Esther 6:1-14
-
Hi Mordecai ginpasidunggan han hadi (1-14)
6 Hito nga gab-i diri nahingangaturog an hadi.* Salit nagsugo hiya nga kuhaon an libro han mga rekord han kasaysayan han mga panahon,+ ngan ginbasa ito ha hadi.
2 Hin-agian nga nakasurat dida hito an iginsumat ni Mordecai mahitungod kanda Bigtana ngan Teres, duha nga opisyal ha palasyo han hadi, nga mga parabantay han purtahan, nga nagplano pagpatay* kan Hadi Ahasuero.+
3 An hadi nagpakiana: “Ano nga pagpasidungog ngan balos an iginhatag kan Mordecai tungod hini?” Binaton an personal nga mga kabulig han hadi: “Waray ginbuhat para ha iya.”
4 Ha urhi nagsiring an hadi: “Hin-o an aada ha bungsaran?” Hito nga panahon hi Haman nakadto ha gawas nga bungsaran+ han balay* han hadi basi makiistorya ha hadi nga ipabitay hi Mordecai ha kahoy nga iya igin-andam para ha iya.+
5 An mga kabulig han hadi binaton ha iya: “Aada hi Haman+ natindog ha bungsaran.” Salit an hadi nagsiring: “Pasudla hiya.”
6 Pagsulod ni Haman, an hadi nagsiring ha iya: “Ano an angay buhaton para ha tawo nga karuyag pasidunggan han hadi?” Hi Haman nagsiring ha iya kasingkasing: “May iba pa ba nga karuyag pasidunggan han hadi labot ha akon?”+
7 Salit hi Haman nagsiring ha hadi: “Para ha tawo nga karuyag pasidunggan han hadi,
8 padad-a hira hin panhadi nga bado+ nga ginsusul-ot han hadi ngan hin kabayo nga ginsasakyan han hadi, nga an ulo hito may dekorasyon.
9 Katapos, an bado ngan an kabayo ipaasikaso ha usa han dungganon nga mga prinsipe han hadi, ngan sadang nira badoan an tawo nga karuyag pasidunggan han hadi ngan pasakyon hiya ha kabayo didto ha plasa han syudad. Kinahanglan gumuliat hira ha unhan niya: ‘Ini an ginbubuhat ha tawo nga karuyag pasidunggan han hadi!’”+
10 An hadi nagsiring dayon kan Haman: “Pagdagmit! Kuhaa an bado ngan an kabayo, ngan an imo pa la ginsiring buhata kan Mordecai nga Judio nga nalingkod ha ganghaan han hadi. Siguroha nga waray malikatan nga bisan usa han imo ginsiring.”
11 Salit ginkuha ni Haman an bado ngan an kabayo, ngan iya ginbadoan hi Mordecai+ ngan ginpasakay hiya didto ha plasa han syudad ngan ginuliat ha unhan niya: “Ini an ginbubuhat ha tawo nga karuyag pasidunggan han hadi!”
12 Katapos hito, hi Mordecai binalik ha ganghaan han hadi, pero hi Haman nagdagmit pag-uli ha iya balay, nga nabibido ngan may tabon an iya ulo.
13 Han igin-istorya ni Haman ha iya asawa nga hi Zeres+ ngan ha ngatanan niya nga sangkay an ngatanan nga nahitabo ha iya, an iya maaramon nga mga tawo ngan an iya asawa nga hi Zeres nagsiring ha iya: “Kon hi Mordecai, nga ha iya atubangan nagtikang ka mapirde, usa nga tulin han mga Judio,* diri ka magdadaog ha iya; sigurado nga mapipirde ka ha iya atubangan.”
14 Samtang nakikiistorya pa hira ha iya, inabot an mga opisyal ha palasyo han hadi ngan nagdagmit pagdara kan Haman ngadto ha panagtawo nga igin-andam ni Esther.+
Mga footnote
^ Lit., “pinalagiw an kahingaturugon han hadi.”
^ Lit., “pagpadapat hin kamot.”
^ O “palasyo.”
^ Lit., “tikang ha binhi han mga Judio.”
