Exodo 11:1-10
11 Katapos, hi Jehova nagsiring kan Moises: “Usa pa nga peste an akon ipapadapat ha Paraon ngan ha Ehipto. Katapos hito, iya kamo palalargahon tikang dinhi.+ Kon palargahon na kamo niya, sigurado nga tatabugon kamo niya dinhi.+
2 Yana sidnga an katawohan nga an ngatanan nga lalaki ngan babaye kinahanglan mangaro ha ira amyaw hin mga gamit nga silber ngan bulawan.”+
3 Ngan ginpahinabo ni Jehova nga an mga Ehiptohanon magpakita hin pag-uyon ha iya katawohan. Dugang pa, hi Moises mismo nagin talahuron gud ha tuna han Ehipto dida ha mga surugoon han Paraon ngan dida ha katawohan.
4 Katapos, hi Moises nagsiring: “Ini an ginsiring ni Jehova, ‘Ha katutnga han gab-i makadto ako ha butnga han Ehipto,+
5 ngan mamamatay an ngatanan nga suhag ha tuna han Ehipto,+ tikang ha suhag han Paraon nga nalingkod ha iya trono tubtob ha suhag han uripon nga babaye nga nagtatrabaho ha de-mano nga gilingan, ngan an ngatanan nga suhag han mga hayop.+
6 Ha bug-os nga tuna han Ehipto magkakaada hin duro nga pagnguyngoy nga waray pa gud mahitabo ngan diri na gud mahitatabo utro.+
7 Pero waray bisan usa nga ayam nga mag-uusig* ha mga Israelita, ha mga tawo o ha ira mga hayop, basi kamo mahibaro nga hi Jehova makakahimo hin kaibahan butnga han mga Ehiptohanon ngan han mga Israelita.’+
8 Ngan an ngatanan nimo nga surugoon sigurado nga malugsad ngadi ha akon ngan mahapa hira ha akon atubangan, nga nasiring, ‘Kadto na, ikaw ngan an ngatanan nga katawohan nga nasunod ha imo.’+ Ngan katapos hito, magawas ako.” Salit binaya hiya tikang ha atubangan han Paraon nga nasisina hinduro.
9 Katapos, hi Jehova nagsiring kan Moises: “Diri mamamati ha imo an Paraon,+ basi an akon mga milagro magdamu ha tuna han Ehipto.”+
10 Ginbuhat nira Moises ngan Aaron ini ngatanan nga milagro ha atubangan han Paraon,+ pero ginpabay-an ni Jehova nga magin matig-a an kasingkasing han Paraon, salit waray niya palargaha an mga Israelita tikang ha iya tuna.+
Mga footnote
^ Lit., “magpapatarom han dila hito.”
