Exodo 37:1-29
37 Katapos, hi Bezalel+ naghimo hin Arka+ tikang ha kahoy nga akasya. Duha ngan tunga ka siko* an kahilaba hito ngan usa ngan tunga ka siko an kahilapad ngan usa ngan tunga ka siko an kahitaas.+
2 Iya ito ginhaklapan hin puro nga bulawan ha sulod ngan ha gawas ngan naghimo hin muldora nga bulawan ha palibot hito.+
3 Katapos hito, naghurma hiya hin upat nga puropurseras nga bulawan para hito, para ha igbaw han upat nga tiil-tiil hito, nga may duha nga puropurseras ha usa nga ligid hito ngan duha nga puropurseras ha luyo nga ligid hito.
4 Sunod, naghimo hiya hin mga bayawan tikang ha kahoy nga akasya ngan ginhaklapan ito hin bulawan.+
5 Katapos, iya iginpalhog an mga bayawan ha mga puropurseras dida ha mga ligid han Arka para ha pagdara han Arka.+
6 Ginhimo niya an taklob tikang ha puro nga bulawan.+ Duha ngan tunga ka siko an kahilaba hito ngan usa ngan tunga ka siko an kahilapad.+
7 Katapos, naghimo hiya hin duha nga kerubin+ tikang ha pinilpig nga bulawan dida ha duha nga kataposan han taklob.+
8 An usa nga kerubin ada ha usa nga kataposan, ngan an usa pa nga kerubin ada ha luyo nga kataposan. Ginhimo niya an duha nga kerubin dida ha duha nga kataposan han taklob.
9 Nakabuklad tipaigbaw an mga pako han duha nga kerubin, nga nasasalipdan han mga pako hito an taklob.+ Nag-aatubang ito nga duha, ngan an mga nawong hito natamod ngada ha taklob.+
10 Katapos, naghimo hiya hin lamesa tikang ha kahoy nga akasya.+ Duha ka siko an kahilaba hito, usa ka siko an kahilapad, ngan usa ngan tunga ka siko an kahitaas.+
11 Ngan iya ito ginhaklapan hin puro nga bulawan ngan naghimo hin muldora nga bulawan ha palibot hito.
12 Sunod, naghimo hiya hin sanipa ha palibot hito nga usa ka dapal* an kahilapad ngan hin muldora nga bulawan ha palibot han sanipa.
13 Dugang pa, naghurma hiya hin upat nga puropurseras nga bulawan para hito ngan igintaod an mga puropurseras ha upat nga eskina nga gintaoran han upat nga tiil-tiil.
14 An mga puropurseras hirani ha sanipa, sugad nga mga palhogan han mga bayawan nga ginagamit ha pagdara han lamesa.
15 Katapos, ginhimo niya an mga bayawan tikang ha kahoy nga akasya ngan ginhaklapan ito hin bulawan para ha pagdara han lamesa.
16 Katapos hito, ginhimo niya tikang ha puro nga bulawan an mga garamiton nga iginbutang ha bawbaw han lamesa—an mga pinggan hito, an mga kopa hito, ngan an mga yahong ngan mga pitsel hito nga gagamiton ha paghuwad han mga halad nga irimnon.+
17 Katapos, ginhimo niya an burutangan han lampara+ tikang ha puro nga bulawan. Ginhimo niya tikang ha pinilpig nga bulawan an burutangan han lampara. An tungtongan hito, an lawas hito, an mga dahon-dahon hito ha ilarom han bukad, an mga biyoos hito, ngan an mga bukad hito ginhimo tikang ha usa ka bug-os nga materyales.+
18 May unom nga sanga tikang ha lawas hito, tulo nga sanga ha usa nga ligid han burutangan han lampara ngan tulo nga sanga ha luyo nga ligid han burutangan han lampara.
19 Ha usa nga sanga may tulo nga dahon-dahon nga an kurti pariho han mga bukad han almendras nga naglalat-ang-lat-ang ha mga biyoos ngan mga bukad, ngan ha luyo nga sanga may tulo nga dahon-dahon nga an kurti pariho han mga bukad han almendras nga naglalat-ang-lat-ang ha mga biyoos ngan mga bukad. Sugad hini an hitsura han unom nga sanga dida ha burutangan han lampara.
20 Ngan ha lawas han burutangan han lampara may upat nga dahon-dahon nga an kurti pariho han mga bukad han almendras nga naglalat-ang-lat-ang ha mga biyoos ngan ha mga bukad.
21 May-ada usa nga biyoos ha ilarom han siyahan nga duha nga sanga nga tikang ha lawas ngan usa nga biyoos ha ilarom han sunod nga duha nga sanga ngan usa nga biyoos ha ilarom han sunod nga duha nga sanga, para ha unom nga sanga nga tikang ha lawas han burutangan han lampara.
22 An mga biyoos ngan an mga sanga ngan an bug-os nga burutangan han lampara ginhimo ha usa ka bug-os nga materyales nga puro ngan pinilpig nga bulawan.
23 Katapos, iya ginhimo an pito nga lampara hito+ ngan an mga kimpit hito ngan an mga insensaryo hito tikang ha puro nga bulawan.
24 Iya ito ginhimo upod an ngatanan nga garamiton hito, tikang ha usa ka talanton* nga puro nga bulawan.
25 Yana iya ginhimo an halaran han insenso+ tikang ha kahoy nga akasya. Kwadrado ito, usa ka siko an kahilaba, usa ka siko an kahilapad, ngan duha ka siko an kahitaas. An mga sungay hito ginporma sugad nga bahin hito.+
26 Iya ito ginhaklapan hin puro nga bulawan, an bawbaw hito ngan an mga ligid hito ha palibot ngan an mga sungay hito, ngan naghimo hiya hin muldora nga bulawan ha palibot hito.
27 Naghimo hiya hin duha nga puropurseras nga bulawan para hito ha ubos han muldora hito ha duha nga magkaatbang nga ligid basi palhogan han mga bayawan nga ginagamit ha pagdara hito.
28 Katapos hito, ginhimo niya an mga bayawan tikang ha kahoy nga akasya ngan ginhaklapan ito hin bulawan.
29 Ginhimo liwat niya an baraan nga lana nga pandihog+ ngan an puro ngan mahamot nga insenso,+ nga ginhalo hin maopay.*
Mga footnote
^ O “pariho han ginhihimo han usa nga parahimo hin haplas.”
