Ezekiel 15:1-8
-
Jerusalem, waray pulos nga ubas (1-8)
15 An pulong ni Jehova inabot utro ha akon, nga nasiring:
2 “Anak han tawo, ha ano nga paagi naiiba an kahoy han ubas ha iba pa nga kahoy o sanga tikang ha mga kahoy ha kagurangan?
3 An estaka ba nga makukuha tikang hito magagamit ha pagtrabaho? O makakahimo ba an mga tawo hin sab-itan hin mga gamit tikang hito?
4 Kitaa! Iginlalabog ito ha kalayo sugad nga sungo, ngan gin-uugtang* han kalayo an duha nga kataposan hito ngan ginsusunog an butnga. Mapupulsan pa ba ito para ha bisan ano nga trabaho?
5 Bisan han bug-os pa ito, diri na ito nagagamitan para ha bisan ano. Labi na gud nga diri ito magagamitan kon gin-ugtang ngan ginsunog na ito han kalayo!”
6 “Salit ini an siring ni Jehova nga Soberano nga Ginoo: ‘Pariho han kahoy han ubas dida ha mga kahoy ha kagurangan, nga akon iginsungo ha kalayo, ito liwat an akon bubuhaton ha mga umurukoy han Jerusalem.+
7 Nakontra ako ha ira. Nakapalagiw hira ha kalayo, pero kalayo la gihapon an mag-uugtang ha ira. Ngan makikilala gud niyo nga ako hi Jehova kon kontrahon ko na hira.’”+
8 “‘Ngan an tuna hihimoon ko nga binayaan+ kay waray hira magin matinumanon,’+ nasiring hi Jehova nga Soberano nga Ginoo.”
Mga footnote
^ Ha iba nga lugar, “ginpupugdang.”
