Surat kan Filemon 1:1-25
1 Tikang kan Pablo, nga priso+ tungod kan Kristo Jesus, ngan kan Timoteo+ nga aton bugto, para kan Filemon nga amon hinigugma nga igkasi-magburuhat,
2 ngan kan Apia nga amon bugto nga babaye, ngan kan Arquipo+ nga amon igkasi-sundalo, ngan para ha kongregasyon nga nagkakatirok ha imo balay:+
3 Makarawat unta niyo an diri matupngan nga pagkabuotan ngan kamurayawan tikang ha Dios nga aton Amay ngan ha Ginoo nga hi Jesu-Kristo.
4 Pirme ako nagpapasalamat ha akon Dios kon gin-uunabi ko ikaw ha akon mga pag-ampo,+
5 kay pirme ko nababatian an imo pagtoo ngan an imo gugma para* ha Ginoo nga hi Jesus ngan para* ha ngatanan nga baraan.
6 Nag-aampo ako nga an imo pagtoo nga pariho ha pagtoo han iba magpagios unta ha imo nga kilalahon an tagsa nga maopay nga butang nga may-ada kita pinaagi han Kristo.
7 Kay nalipay ngan naliaw gud ako han hinbatian ko an imo gugma, kay an kasingkasing* han mga baraan narepreskohan pinaagi ha imo, bugto ko.
8 Tungod hini mismo nga hinungdan, bisan kon may-ada ako daku nga kagawasan ha pagyakan may kalabotan han Kristo basi sugoon ka ha pagbuhat han husto,
9 mas karuyag ko nga makimalooy ha imo tungod ha gugma, kay ako, hi Pablo, edaran na nga tawo ngan yana priso liwat tungod kan Kristo Jesus.
10 Nakikimalooy ako ha imo para ha akon anak nga hi Onesimo,+ kay ha iya nagin amay ako+ samtang priso* ako.
11 Hadto waray hiya pulos ha imo, kondi yana may pulos na hiya ha imo ngan ha akon.
12 Ginpapabalik ko hiya ha imo, oo hiya, nga duok gud ha akon kasingkasing.*
13 Karuyag ko unta nga didi na la hiya ha akon basi hiya an sumaliwan ha imo ha pag-asikaso ha akon samtang priso ako tungod han maopay nga sumat.+
14 Pero diri ko karuyag magbuhat hin bisan ano nga waray han imo permiso, basi an imo maopay nga buhat himoon mo diri tungod kay napiritan ka la, kondi tungod kay ito an imo karuyag.+
15 Bangin ini gud an hinungdan nga binaya hiya hin madaliay* basi mahibalik hiya ha imo ha kadayonan,
16 diri na sugad nga uripon+ kondi labaw pa hin uripon, sugad nga usa nga hinigugma nga bugto,+ labi na ha akon, pero labi na gud ha imo, sugad nga imo uripon ngan igkasi-tumuroo ha Ginoo.
17 Salit kon gintatagad mo ako nga sangkay,* mahigugmaon nga karawata hiya pariho han imo pagkarawat ha akon.
18 Dugang pa, kon nakabuhat hiya ha imo hin bisan ano nga sayop o nakautang ha imo hin bisan ano, ako an mabayad hito ha imo.
19 Ako, hi Pablo, ako mismo an nagsusurat hini: Babayaran ko ito—diri ko na kinahanglan isumat ha imo nga utang mo ha akon bisan an imo mismo kalugaringon.
20 Oo bugto, makarawat ko unta tikang ha imo ini nga bulig may kalabotan ha Ginoo; tagi hin karepresko an akon kasingkasing* may kalabotan ha Kristo.
21 Nasarig ako nga masugot ka, salit nagsusurat ako ha imo, kay maaram ako nga labaw pa an imo bubuhaton kay han akon ginsisiring.
22 Kondi labot pa hito, pag-andam liwat hin akon mauukyan,* kay naglalaom ako nga tungod han iyo mga pag-ampo ibabalik ako ha iyo.*+
23 Nangungumusta ha imo hi Epafras+ nga akon igkasi-priso nga kahiusa ni Kristo Jesus,
24 pati hira Marcos, Aristarco,+ Demas,+ ngan Lucas,+ nga akon mga igkasi-magburuhat.
25 Hinaot makarawat niyo an diri matupngan nga pagkabuotan han Ginoo nga hi Jesu-Kristo samtang nagpapakita kamo hin maopay nga disposisyon.
Mga footnote
^ O “ngadto.”
^ O “ngadto.”
^ O “an malumo nga pagpalangga.”
^ Lit., “nakagapos.”
^ O “nga akon malumo nga ginpapalangga.”
^ Lit., “usa ka oras.”
^ Lit., “kaangbit.”
^ O “an akon malumo nga pagpalangga.”
^ Ha iba nga lugar, “maiistaran.”
^ O “tatagan ako hin kagawasan para ha iyo.”
