Surat ha mga Taga-Galacia 6:1-18
6 Mga kabugtoan, bisan kon an usa nga tawo makahimo hin sayop nga pitad antes niya masantop ito, kamo nga may espirituwal nga mga kwalipikasyon mangalimbasog nga tadungon utro an sugad nga tawo ha espiritu han pagkamalumo.+ Pero bantayi an imo kalugaringon,+ kay bangin masulay ka liwat.+
2 Padayon nga dad-on niyo an mga dinara han usa kag usa,+ ngan hini nga paagi matutuman niyo an balaud han Kristo.+
3 Kay bisan hin-o nga naghuhunahuna nga importante hiya pero diri ngay-an,+ ginlilimbongan niya an iya kalugaringon.
4 Lugod, usisahon han kada tagsa an iya mga buhat,+ ngan magkakaada hiya hinungdan nga malipay gud ha iya la kalugaringon, ngan diri igintatanding an iya kalugaringon ha iba nga tawo.+
5 Kay an kada tagsa magdadara han iya kalugaringon nga pinas-an.*+
6 Dugang pa, an bisan hin-o nga gintututdoan* han pulong han Dios maghatag han ngatanan nga mag-opay nga butang ha iya nga naghahatag han sugad nga pagtutdo.*+
7 Ayaw kamo palimbong: An Dios diri angay minuson. Kay anoman an iginsasabwag han usa nga tawo, ito liwat an iya aanihon;+
8 kay hiya nga nagsasabwag uyon ha iya unod mag-aani hin pagkadunot tikang ha iya unod, kondi hiya nga nagsasabwag uyon ha espiritu mag-aani hin kinabuhi nga waray kataposan tikang ha espiritu.+
9 Salit ayaw kita pag-undang* ha pagbuhat han maopay, kay ha husto nga panahon mag-aani kita kon diri kita manluya.*+
10 Salit samtang may-ada kita higayon,* buhaton naton an maopay ha ngatanan, pero labi na ha mga kapariho naton hin pagtoo.
11 Kitaa niyo kon mationan-o kadagku an mga letra nga ako mismo an nagsurat ha iyo.
12 An ngatanan nga naruruyag maghimo hin maopay nga impresyon ha unod* amo an mga nangangalimbasog pagpirit ha iyo nga magpaturi, nga ginbubuhat ito basi la malikyan an pagtimaraot tungod han pasakitan nga kahoy* han Kristo.
13 Kay bisan an mga nagpapaturi diri nagtutuman han Balaud,+ pero karuyag nira nga magpaturi kamo basi may hinungdan hira ha paghambog mahitungod ha iyo unod.
14 Pero diri gud unta ako maghambog, labot la han pasakitan nga kahoy* han aton Ginoo nga hi Jesu-Kristo,+ nga ha akon paghunahuna pinaagi ha iya an kalibotan ginpatay* ngan ha paghunahuna han kalibotan pinaagi ha iya ginpatay ako.
15 Kay diri importante an pagturi ngan an diri pagturi,+ lugod an importante amo an bag-o nga linarang.+
16 Para ha ngatanan nga naglalakat hin maopay uyon hini nga surundon ha panggawi, mahingada unta ha ira an kamurayawan ngan kalooy, oo, ha Israel han Dios.+
17 Tikang yana, waray bisan hin-o nga magsinamok ha akon, kay aadi ha akon lawas an mga marka sugad nga uripon ni Jesus.+
18 Mga kabugtoan, makarawat unta niyo an diri matupngan nga pagkabuotan han aton Ginoo nga hi Jesu-Kristo samtang nagpapakita kamo hin maopay nga disposisyon. Amen.
Mga footnote
^ O “pinas-an nga responsabilidad.”
^ O “gintutdoan pinaagi ha pagsumat.”
^ O “han sugad nga pagtutdo pinaagi ha pagsumat.”
^ Ha iba nga lugar, “pagtuko.”
^ O “umundang.”
^ Lit., “itinanda nga panahon.”
^ O “nga naruruyag magin maopay pagkit-on ha panggawas nga hitsura.”
^ O “ginpatay ha kahoy.”
