Esther 4:1-17
4 Han nahibaro hi Mordecai+ han ngatanan nga nahitabo,+ gin-gisi niya an iya bado ngan nagsul-ot hin sako nga panapton ngan nagbutang hin abo. Katapos, kinadto hiya ha butnga han syudad ngan ginuliat hin makusog tungod han duro nga kasubo.
2 Tubtob la hiya ha atubangan han ganghaan han hadi, kay diri puydi sumulod ha ganghaan han hadi an bisan hin-o nga nakasul-ot hin sako nga panapton.
3 Ngan ha tagsa nga probinsya*+ diin nakaabot an pulong han hadi ngan an iya balaud, an mga Judio nabido gud, ngan nagpuasa+ hira ngan nagtinangis ngan nagnguyngoy. Damu an nanhigda ha sako nga panapton ngan ha abo.+
4 Han an mga kabulig nga babaye ni Esther ngan an iya mga yunuko inabot ngan nagsumat hini ha iya, an rayna nasubo gud. Katapos, nagpadara hiya hin mga bado basi isul-ot ni Mordecai imbes nga an iya sako nga panapton, pero waray niya ito karawata.
5 Tungod hito iginpatawag ni Esther hi Hatac, nga usa han mga yunuko han hadi, nga ginpili han hadi basi manginano ha iya, ngan ginsugo niya hi Hatac nga pakianhan hi Mordecai kon ano an karuyag sidngon hini ngan kon ano an nahitatabo.
6 Salit ginawas hi Hatac ngadto kan Mordecai ha plasa han syudad ha atubangan han ganghaan han hadi.
7 Iginsumat ni Mordecai kan Hatac an ngatanan nga nahitabo ha iya ngan an eksakto nga kantidad han kwarta+ nga iginsaad ni Haman nga ibabayad ha tiripigan han bahandi han hadi basi bungkagon an mga Judio.+
8 Gintagan liwat niya hi Hatac hin kopya han sinurat nga balaud nga iginpagawas ha Susan*+ para poohon hira. Ipapakita ito ni Hatac kan Esther ngan ig-iesplikar ito ha iya ngan sisidngan hiya+ nga kumadto ha hadi basi makimalooy ha iya ngan manginyupo ha atubangan han hadi para ha iya katawohan.
9 Binalik hi Hatac ngan ginsumatan hi Esther han ginsiring ni Mordecai.
10 Hi Esther binaton kan Hatac pinaagi hin mga instruksyon nga isusumat kan Mordecai:+
11 “Maaram an ngatanan nga surugoon han hadi ngan an katawohan ha mga probinsya* han hadi nga kon may bisan hin-o nga lalaki o babaye nga kumadto ha sulod nga bungsaran han hadi+ nga diri iginpapatawag, usa la nga balaud an ipapatuman: Papatayon hiya; mabubuhi la hiya kon ig-uunat han hadi ngada ha iya an bulawan nga setro.+ Ngan yana, 30 ka adlaw na nga waray ako ipatawag ngadto ha hadi.”
12 Han ginsumatan hi Mordecai han ginsiring ni Esther,
13 binaton hiya kan Esther: “Ayaw hunahunaa nga ha ngatanan nga Judio ikaw la an makakatalwas tungod kay aada ka ha panimalay han hadi.
14 Kay kon mahilom ka la hini nga takna, ha iba magtitikang an bulig ngan katalwasan han mga Judio,+ pero ikaw ngan an panimalay han imo tatay mamamatay. Ngan hin-o ba an maaram nga bangin an sugad ngay-an hini nga kahimtang an hinungdan nga nagin rayna ka?”+
15 Katapos, binaton hi Esther kan Mordecai:
16 “Lakat, tiroka an ngatanan nga Judio nga hiaagian ha Susan* ngan pagpuasa+ kamo para ha akon. Ayaw kamo pagkaon o pag-inom ha sulod hin tulo ka adlaw,+ ha gab-i ngan ha adlaw. Magpupuasa liwat ako upod an akon mga kabulig nga babaye. Makadto ako ha hadi, nga supak ha balaud, ngan kon kinahanglan ako mamatay, andam ako mamatay.”
17 Salit linakat hi Mordecai ngan ginbuhat an ngatanan nga iginsugo ha iya ni Esther.
