhikay dayon niya an programa han pagpahusay*+ ngan an pagkaon ni Esther, ngan nagtoka hiya para ha iya hin pito nga pinili nga batan-on nga mga babaye tikang ha balay han hadi. Iya liwat iginbalhin hiya ngan an iya batan-on nga mga kabulig ngadto ha pinakamaopay nga lugar ha balay han mga babaye.*
10 Hi Esther waray magyakan hin bisan ano mahitungod ha iya katawohan+ o ha iya mga paryente, kay hi Mordecai+ nagsugo ha iya nga diri magsumat ha bisan hin-o.+
11 Kada adlaw hi Mordecai naglalakat-lakat ha atubangan han bungsaran han balay han mga babaye* basi hibaroan an kahimtang ni Esther ngan kon ano an nahitatabo ha iya.
12 An tagsa nga batan-on nga babaye may turno pagkadto kan Hadi Ahasuero kon tapos na niya an 12 ka bulan nga programa nga iginpapabuhat para ha mga babaye, kay ha sugad hini nga paagi kinahanglan nira buhaton an ira programa han pagpahusay*—unom ka bulan gamit an lana han mira+ ngan unom ka bulan gamit an lana han balsamo+ ngan an magkalain-lain nga panhaplas para ha programa han pagpahusay.*
13 Katapos, an batan-on nga babaye andam na pagkadto ha hadi, ngan anoman an iya aroon iginhahatag ha iya pagkadto niya ha balay han hadi tikang ha balay han mga babaye.*
14 Ha pagsirom napakadto hiya, ngan ha aga nabalik hiya ha ikaduha nga balay han mga babaye,* nga ilarom han pag-ataman ni Saasgaz nga yunuko han hadi,+ an nagmamangno ha mga babaye.* Diri hiya napakadto utro ha hadi labot la kon an hadi nalilipay gud ha iya ngan espisipiko nga iginpapatawag hiya.+
15 Ngan pag-abot han turno ni Esther—nga anak ni Abihail nga batâ ni Mordecai, nga nagkuha ngan nagtratar ha iya sugad hin anak+—basi kumadto ha hadi, waray hiya maghangyo hin bisan ano labot han ginsiring ni Hegai nga yunuko han hadi, an nagmamangno ha mga babaye. (Hiton bug-os nga panahon nakakarawat ni Esther an pag-uyon han ngatanan nga nakakakita ha iya.)
16 Hi Esther gindara kan Hadi Ahasuero didto ha iya balay ha ikanapulo ka bulan, karuyag sidngon, an bulan han Tebeth,* ha ikapito ka tuig+ han iya paghadi.
17 Ngan mas ginhigugma han hadi hi Esther kay han ngatanan nga iba pa nga babaye, ngan mas nakarawat ni Esther an iya pag-uyon ngan maunungon nga gugma kay han bisan hin-o han iba nga mga birhen. Salit iginbutang han hadi ha iya ulo an panrayna nga belo* ngan ginhimo hiya nga rayna+ kasaliwan ni Vasti.+
18 Ngan an hadi nag-andam hin daku nga panagtawo para ha ngatanan niya nga prinsipe ngan mga surugoon, an panagtawo ni Esther. Katapos, an hadi nagpasamwak hin kagawasan para ha ngatanan nga probinsya,* ngan padayon nga nanhatag hiya hin mga regalo uyon ha iya akos.
19 Yana han gintirok an mga birhen*+ ha ikaduha nga higayon, hi Mordecai nalingkod ha ganghaan han hadi.
20 Hi Esther waray magyakan hin bisan ano mahitungod ha iya mga paryente ngan ha iya katawohan,+ sugad han iginsugo ha iya ni Mordecai; padayon nga ginbuhat ni Esther an ginsiring ni Mordecai, pariho han iya ginbubuhat han gin-aataman pa hiya ni Mordecai.+
21 Hito nga mga adlaw samtang nalingkod hi Mordecai ha ganghaan han hadi, hira Bigtan ngan Teres, duha nga opisyal ha palasyo han hadi, nga mga parabantay han purtahan, nasina ngan nagplano pagpatay* kan Hadi Ahasuero.
22 Kondi hinbaroan ito ni Mordecai, ngan iya dayon ginsumatan hi Rayna Esther. Katapos, hi Esther nakiistorya ha hadi ha ngaran ni Mordecai.*
23 Salit gin-imbistigaran ito ngan ha urhi napamatud-an nga tinuod, ngan an duha nga lalaki ginbitay ha kahoy; ngan ini ngatanan iginrekord ha libro han kasaysayan han mga panahon ha atubangan han hadi.+
Mga footnote
^ O “sakop nga mga distrito.”
^ O “palasyo; kuta.”
^ O “Susa.”
^ O “ha harem.”
^ O “ngan ipamasahe hira.”
^ O “palasyo; kuta.”
^ O “Susa.”
^ O “nag-ataman.”
^ Nangangahulogan nga “Mirtel.”
^ O “palasyo; kuta.”
^ O “Susa.”
^ O “palasyo.”
^ O “ha harem.”
^ O “an mga pagpamasahe.”
^ O “maunungon nga gugma.”
^ O “han harem.”
^ O “an ira mga pagpamasahe.”
^ O “ngan pati na an mga pagpamasahe han mga babaye.”
^ O “ha harem.”
^ O “ha ikaduha nga harem.”
^ O “nga putos ha ulo.”
^ O “sakop nga mga distrito.”
^ O “batan-on nga mga babaye.”
^ Lit., “pagpadapat hin kamot.”
^ O “para kan Mordecai.”
