Exodo 27:1-21
27 “Hihimoon mo an halaran tikang ha kahoy nga akasya;+ lima ka siko* an kahilaba hito ngan lima ka siko an kahilapad. Kinahanglan kwadrado an halaran ngan tulo ka siko an kahitaas.+
2 Maghihimo ka hin mga sungay+ ha upat nga eskina hito; an mga sungay magigin bahin han halaran, ngan imo hahaklapan hin tumbaga* an halaran.+
3 Maghihimo ka hin mga balde nga gagamiton ha pagkuha han mga abo* hito, pati hin mga pala, mga planggana, mga iturugsok, ngan mga insensaryo, ngan hihimoon mo an ngatanan nga garamiton hito tikang ha tumbaga.+
4 Maghihimo ka hin parilya para ha halaran, usa nga iskrin nga hinimo tikang ha tumbaga, ngan ha iskrin paghimo hin upat nga puropurseras nga tumbaga dida ha upat nga eskina hito.
5 Itataod mo ito ha ilarom han sanipa han halaran, ngan an iskrin ipaplastar ha kabutngaan han halaran.
6 Maghihimo ka hin mga bayawan tikang ha kahoy nga akasya para ha halaran ngan haklapi ito hin tumbaga.
7 An mga bayawan ipapalhog ha mga puropurseras basi an mga bayawan nakaplastar ha duha nga ligid han halaran kon gindadara ito.+
8 Hihimoon mo an halaran nga an kurti pariho hin kahon nga guhang gamit an mga tabla. Sadang ito himoon sugad han Iya iginpakita ha imo didto ha bukid.+
9 “Hihimoon mo an bungsaran+ han tabernakulo. Para ha sur nga ligid, nga naatubang ha sur, an bungsaran bubutangan hin mga kurtina nga ibibitay nga hinimo tikang ha maopay nga klase hin linubid nga lino, 100 ka siko an kahilaba ha usa nga ligid.+
10 Magkakaada ito hin 20 nga poste nga may 20 nga sul-otan han mitsa nga tumbaga. An mga kaw-it han mga poste ngan an mga pandugtong* hito hinimo ha silber.
11 An mga kurtina nga ibibitay nga para ha norte nga ligid 100 ka siko liwat an kahilaba, upod an 20 nga poste hito ngan an 20 nga sul-otan nga tumbaga para hito, upod an mga kaw-it nga silber ngan mga pandugtong* para ha mga poste.
12 Magkakaada hin mga kurtina nga ibibitay ha weste nga ligid nga 50 ka siko dida ha kahilapdon han bungsaran, nga may napulo nga poste ngan napulo nga sul-otan.
13 An kahilapad han bungsaran ha este nga ligid nga naatubang ha sinirangan 50 ka siko.
14 Magkakaada hin 15 ka siko nga mga kurtina nga ibibitay ha usa nga ligid han aragian tipasulod, nga may tulo nga poste ngan tulo nga sul-otan.+
15 Ngan para ha usa pa nga ligid han aragian tipasulod, magkakaada hin 15 ka siko nga mga kurtina nga ibibitay, nga may tulo nga poste ngan tulo nga sul-otan.
16 “An aragian tipasulod ha bungsaran sadang magkaada hin salipod* nga 20 ka siko an kahilaba nga hinimo tikang ha inulang nga asul, de-lana nga inulang nga purpura,* inulang nga malamrag an kapula,* ngan maopay nga klase hin linubid nga lino nga hinablon,+ nga may upat nga poste ngan upat nga sul-otan para hito.+
17 An ngatanan nga poste han bungsaran bubutangan hin mga pandugtong nga silber ngan mga kaw-it nga silber, pero an mga sul-otan para hito hihimoon tikang ha tumbaga.+
18 An bungsaran magigin 100 ka siko an kahilaba,+ 50 ka siko an kahilapad, ngan 5 ka siko an kahitaas, nga hinimo tikang ha maopay nga klase hin linubid nga lino, ngan sadang magkaada ito hin mga sul-otan nga tumbaga.
19 An ngatanan nga garamiton ngan an mga butang nga gagamiton ha pag-alagad ha tabernakulo, sugad man an pantolda nga mga usok ngan an ngatanan nga usok han bungsaran, hihimoon tikang ha tumbaga.+
20 “Sugoa an mga Israelita nga magdara hin puro nga lana han ginbayo nga mga olibo para ha suga, basi padayon nga maglaga pirme an mga lampara.+
21 Ha tolda nga katirokan, ha gawas han kurtina nga hirani ha Pagpamatuod,+ hi Aaron ngan an iya mga anak nga lalaki manginginano basi padayon nga maglaga an mga lampara tikang ha pagsirom tubtob ha kaaga ha atubangan ni Jehova.+ Usa ito nga nagpapadayon nga surundon para ha ngatanan nira nga henerasyon nga pagtutumanon han mga Israelita.+
Mga footnote
^ Ha Ingles, copper.
^ O “mantikaon nga mga abo,” karuyag sidngon, mga abo nga nababad ha tambok han mga halad.
^ O “mga puropurseras” nga gin-gagamit ha pagsurusumpay.
^ O “mga puropurseras” nga gin-gagamit ha pagsurusumpay.
^ O “kurtina.”
^ Ha Ingles, purple.
^ Lit., “eskarlata.”
