Esther 8:1-17
8 Hito nga adlaw iginhatag ni Hadi Ahasuero kan Rayna Esther an balay ni Haman,+ nga kaaway han mga Judio;+ ngan hi Mordecai kinadto ha atubangan han hadi, kay iginsumat ni Esther kon ano niya hiya.+
2 Katapos, gintangtang han hadi an iya pantatak nga singsing+ nga iya ginkuha tikang kan Haman ngan iginhatag ito kan Mordecai. Ngan iginpadumara ni Esther kan Mordecai an balay ni Haman.+
3 Dugang pa, nakiistorya utro hi Esther ha hadi. Hinapa hiya ha iya tiilan ngan nagtangis ngan nakimalooy ha iya nga pugngan an kadaot nga ginbuhat ni Haman nga Agagita ngan an iya plano kontra ha mga Judio.+
4 Igin-unat han hadi ngada kan Esther an bulawan nga setro,+ salit binuhát hi Esther ngan tinindog ha atubangan han hadi.
5 Nagsiring hiya: “Kon ikakalipay han hadi ngan kon nakarawat ko an iya pag-uyon, ngan kon baga hin angayan ha hadi ngan makalilipay ako ha iya pagkita, magpasurat unta hin sugo nga kanselahon an mga surat—an plano ni Haman+ nga anak ni Hamedata nga Agagita,+ nga iya iginsurat basi bungkagon an mga Judio ha ngatanan nga probinsya* han hadi.
6 Kay paonan-o ko maiilob nga makita an kadaot nga mahitatabo ha akon katawohan, ngan paonan-o ko maiilob nga makita an pagkabungkag han akon mga paryente?”
7 Salit hi Hadi Ahasuero nagsiring kan Rayna Esther ngan kan Mordecai nga Judio: “Kitaa! An balay ni Haman iginhatag ko na kan Esther+ ngan iginpabitay hiya ha kahoy,+ tungod han iya plano nga dauton an* mga Judio.
8 Yana mahimo niyo isurat ha ngaran han hadi an anoman nga iyo nahuhunahuna nga makakaopay ha mga Judio ngan selyohan ito gamit an pantatak nga singsing han hadi, kay an usa nga balaud nga iginsurat ha ngaran han hadi ngan ginselyohan gamit an pantatak nga singsing han hadi diri makakansela.”+
9 Salit an mga sekretaryo han hadi iginpatawag hito nga panahon ha ikatulo ka bulan, karuyag sidngon, an bulan han Sivan,* ha ika-23 ka adlaw, ngan ira iginsurat an ngatanan nga iginsugo ni Mordecai ha mga Judio, pati na ha mga satrapa,+ ha mga gobernador, ngan ha mga prinsipe han mga probinsya*+ tikang ha India tubtob ha Etiopia, 127 nga probinsya,* ha tagsa nga probinsya* uyon ha ira kalugaringon nga estilo han pagsurat ngan ha tagsa nga katawohan uyon ha ira kalugaringon nga yinaknan ngan ha mga Judio uyon ha ira kalugaringon nga estilo han pagsurat ngan yinaknan.
10 Iginsurat niya ito ha ngaran ni Hadi Ahasuero ngan ginselyohan ito gamit an pantatak nga singsing han hadi+ ngan iginpadara an mga surat pinaagi han nakakabayo nga mga paradara hin surat; sakay hira hin maglaksi nga mga kabayo nga ginagamit ha pagserbisyo ha hadi.
11 Hito nga mga surat gintugotan han hadi an mga Judio ha ngatanan nga magkalain-lain nga syudad nga magtirirok ngan depensahan an ira kinabuhi* ngan poohon, patayon, ngan bungkagon an bisan ano nga kasundalohan han bisan ano nga katawohan o probinsya* nga bangin umatake ha ira, pati na an kababayin-an ngan kabataan, ngan kuhaon an ira mga panag-iya.+
12 Mahitatabo ito ha ngatanan nga probinsya* ni Hadi Ahasuero ha usa la ka adlaw, ha ika-13 ka adlaw han ika-12 ka bulan, karuyag sidngon, an bulan han Adar.*+
13 An surat* ipapagawas sugad nga balaud ha ngatanan nga probinsya.* Ipapasamwak ito ha ngatanan nga mga katawohan, basi hito nga adlaw an mga Judio magin andam ha pagbulos ha ira mga kaaway.+
14 An mga paradara hin surat nga sakay ha mga kabayo nga ginagamit ha pagserbisyo ha hadi ginawas nga nag-aapura ngan nagdadagmit tungod han sugo han hadi. An balaud iginpagawas liwat ha balwarte*+ han Susan.*
15 Yana binaya hi Mordecai ha atubangan han hadi; nakasul-ot hiya hin panhadi nga bado nga asul ngan busag ngan hin magarbo nga bulawan nga korona ngan hin kurigmos nga hinimo ha maopay nga klase hin de-lana nga tela nga purpura.*+ Ngan an syudad han Susan* nagsinggit tungod ha kalipay.
16 An mga Judio nagkaada katalwasan* ngan kalipay ngan pagrayhak ngan kadungganan.
17 Ngan ha ngatanan nga probinsya* ngan ha ngatanan nga syudad, diin man nakaabot an sugo han hadi ngan an iya balaud, an mga Judio nagkakalipay ngan nagrarayhak, ngan nagkakaada hira mga panagtawo ngan mga selebrasyon. Damu han mga katawohan han tuna an nagpapahayag nga mga Judio hira,+ kay duro an ira kahadlok ha mga Judio.
Mga footnote
^ O “sakop nga mga distrito.”
^ Lit., “tungod kay iya igin-unat an iya kamot kontra ha.”
^ O “sakop nga distrito.”
^ O “sakop nga mga distrito.”
^ O “sakop nga mga distrito.”
^ O “ira kalag.”
^ O “sakop nga distrito.”
^ O “sakop nga mga distrito.”
^ O “kopya han surat.”
^ O “sakop nga mga distrito.”
^ O “palasyo; kuta.”
^ O “Susa.”
^ Ha Ingles, purple.
^ O “Susa.”
^ Lit., “kalamrag.”
^ O “sakop nga mga distrito.”
